សម្ដេចតេជោ ហ៊ុន សែន ៖ ការដំឡើងប្រាក់បៀវត្សរ៍ជូនមន្ត្រីរាជការ នឹងត្រូវចាប់ផ្តើមនៅខែមករាឆ្នាំ ២០២៣

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា ការដំឡើងប្រាក់បៀវត្សរ៍ជូនមន្ត្រីរាជការ និងកងកម្លាំងប្រដាប់អាវុធ នឹងត្រូវចាប់ផ្ដើមធ្វើឡើងនៅខែមករា ឆ្នាំ ២០២៣ខាងមុខ។

សម្ដេចតេជោនាយករដ្ឋមន្ត្រី តាមរយៈទំព័រហ្វេសប៊ុក នៅព្រឹកថ្ងៃទី ១៤ ខែមិថុនានេះ បានសរសេរថា ម្សិលមិញ សម្ដេចបានប្រកាស អំពីការដំឡើងប្រាក់បៀវត្សរ៍ជូនមន្ត្រីរាជការ និងកងកម្លាំងប្រដាប់អាវុធ ក្នុងភាពមិនច្បាស់លាស់អំពីពេលវេលា ដែលបង្កឲ្យមានការភ័ន្តច្រឡំ។

សម្ដេចតេជោ ហ៊ុន សែន បានសរសេរបញ្ជាក់ថា «ខ្ញុំសូមបញ្ជាក់ជូនថាការដំឡើងបៀវត្សរ៍ នឹងត្រូវចាប់ផ្តើមនៅខែមករាឆ្នាំ២០២៣»។

គួររំលឹកថា នៅក្នុងពីធីបិទវគ្គបណ្តុះបណ្តាលឆ្នាំ ២០២០-២០២១ និងបើកវគ្គបណ្តុះបណ្តាលឆ្នាំ ២០​២២ របស់សាលាភូមិន្ទរដ្ឋបាល កាលពីថ្ងៃទី ១៣ ខែមិថុនា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសថា នឹងមានការដំឡើងប្រាក់បៀវត្សរ៍មន្ត្រីរាជការ បន្ទាប់ពីខកខានអស់រយៈពេល ២ឆ្នាំ៕