មន្ទីរការងារខេត្តតាកែវ ចុះសម្របសម្រួលសំណូមពររវាងកម្មករ និងថៅកែរោងចក្រ

កង្វល់មួយចំនួនដែលកម្មករជាច្រើននាក់តែងតែលើកឡើងបង្ហាញទៅអ្នកគ្រប់គ្រងរោងចក្រឲ្យជួយសម្រួលដល់ពួកគាត់ ក្នុងពេលកន្លងមក ត្រូវបានដោះស្រាយដោយជោគជ័យ ក្រោមការសម្របសម្រួលពីលោកប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តតាកែវ។

លោក ម៉ឹង វីរិយ៉ា ប្រធានមន្ទីរការងារខេត្តតាកែវ បានឲ្យដឹងថា លោក និងក្រុមការងារនៅព្រឹកថ្ងៃទី០២ ខែឧសភា ឆ្នាំ២០២២ បានដឹកនាំមន្រ្តីអធិការកិច្ចការងារចុះដោះស្រាយសំណូមពរកម្មករ និយោជិត រោងចក្រកាត់ដេរនៅក្រុមហ៊ុន ស៊ី អេស ហ្គោលវេ ស្ថិតនៅឃុំអង្គតាសោម ស្រុកត្រាំកក់ ខេត្តតាកែ។ ក្នុងនោះសំណូមពរកម្មកររួមមាន÷
១.សូមក្រុមហ៊ុនជួសជុលកង្ហារដែលខូច និងដាក់កង្ហារបន្ថែមនៅតាមចង្វាក់ផលិតកម្ម។
២.សូមក្រុមហ៊ុនដាក់ម៉ាស៊ីនទឹកក្តៅទឹកត្រជាក់បន្ថែមជូនកម្មករ និយាជិតផឹក។
៣.សូមក្រុមហ៊ុនជួយសម្រួលការសុំច្បាប់របស់កម្មករនិយោជិត ដែលមានសំបុត្រពេទ្យ។

លោកប្រធានមន្ទីរការងារបន្ថែមថា ក្រោយលោកព្យាយាមពន្យល់ច្បាប់ស្តីពីការងារ និងប្រកាសផ្សេងៗទាក់ទងវិស័យការងារ ជាលទ្ធផលលោកនាយកក្រុមហ៊ុន បានឯកភាពធ្វើតាមសំណើរកម្មករ និយោជិតទាំង៣ចំណុច។

ជាចុងក្រោយ លោក ម៉ឹង វីរិយ៉ា សូមស្នើទៅប្រធាន ក៏ដូចជាអ្នកគ្រប់គ្រងក្រុមហ៊ុន សហគ្រាស និងកម្មរ និយោជិត ដទៃទៀត ត្រូវយល់អំពីច្បាប់ អនុវត្តច្បាប់ សហការណ៍ឲ្យបានល្អតាមតួនាទីដើម្បីធ្វើយ៉ាងណាសម្រាប់ដំណើការទៅរលួននៃចង្វាក់ផលិតកម្មការងារទិសដៅរីកចម្រើនទាំងសងខាង៕

អត្ថបទ៖ វីរៈ