សម្តេច​តេជោ ហ៊ុន សែន ​ចែករំលែក​ ៥​ចំណុច ​​ពាក់ព័ន្ធនឹងតួនាទីរបស់ទ្វីបអាស៊ី នៅក្នុង​ពិភពលោក ដែល​បែកខ្ញែក​​

ការចែករំលែក ​របស់​សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងសុន្ទរកថា ចូលរួមសន្និសីទអន្តរជាតិលើកទី​ ២៧ ស្ដីពី ​​អនាគតរបស់អាស៊ី​ ក្រោម​មូលបទ «ការកំណត់ឡើងវិញ​នូវតួនាទី​របស់​ទ្វីប​អាស៊ី នៅ​ក្នុង​​ពិភព​​លោក ដែ​ល​បែក​ខ្ញែក» តាមរយៈប្រព័ន្ធវីដេអូ នាថ្ងៃទី ​២៧ ខែ​ឧសភា ឆ្នាំ​ ២០២២នេះ។ ​​​

បើតាមសម្តេច​តេជោ ហ៊ុន សែន ៥ចំណុចនោះរួមមាន៖ ​​ទី១, បណ្តា​​ប្រទេសអាស៊ី ត្រូវអំពាវនាវដោយឈរលើគោលជំហររួមគ្នាប្រកបដោយសង្គតិភាព ឱ្យប្រទេសទាំងអស់គោរពអធិបតេយ្យភាព និងឯករាជ្យភាព​គ្នាទៅវិញទៅមក រួមទាំងជម្រើសនៃការ ដឹកនាំដែលស្របតាមលក្ខខណ្ឌ និងលក្ខណៈពិសេសរបស់ប្រទេសនីមួយៗ ទន្ទឹមនេះដែរ ប្រទេស​ទាំងអស់ត្រូវប្រកាន់យកឱ្យបានខ្ជាប់ខ្ជួននូវគោលការណ៍ នៃសន្តិសហវិជ្ជមាន ការមិនជ្រៀតជ្រែក និង​ការគោរពទៅវិញទៅមក នូវជីវភាពរស់នៅ ប្រពៃណី ទំនៀមទំលាប់ និងប្រវត្តិសាស្ត្ររបស់ប្រទេស​នីមួយៗ​។

ទី២, ​ប្រកាន់ខ្ជាប់នូវគោលការណ៍ “ពហុភាគីនិយម” និង”កិច្ចសហប្រតិបត្តិការអន្តរជាតិ ផ្អែកលើវិធាននៃច្បាប់” គឺជាវិធានពីរ ដែលអាស៊ីត្រូវតែបន្តប្រកាន់យក។ យើងមិនត្រូវបណ្ដោយឱ្យ ប្រទេសណាមួយទទួលរងនូវការបន្ទច់បង្អាក់ ក្នុងកិច្ចខិតខំប្រឹងប្រែងអភិវឌ្ឍ តាមរយៈការរងគ្រោះ ដោយការដាក់ទណ្ឌកម្មជាឯកតោភាគី ការហាមឃាត់ ឬ​ការដាក់វិធានការបង្ខិតបង្ខំផ្នែកសេដ្ឋកិច្ច​ផ្សេងៗ ដែលបំពានទៅលើច្បាប់ អន្តរជាតិ​។

ទី៣, បណ្តាប្រទេសអាស៊ីត្រូវតែធ្វើការ​ព្រមគ្នា ដើម្បីជំរុញបន្ថែមទៀតនូវកិច្ចសហប្រតិបត្តិការ ក្នុងតំបន់ ដែលមានលក្ខណៈបើកចំហ មានតម្លាភាព ប្រកបដោយបរិយាបន្ន បំពេញបន្ថែម និងផ្តល់ ផលប្រយោជន៍ឱ្យគ្នាទៅវិញទៅមក​។ តួយ៉ាង​កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ តំបន់ (RCEP) គឺជាគំរូដ៏ល្អបំផុតមួយ នៃប្រព័ន្ធពាណិជ្ជកម្មបើកចំហ ប្រកប​ដោយបរិយាបន្ន ដែល​ផ្អែកលើវិធាននៃច្បាប់ និងឆ្លុះបញ្ចាំង​ពីការប្តេជ្ញាចិត្តពិតប្រាកដរបស់យើង ក្នុងការបង្កើនកិច្ចសហ​ប្រតិបត្តិការក្នុងតំបន់។

ទី៤, ​ត្រូវបន្តរក្សា និងពង្រឹងនូវការឯកភាព និងសាមគ្គីភាពរវាងបណ្តាប្រទេសនានា ក្នុងទ្វីបអាស៊ី ដែលជាគន្លឹះយ៉ាងសំខាន់ក្នុងការលើកកម្ពស់សន្តិភាព សន្តិសុខ ស្ថិរភាព និងការ អភិវឌ្ឍនានា ក្នុងតំបន់ និងពិភពលោក។​

ទី៥, ​ត្រូវ​បន្តខិតខំរួមគ្នាបង្កើនការយកចិត្តទុកដាក់ក្នុងការស្តារ និង​ជំរុញសេដ្ឋកិច្ចតំបន់ ប្រ​កបដោយចីរភាព ភាពធន់ និងបរិយាបន្ន តាមរយៈ៖ ក. ការបន្តកាត់បន្ថយនូវគម្លាតនៃការទទួល បានការចាក់វ៉ាក់សាំងកូវីដ-១៩ ​​ខ. ការបន្តផ្តល់អាទិភាព លើកិច្ចសហប្រតិបត្តិការពង្រឹងប្រព័ន្ធសុខាភិបាល និងប្រព័ន្ធគាំពារសង្គម គ. ការជំរុញបន្ថែមនូវ​ការតភ្ជាប់ និងការធ្វើពិពិធកម្មពាណិជ្ជកម្ម និងការវិនិយោគក្នុងតំបន់ ឃ. ការចាប់​យកកាលានុវត្តភាព ពីបរិវត្តកម្មឌីជីថល និង ង. ការដោះស្រាយ​បញ្ហា នៃការប្រែប្រួលអាកាសធាតុ និង​ការធ្វើអន្តរកាល ថាមពល តាមរយៈការជំរុញហិរញ្ញប្បទានប្រកបដោយចីរភាព និងការវិនិយោគលើហេដ្ឋារចនាសម្ព័ន្ធ បៃតង៕

អត្ថបទ៖ កោះកែវ