ផ្សព្វផ្សាយសេចក្តីប្រកាសកំណត់តំបន់វិនិច្ឆ័យ សម្រាប់ការចុះបញ្ជីដីធ្លីជាលក្ខណៈប្រព័ន្ធ ក្នុងឃុំបន្ទាយមាសខាងលិច ស្រុកបន្ទាយមាស

លោក ជឹង ផល្លា ប្រធានក្រុមប្រឹក្សាខេត្តកំពត កាលពីថ្ងៃអាទិត្យ ទី៣ ខែកក្កដា ឆ្នាំ ២០២២ម្សិលមិញ បានអញ្ជើញជាអធិបតី ក្នុងពិធីផ្សព្វផ្សាយសេចក្តីប្រកាសកំណត់តំបន់ធ្វើការវិនិច្ឆ័យ សម្រាប់ការចុះបញ្ជីដីធ្លីមានលក្ខណៈជាប្រព័ន្ធ ក្នុងភូមិហុងស៊ុយ ភូមិលើ ភូមិត្បាល់កិន ភូមិទង់លាង និងភូមិកន្សោមអក ឃុំបន្ទាយមាសខាងលិច ស្រុកបន្ទាយមាស ខេត្តកំពត។

សូមជម្រាបថា ការចុះបញ្ជីដីធ្លីសរុបទូទាំងខេត្តសម្រេចបានចំនួន ៣៨១ភូមិ ស្មើនឹង ៧,១៧% នៃចំនួន ភូមិសរុប ៤៨៨ ភូមិ ប្រមូលទិន្នន័យសរុបបានចំនួន ៦១៩ ៣៧៤ ក្បាលដី ស្មើនឹង ៧៧,៤២% ចែកបណ្ណជូនប្រជាពលរដ្ឋបានចំនួន ៥១៣ ៥១៩បណ្ណ ស្មើនឹង៦៤,១៩% នៃក្បាលដីប៉ាន់ស្មានសរុប ៨០០ ០០០ក្បាលដី។

ដោយឡែកនៅស្រុកបន្ទាយមាស មានឃុំចំនួន ១៥ ភូមិចំនួន ៨៨ មានផ្ទៃដីទំហំ ៤០៤០៩ ហិកតា និង មានក្បាលដីប៉ាន់ស្មានប្រមាណ ១៣២០០០ ក្បាលដី បានចាប់ដំណើរការធ្វើការចុះបញ្ជីដីធ្លីមានលក្ខណៈជាប្រព័ន្ធ ចាប់ពីឆ្នាំ ២០០៩ គិតមកដល់បច្ចុប្បន្នមានរយៈពេល ១៣ ឆ្នាំហើយ ដោយបានចុះបញ្ជីរួចចំនួន ៦២ ភូមិ ស្មើនឹង ៧០,៤៥% មិនទាន់ចុះបញ្ជី ២៦ភូមិ។

សម្រាប់ឃុំបន្ទាយមាសខាងលិចនេះ មានចំនួន ០៥ភូមិ គឺភូមិហុងស៊ុយ ភូមិព្រៃលើ ភូមិត្បាល់កិន ភូមិទង់លាង និងភូមិកន្សោមអក ដែលត្រូវធ្វើការប្រកាសកំណត់តំបន់ធ្វើការវិនិច្ឆ័យនៅថ្ងៃនេះ មានផ្ទៃដីសរុបចំនួន ៤០៤៧,៩៣ ហិកតា។ ក្នុងនោះ ដីស្រែមានចំនួន ៤០១២,៩៣ ហិកតា ដីចម្ការមាន ២០ ហិកតា និងដីលំនៅឋានមាន ១៥ ហិកតា ហើយមានក្បាលដីប៉ាន់ស្មានសរុបចំនួន ៥៣០៨ ក្បាលដី ស្មើនឹង១ ៣២៧ គ្រួសារ៕

អត្ថបទ៖ សេង ណារិទ្ធ