សិស្សនិទ្ទេស A ៨នាក់ ទទួលបានរង្វាន់ម៉ូតូម្នាក់​មួយគ្រឿងពីនាយឧត្តមសេនីយ៍ ប៉ែន វិបុលក្នុងស្រុកពារាំង

ព្រៃវែង៖ នាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិ និងជាប្រធាននាយកដា្ឋនបុគ្គលិក ជាប្រធានក្រុមការងាររាជរដ្ឋាភិបាល ចុះជួយមូលដា្ឋនឃុំព្រៃព្នៅ ស្រុកពារាំង ខេត្តព្រៃវង បានសំណេះសំណាលជាមួយលោកគ្រូ អ្នកគ្រូ និងប្រគល់រង្វាន់ម៉ូតូចំនួន ៨ គ្រឿង ដល់សិស្សជ័យលាភីនិទ្ទេស A នៅវិទ្យាល័យព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែង នាថ្ងៃទី១០ ខែមិនា ឆ្នាំ២០២២។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសនោះ លោក ឆាយ ប៉េងឆាន នាយកវិទ្យាល័យព្រៃព្នៅ បានលើកឡើងថា ចាប់ពីមានកំណែទម្រង់ដ៏ស៊ីជម្រៅរបស់ក្រសួងអប់រំយុវជន និងកីឡាមក ការប្រឡងរបស់សិស្សនៅវិទ្យាល័យព្រៃព្នៅ ទទួលបានលទ្ធផលល្អ។ ជាក់ស្ដែងចាប់ពីឆ្នាំ ២០១៨ មក ការប្រលងសញ្ញាបត្រមធ្យមសិក្សាទុតិយភូមិ មានលទ្ធផលល្អច្រើនដោយក្នុងនោះនៅឆ្នាំ២០១៨ មានសិស្សទទួលបាននិទ្ទេសចំនួន A ២នាក់។ ឆ្នាំ ២០១៩ សិស្សទទួលបាននិទ្ទេស A 5នាក់។ -ឆ្នាំ២០២១ ទទួលបាននិទ្ទេស A ចំនួន៨នាក់ ក្នុងនោះ ស្រីចំនួន ៦នាក់។ 

នាយឧត្តមសេនីយ៍ ប៉ែនវិបុល សម្តែងមោទនភាព ចំពោះការខិតខំយកចិត្តទុកដាក់សិក្សារៀនសូត្ររហូតដល់ទទួលបាននិទ្ទេសល្អ របស់សិស្សានុសិស្ស ដោយមានការជ្រុមជ្រែងពីសំណាក់លោកគ្រូ អ្នកគ្រូទាំងអស់ ដែលបានខិតខំប្រឹងប្រែងបង្រៀនដល់សិស្សានុសិស្សគ្រប់ជំនាន់ រហូតទទួលនូវនិទ្ទេសល្អៗគ្រប់គ្នានាពេលនេះ។ 

នាយឧត្តមសេនីយ៍ ក៏បានបន្តទៀតថា ចំណេះដឹងគឺជាមូលដ្ឋានគ្រឹះនៃការអភិវឌ្ឍប្រទេសជាតិ និង ជាផ្នែកមួយដែលជួយឲ្យយើង ប្រែក្លាយជាមនុស្សអវិជ្ជា ជាមនុស្សមានចំណេះដឹងអភិវឌ្ឍខ្លួន និងក្រុមគ្រួសារព្រមទាំងសង្គមជាតិ នឹងក្លាយខ្លួនទៅជាគំរូល្អដល់ប្អូនៗជំនាន់ក្រោយឲ្យគាត់ខិតខំប្រឹងប្រែងសិក្សារៀនសូត្រ ដើម្បីក្លាយខ្លួនដូចជារៀមច្បងនាពេលនេះ។ 

នាយឧត្តមសេនីយ៍ ក៏បានផ្តល់ជូនននូវថវិកា ដល់លោកគ្រូ អ្នកគ្រូ អាណាព្យាបាលសិស្ស ដែលបានអញ្ជើញចូលរួមនៅនាឱកាសនោះក្នុងម្នាក់ៗចំនួន ១០ ម៉ឺនរៀល ដោយឡែក ស្ត្រី ឯកឧត្តមផ្ដល់ជូនសម្រាប់លើកកម្ពស់សិទ្ធិនារី ៨ មីនា ក្នុងម្នាក់ ចំនួន ១៥ ម៉ឺនរៀលផងដែរ៕សៅគ្រី