ពេលវេលាទទួលពាក្យបណ្ដឹង​ជុំវិញការបោះឆ្នោត នឹងត្រូវបញ្ចប់​ត្រឹមល្ងាចថ្ងៃទី ១៧ ខែមិថុនានេះ

អ្នកនាំពាក្យ​ គ.ជ.ប លោក ហង្ស ពុទ្ធា​ បាន​ឲ្យដឹងនៅថ្ងៃនេះថា ​តាម​ប្រតិទិនរបស់ ​គ.ជ.ប​ នឹងឈប់ទទួលពាក្យបណ្ដឹង នៅត្រឹមល្ងាច​ថ្ងៃទី ១៧ ខែមិថុនា ឆ្នាំ ២០២២នេះ ​តែប្រសិនបើ​ដល់​ម៉ោង​កំណត់ នៅ​មាន​បណ្ដឹង គ.ជ.ប​ នឹងពន្យាពេលវេលា ៤ ​ថ្ងៃទៀត ដើម្បីដោះស្រាយទៅលើបណ្ដឹងនោះ​។​

បើតាម​លោក ហង្ស ពុទ្ធា ​​​ក្រោយ​ពី​ការ​​បោះឆ្នោតក្រុមប្រឹក្សាឃុំ-សង្កាត់ ក៏ដូចជាដំណាក់​កាល​បិទផ្សាយលទ្ធផល បណ្តោះអាសន្នបានបញ្ចប់ ​គ.ជ.ប បាន​ទទួលបណ្តឹង​សរុប នៅទូទាំងប្រ​ទេសចំនួនជាង​ ២០០បណ្តឹង។ ក្នុង​នោះ មានបណ្តឹងពាក់ព័ន្ធដំណាក់កាល ឃោសនាបោះឆ្នោត​ចំនួនប្រមាណ ​១០០ បណ្តឹង និងបណ្តឹងពាក់ព័ន្ធនឹងលទ្ធផលបោះឆ្នោតចំនួនជាង ១០០បណ្តឹង។​ លោកថា ​ថ្ងៃនេះជាថ្ងៃចុងក្រោយ នៃការដាក់ពាក្យបណ្តឹងពាក់ព័ន្ធនឹងការបោះឆ្នោត ហើយប្រសិនក្នុងករណីមានការដាក់ពាក្យបណ្តឹងបន្ថែម គ.ជ.ប នឹងពន្យាពេលចំនួន ៤ថ្ងៃ ដើម្បីពិចារណាលើបណ្តឹងទាំងនោះ។​

លោក ហង្ស ពុទ្ធា ​​បញ្ជាក់យ៉ាងនេះថា «សម្រាប់ការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី ៥​នេះ សរុបទាំងដំណាក់កាលឃោសនា ទាំងថ្ងៃមុនឃោសនា ទាំងថ្ងៃ​បោះឆ្នោត បណ្ដឹង​មកគណៈកម្មាធិការជាតិ​រៀប​ចំការបោះឆ្នោត​បានបញ្ចប់ ការដោះស្រាយរួចរាល់ហើយ លើកលែងតែបណ្ដឹងចំនួន ៦ ដែលមិន​ទាន់បានដោះស្រាយ​ នៅគណៈកម្មាធិការជាតិរៀបចំការបោះឆ្នោត»។

បើយោងតាមប្រតិទិនរបស់ ​គ.ជ.ប​ នឹងឈប់ទទួលពាក្យបណ្ដឹងនៅត្រឹមថ្ងៃទី ១៧ ខែមិថុនា ឆ្នាំ ២០២២ វេលាម៉ោងម៉ោង ៥ និង ៣០នាទីល្ងាច។ ដូច្នេះប្រសិនបើ មកដល់ម៉ោងកំណត់នៅមានបណ្ដឹង គ.ជ.ប នឹងពន្យាពេលវេលា ៤ថ្ងៃយ៉ាងយូរបំផុត ដើម្បីដោះស្រាយទៅលើបណ្ដឹង ថា​តើបណ្ដឹងនោះ ត្រូវដោះស្រាយ តាមរបៀបសវនាការសង្ខេប ឬសវនាការសាធារណៈ ឬធ្វើលិខិតជូនដំណឹងយ៉ាងណានោះ អាស្រ័យទៅលើអង្គហេតុ និងអង្គច្បាប់ ដែលត្រូវ​ក្រុម​ប្រឹក្សាជំនុំជម្រះ គ.ជ.ប ​ធ្វើការពិចារណា។​​

គួរបញ្ជាក់ថា ការ​បោះឆ្នោតជ្រើសរើស ក្រុម​ប្រឹក្សាឃុំ-សង្កាត់អាណត្តិទី ៥ បាន​ប្រព្រឹត្តិទៅកាលពីថ្ងៃទី ៥ ខែមិថុនា ឆ្នាំ​ ២០២២ ​ដែលមានគណប្សចំនួន ១៧ បាន​ចូលរួម ហើយ គ.ជ.ប គ្រោងប្រកាសលទ្ធផលផ្លូវការ​នៅថ្ងៃទី ២៦ ខែមិថុនាខាងមុខនេះ។ ប៉ុន្តែលទ្ធផលផ្លូវការ​ អាចនឹងប្រ​កាសមុន​កាលបរិច្ឆេទ ប្រសិនបើការដោះស្រាយ​បាន​បញ្ចប់​ មុនពេលកំណត់៕

អត្ថបទ៖ កោះកែវ