ព័ត៌មានជាតិ

នគរបាលខណ្ឌមានជ័យ ចុះផ្សព្វផ្សាយបញ្ហាគ្រឿងញៀន ក្មេងទំនើង បារីអេឡិចត្រូនិក ដល់សិស្សបឋមសិក្សាភូមិឫស្សី ជិត ១ ពាន់នាក់

បានផុស

៥ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

នគរបាលខណ្ឌមានជ័យ សហការជាមួយ រដ្ឋបាលសង្កាត់ស្ទឹងមានជ័យទី ២ បន្តចុះផ្សព្វផ្សាយផលប៉ះពាល់បញ្ហាគ្រឿងញៀន ក្មេងទំនើង និង បារីអេឡិចត្រូនិក ដល់សិស្សានុសិស្សជិត ១ ពាន់នាក់ នៅសាលាបឋមសិក្សាភូមិឫស្សី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីវេលាម៉ោង ៨ ព្រឹក ថ្ងៃទី ១៨ ខែកុម្ភៈ ឆ្នាំ ២០២៦ នេះ នគរបាលខណ្ឌមានជ័យ សហការជាមួយរដ្ឋបាលសង្កាត់ស្ទឹងមានជ័យទី ២ បានបន្តចុះផ្សព្វផ្សាយផលប៉ះពាល់ នៃការប្រើប្រាស់សារធាតុញៀន បារីអេឡិចត្រូនិក បញ្ហាក្មេងទំនើង ទៅកាន់សិស្សានុសិស្ស ដើម្បីជៀសឲ្យឆ្ងាយពីបញ្ហាទាំងអស់នេះ នៅចំណុចសាលាបឋមសិក្សាភូមិឫស្សី ផ្លូវ ២១៧ ភូមិឫស្សី សង្កាត់ស្ទឹងមានជ័យទី ២ ខណ្ឌមានជ័យ រាជធានីភ្នំពេញ។

លោកវរសេនីយ៍ត្រី តឹក បូរិន មេប៉ុស្តិ៍ស្ទឹងមានជ័យទី ២ បានឲ្យដឹងថា ដោយអនុវត្តតាមទិសដៅរបស់លោកឧត្ដមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ កម្លាំងប៉ុស្តិ៍នគរបាលរដ្ឋបាលស្ទឹងមានជ័យទី ២ សហការជាមួយ លោកចៅសង្កាត់ ទូច សំអុល និង លោកគ្រូនាយកសាលា បានចុះធ្វើវេទិកាផ្សព្វផ្សាយអំពី ភូមិ ឃុំ សង្កាត់ មានសុវត្ថិភាព ផលប៉ះពាល់ នៃគ្រឿងញៀន បារីអេឡិចត្រូនិក និងក្មេងទំនើង ជូនដល់សិស្សានុសិស្សចំនួន ៩៦០ នាក់ ក្នុងនោះ សិស្សស្រី ៤៧៥ នាក់ ដើម្បីបញ្ជ្រាបការយល់ដឹងឲ្យបានប្រសើរ ជៀសវាងដើរផ្លូវខុស ប្រឈមការដាក់ទោសទណ្ឌចំពោះមុខច្បាប់។

មេប៉ុស្តិ៍ស្ទឹងមានជ័យទី ២ ក៏បានអំពាវនាវដល់អាណាព្យាបាលសិស្សគ្រប់រូប ត្រូវត្រួតពិនិត្យការសិក្សារបស់កូនៗ និងទូន្មានជៀសឲ្យឆ្ងាយពីគ្រឿងញៀន ដើម្បីក្លាយជាកូនល្អសម្រាប់គ្រួសារ និងក្លាយជាយុវជនគំរូរបស់សង្គម៕

អត្ថបទ ៖ រដ្ឋា