សម្ដេច ហេង សំរិន ដឹកនាំកិច្ចប្រជុំគណៈកម្មាធិការ​​អចិន្ត្រៃយ៍​​រដ្ឋសភា​ ដើម្បីពិភាក្សា និងអនុម័តលើរបៀបវារៈមួយចំនួន

សម្ដេចអគ្គមហា​​ពញា​ចក្រី ហេង សំរិន ប្រធាន​រដ្ឋសភា នៅព្រឹកថ្ងៃ​ទី ២៥ ខែកក្កដា ឆ្នាំ ​២​០២២នេះ បានដឹកនាំកិច្ចប្រជុំគណៈកម្មាធិការ​​អចិន្ត្រៃយ៍​​រដ្ឋសភា ​ដើម្បីពិភាក្សា និងអនុម័តលើរបៀបវារៈមួយចំនួនដូចជា៖

​១- ពិនិត្យលើសំណើសុំបញ្ចូលក្នុងរបៀបវារៈ សម័យប្រជុំ​រដ្ឋសភា​​លើក​ទី ៧ នីតិកាលទី ៦ ដែលមានដូចខាងក្រោម៖

​- សេចក្តីព្រាងច្បាប់ធម្មនុញ្ញ ស្តីពី វិសោធនកម្មមាត្រា ១៩ ថ្មី (មួយ) មាត្រា ៨៩ មាត្រា ៩៨ ថ្មី មាត្រា ១០២ ថ្មី មាត្រា ១១៩ ថ្មី (មួយ) និងមាត្រា ១២៥ ថ្មី នៃរដ្ឋធម្មនុញ្ញ​នៃព្រះរាជាណាចក្រកម្ពុជា និង​មាត្រា ៣ ថ្មី និងមាត្រា ៤ ថ្មី នៃច្បាប់ធម្មនុញ្ញបន្ថែមសំដៅធានានូវដំណើរការជា ប្រក្រតីនៃស្ថាប័នជាតិ។

​- សេចក្តីព្រាងច្បាប់ ស្តីពី ការអនុម័តយល់ព្រមឲ្យព្រះរាជាណាចក្រ​កម្ពុជា​ចូលជា​ភាគី នៃអនុសញ្ញា ស្តីពី ជំនួយក្នុងករណីមានគ្រោះមហន្តរាយនុយក្លេអ៊ែរ ឬគ្រោះអាសន្ន​វិទ្យុ​សកម្ម។

​​- សេចក្តីព្រាងច្បាប់ ស្តីពី ការគ្រប់គ្រងចំណូលមិនមែនសារពើពន្ធ។

​- សេចក្តីព្រាងច្បាប់ស្តីពី ការអនុម័តយល់ព្រមលើ​៖ កិច្ចព្រមព្រៀងរវាងរាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល ​នៃតំបន់​សេដ្ឋកិច្ច​ពិសេសម៉ាកាវ នៃសាធារណរដ្ឋប្រជាមានិតចិន ស្តីពី ការលុបបំបាត់ការយកពន្ធត្រួតគ្នា ​ពាក់ព័ន្ធ​នឹងពន្ធលើប្រាក់ចំណូល និងការបង្ការការគេចវេះពន្ធ និងការចៀសវាងពន្ធ។ និងកិច្ចព្រមព្រៀងរវាងរាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល នៃ​សាធារណរដ្ឋតួកគី ស្តីពី ការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធ ពាក់ព័ន្ធ​នឹង​ពន្ធលើប្រាក់ចំណូល។

​២- ការពិនិត្យ​ និងសម្រេចសេចក្តីព្រាងរបៀបវារៈចំនួន ៥​ និង កំណត់កាលបរិច្ឆេទបន្តសម័យប្រជុំរដ្ឋសភា លើកទី ៧ នីតិកាលទី ៦​៕