ខេត្តកែប ផ្សព្វផ្សាយនីតិវិធីស្ដង់ដារ (SOP) សម្រាប់អាជីវកម្មវិស័យទេសចរណ៍

នៅព្រឹកថ្ងៃទី២៤​ ខែមិថុនា​ ឆ្នាំ២០២២​ មន្ទីរទេសចរណ៍ខេត្តកែប បានរៀបចំពិធីផ្សព្វផ្សាយជំរុញការអនុវត្តនីតិវិធីស្ដង់ដារអប្បបរមា​(SOP)​តាមគន្លងប្រក្រតីភាពថ្មី សម្រាប់អាជីវកម្មក្នុងវិស័យទេសចរណ៍ និងការចាក់វ៉ាក់សាំង នៅផ្សារក្ដាមខេត្តកែប​ ក្រោមធីបតីភាព​ ឯកឧត្តមបណ្ឌិត​ សោម​ ពិសិដ្ឋ​ អភិបាល​នៃគណអភិបាលខេត្តកែប​។

លោក​ សោម​ ចិន្តា​ ប្រធានមន្ទីរទេសចរណ៍ខេត្ត​បានលេីកឡេីងថា​ អង្គភាពបម្រេីសេវាទេសចរនៅខេត្តកែប​ មានការប្រែប្រួលខ្លាំង​ បន្ទាបពីស្ថានភាពកូវីដ-១៩​ បានធូរស្រាល​។ ​ការអនុវត្តនីតិវិធីស្ដង់ដារអប្បបរមា​(SOP)​តាមគន្លងប្រក្រតីភាពថ្មី សម្រាប់អាជីវកម្មក្នុងវិស័យទេសចរណ៍​ បានធ្វេីអោយខេត្តកែប​មានកំណេីនភ្ញៀវទេសចរណ៍ជាលំដាប់​មកកម្សាន្ត។

លោក​ ម៉ែន​ សុធីរ​ ប្រធានមន្ទីរសុខាភិបាលខេត្ត​បានបញ្ជាក់ថា​ យុទ្ធនាការចាក់វ៉ាក់សាំង ពិតជាមានសារសំខាន់ណាស់​ សម្រាប់ការពារខ្លួនយេីងផ្ទាល់​ និងសង្គមជាតិទាំងមូល​ អោយមានភាពសាំ​ជាមួយជំងឺកូវីដ-១៩​។ សកម្មភាពជម្រុញ​ និង​ការផ្សព្វផ្សាយការអនុវត្តនីតិវិធីស្ដង់ដារអប្បបរមា​(SOP)​តាមគន្លងប្រក្រតីភាពថ្មី បានធ្វេីអោយប្រជាពលរដ្ឋទូទៅ​ នាំគ្នាមកទទួលការចាក់វ៉ាក់សាំង​ បានទាំងអស់គ្នា​។ បន្ថែមពីនេះ​រដ្ឋបាលខេត្ត​ដែលមានមន្ទីរសុខាភិបាលខេត្ត​ កំពុងយុទ្ធនាការចាក់វ៉ាក់សាំងដូសជម្រុញ​ និងដូសទី៥​ ជូនប្រជាពលរដ្ឋ​ដែលដល់ពេលវេលា​ត្រូវចាក់ផងដែរ​។

ថ្លែងក្នុងពិធីនោះ លោក​សោម​ ពិសិដ្ឋ​ អភិបាលខេត្តកែប​មានប្រសាសន៍ថា បន្ទាប់ពីទទួលបានការផ្សព្វផ្សាយ​ពីក្រសួងទេសចរណ៍ ស្តីពីការដាក់ចេញ នូវវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដារអប្បបរមា (SOP) តាមគន្លងប្រក្រតីភាពថ្មី​ សម្រាប់ប្រតិបត្តិករទេសចរណ៍

ទន្ទឹមនឹងការបើកដំណើរការអាជីវកម្មទេសចរណ៍ឡើងវិញនេះ ការដាក់ចេញនូវវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដារអប្បបរមា (SOP) តាមគន្លងប្រក្រតីភាពថ្មីសម្រាប់ វិស័យទេសចរណ៍ នឹងក្លាយជាកត្តាចម្បង ដើម្បីរក្សាបាននូវស្ថេរភាពអាជីវកម្ម និងធានាបាននូវសុវត្ថិភាពភ្ញៀវ ជាតិ-អន្តរជាតិ ដើម្បីប្រែក្លាយពីការគំរាមកំហែងពីជំងឺកូវីដ-១៩ ទៅជាឱកាសសម្រាប់ការលើកកម្ពស់សេវាកម្មទេសចរណ៍ក្នុងខេត្តកែប​។​

លេីសពីនេះ លោក អភិបាល​ខេត្តក៏​បានណែនាំពីអនាម័យបរិស្ថានជុំវិញខ្លួន​ និងសហគមន៍របស់ខ្លួនអោយបានស្អាតល្អ​ ជាពិសេសបងប្អូនដែល​ ដល់វេលាត្រូវទៅទទួលការចាក់វ៉ាក់សាំងនៅមន្ទីរពេទ្យ​ និងមណ្ឌលសុខភាព​ ដែលនៅជិតបំផុត​៕

អត្ថបទ៖ សេង ណារិទ្ធ