រដ្ឋបាលស្រុកល្វាឯម ទុកពេល០២សប្តាហ៍ឱ្យរុះរើស្លាកផ្សព្វផ្សាយពាណិជ្ជកម្មដែលគ្មានច្បាប់អនុញ្ញាត និងហួសសុពលភាព

អាជ្ញាធរស្រុកល្វាឯម និង ធ្វើការរុះរើរបារកាត់ទទឹងផ្លូវ ផ្ទាំងប៉ាណូ និងស្លាកផ្សាយពាណិជ្ជកម្មភេសជ្ជៈ និងគ្រឿងស្រវឹងគ្រប់ប្រភេទ ដែលគ្មានច្បាប់អនុញ្ញាត និងហួសសុពលភាព ក្នុងភូមិសាស្ត្រស្រុកល្វាឯម ខេត្តកណ្តាល។

រដ្ឋបាលស្រុកល្វាឯម ជូនដំណឹងដល់ម្ចាស់អាជីវកម្ម ភោជនីយដ្ឋាន អាហារដ្ឋាន ផ្ទះលក់ភេសជ្ជៈ និងក្រុមហ៊ុនចែកចាយស្រាបៀរទាំងអស់ក្នុងភូមិសាស្ត្រស្រុក កន្លងមករដ្ឋបាលស្រុក បានសង្កេតឃើញ មានការតម្លើងផ្ទាំងផ្សព្វផ្សាយពាណិជ្ជកម្មភេសជ្ជៈគ្រប់មុខ និងស្រាបៀរជាច្រើន (គ្មានច្បាប់អនុញ្ញាត និងហួសសុ ពលភាព) ក្នុងបណ្តាឃុំទាំង១០ ពិសេសនៅតាមចិញ្ចើមផ្លូវសាធារណៈ ធ្វើឱ្យបាត់បង់នូវ សោភ័ណ្ឌភាព សេចក្តីថ្លៃថ្នូរ របៀបរៀបរយ និងសណ្តាប់ធ្នាប់សាធារណៈក្នុងមូលដ្ឋានស្រុក។

ដើម្បីរក្សាបានសណ្តាប់ធ្នាប់ របៀបរៀបរយល្អ ជាពិសេសលើកកម្ពស់សេចក្តីថ្លៃថ្នូរ រដ្ឋបាលស្រុក សូមស្នើឱ្យ លោក-លោកស្រី ជាម្ចាស់អាជីវកម្ម ក្រុមហ៊ុនចែកចាយភេសជ្ជៈ និងស្រាបៀរទាំងអស់ ដែលមានការដាក់តាំង ផ្សព្វផ្សាយពាណិជ្ជកម្មនៅខាងមុខហាង ឬជាយីហោហាងគ្រប់ប្រភេទនៅលើចិញ្ចើមផ្លូវសាធារណៈ ដែលគ្មានច្បាប់ អនុញ្ញាត និងហួសសុពលភាព ត្រូវធ្វើការរុះរើចេញជាបន្ទាន់ ដោយទុករយៈពេល០២សប្តាហ៍ គិតចាប់ពីថ្ងៃជូន ដំណឹងនេះតទៅ។

ក្នុងករណីផុតកាលបរិច្ឆេទកំណត់ខាងលើ គ្រប់ម្ចាស់អាជីវកម្ម ក្រុមហ៊ុនចែកចាយភេសជ្ជៈ និងស្រាបៀរទាំង អស់ ដែលមិនបានធ្វើការរុះរើ រដ្ឋបាលស្រុក នឹងចាត់នីតិវិធីរដ្ឋបាលធ្វើការរុះរើ ដោយបន្ទុកចំណាយ និងរាល់ការខូច ខាតគ្រប់ប្រភេទ ម្ចាស់អាជីវកម្មទាំងអស់ជាអ្នកទទួលខុសត្រូវ។

ជាមួយគ្នានេះ រដ្ឋបាលស្រុក ក៏កោតសសើរចំពោះការចូលរួមសហការពីបណ្ដាម្ចាស់អាជីវកម្ម ភោជនីយដ្ឋាន អាហារដ្ឋាន និងផ្ទះលក់ភេសជ្ជៈមួយចំនួន ដែលបានរុះរើដោយស្ម័គ្រចិត្ត បង្ហាញពីគម្រូដ៏ល្អសម្រាប់ ប្រជាពលរដ្ឋដទៃក្នុងស្រុកល្វាឯម៕