​មន្ទីរពេទ្យ​តេជោសន្ដិភាព​នឹងក្លាយជាមន្ទីរពេទ្យជាតិធំជាងគេ​មានសមត្ថភាពទទួលអ្នកជំងឺ​ជាង ៩ ពាន់នាក់​

មន្ទីរពេទ្យតេជោសន្តិភាពស្ថិតនៅ​ភូមិ​កប់ស្រូវធំ សង្កាត់​គោករកា ខណ្ឌ​ព្រែកព្នៅ ​រាជធានីភ្នំពេញដំណើរការសាងសង់សម្រេចបានជាង ៦០ ភាគរយ ហើយគ្រោងសម្ពោធដាក់ឱ្យប្រើប្រាស់នៅដើមឆ្នាំក្រោយ។ នេះបើតាមលោកស្រី យក់ សម្បត្តិ រដ្ឋលេខាធិការ និងជាអ្នកនាំពាក្យក្រសួងសុខាភិបាល។

លោកស្រី យក់ សម្បត្តិបានថ្លែងឱ្យដឹងនៅថ្ងៃទី ​១៥ ខែកញ្ញា ឆ្នាំ ២០២២នេះថា សម្ដេចតេជោ ហ៊ុន សែន នាយករដ្ឋមន្ត្រីកម្ពុជា​បានរៀបចំឱ្យមានមន្ទីរពេទ្យដ៍ធំមួយទៀតបំពាក់គ្រែចំនួន ៩ ពាន់គ្រែ និង​មានសមត្ថភាពទទួលអ្នកជំងឺរហូតដល់ជាង ៩ ពាន់នាក់។

លោកស្រី យក់ សម្បត្តិអះអាងថា ​មន្ទីរពេទ្យនេះនឹងក្លាយទៅជាមន្ទីរពេទ្យ​ជាតិ​ធំជាងគេបម្រើសេវាជាច្រើនដូចជាសេវាសង្គ្រោះបន្ទាន់ វះកាត់ជាដើម។ មន្ទីរពេទ្យតេជោសន្តិភាពបានបើកការរដ្ឋានសាងសង់នៅថ្ងៃទី ១៤ ខែកុម្ភៈ ឆ្នាំ ២០២២នេះ ហើយសម្រេចបានជាង ៦០ ភាគរយ គិតត្រឹមថ្ងៃទី ១៥ កញ្ញានេះ។

លោកស្រី យក់ សម្បត្តិរំពឹងថា ពេលវេលាបើកសម្ពោធដំណើការ​អាចនឹងត្រូវធ្វើឡើងនៅខែមេសា ឆ្នាំ ២០២៣ ​ ហើយមន្ទីរពេទ្យនេះ អាចនឹងជួយទប់ស្កាត់បងប្អូនប្រជាពលរដ្ឋនៅស្រុកពញាឮ ខេត្តកណ្ដាល និងនៅកំពង់ស្ពឺ ព្រំប្រទល់ខេត្តកណ្ដាលមិនឱ្យមកប្រជ្រៀតគ្នានៅរាជធានីភ្នំពេញ៕

អត្ថបទ៖ ឡេង ដេត