ស្រ្តី ៣ នាក់ បង្ហើប​ចំណូល​ពី​​របរ​លក់​តាម​ផ្លូវ

មិនថាជាអ្នកលក់ផ្លែឈើ ប្រហិត បុកល្ហុង ភេសជ្ជៈ ម្ជូរ ឬអ្វីផ្សេង អ្នក​ដំណើរ​នឹង​ប្រទះឃើញជា​ញឹកញាប់​នៅ​តាមដង​ផ្លូវ​។ មុខ​របរ​ក្រោម​កម្តៅ​ថ្ងៃនេះ បាន​ជួយ​ដោះស្រាយជីវភាព​​ស្រ្តី​ ៣ នាក់ ដែលប្រកប​រប្រើកម្លាំង​ប្តូរ​ចំណូល​ផ្គត់ផ្គង់​គ្រួសារ។

អ្នកស្រី ចន្ទី ដែលបានដាក់តូប​លក់​ប្រហិត​ក៏ដូចជាភេសជ្ជៈគ្រប់មុខនៅមុខសាលាបឋមសិក្សាស្ទឹងមានជ័យ​បានឲ្យដឹងថា ក្នុងមួយថ្ងៃអ្នកស្រី​អាចរក​បានចំណូលបាន​ប្រមាណជិត ២០ម៉ឺនរៀល និង​ថ្ងៃខ្លះ​អាចបានលើសនេះ។

អ្នកស្រីអះអាង​ថា ​​មុខ​របរ​លក់តិច​តួច​តាម​ផ្លូវ​នេះ អាចជួយផ្គត់ផ្គង់សេដ្ឋកិច្ចនៅក្នុងគ្រួសារបានមួយផ្នែក ព្រោះលុយដែលលក់បានអាចផ្តល់ទៅដល់សិក្សា​កូន​រៀនសូត្រ។

ស្រ្តី​ដែលមាន​កូន​ច្រើននាក់ក្នុង​បន្ទុក​រូប​នេះ​បន្ត​ថា« ទោះខ្ញុំលក់បែបនេះវាទទួលបានចំណូលមិនសូវច្រើនដូចគេ តែវាជាការងារសុច្ចរិត មិនបានទៅលួច​ប្លន់​អ្នកណា​ ហើយចំណូលនោះក៏សមស្រប​ក្នុងមួយថ្ងៃៗ»។

ស្រ្តី​មួយ​រូបទៀត​ដែលជាអ្នកលក់ផ្លែឈើនៅតាមដងផ្លូវ​​បានឲ្យដឹងថា អ្នកស្រីលក់ផ្លែឈើមួយថ្ងៃចំណាយដើមទុនពី ៦០ ទៅ ៧០ម៉ឺន និង​បាន​ចំណូល​មក​វិញពី ៨០ ទៅ ៩០ម៉ឺនរៀល​ក្នុង​មួយ​ថ្ងៃ។

អ្នកស្រី នុន ដែល​ទើបតែចាប់ផ្តើមលក់បានប្រហែល ៥ ទៅ ៦ខែ​ដែលមានលក់​ផ្លែឈើជាច្រើន​មុខ​បញ្ជាក់​​ថា «ថ្ងៃធម្មតាអាច​លក់បានត្រឹម ៨០ ម៉ឺនរៀល ប៉ុន្តែប្រសិនជាថ្ងៃសីល អាចលក់បានក្នុងមួយថ្ងៃពី ១ លានរៀន ឬលើសនេះ»។

អ្នកលក់ផ្លែឈើរូបនេះ​បានប្រាប់ថា ចំណូលពីការលក់​ដូរ​ប្រចាំថ្ងៃ អាចជួយសម្រួលដល់សេដ្ឋកិច្ចអ្នកស្រីបានល្អប្រសើរមួយកម្រិតទៀត។

ចំណែក​ស្រ្តី​ម្នាក់​ទៀតឈ្មោះ មុំ ដែលរុញរទេះ​លក់ម្ជូរនៅតាមផ្លូវតាំងពីម៉ោង ៧ ព្រឹក រហូតដល់ម៉ោង​ ៧យប់ឲ្យ​ដឹង​ថា របរ​រាល់ថ្ងៃ​នេះ​លំបាកខ្លាំង ទាំងក្តៅទាំងហត់ តែក៏​ត្រូវ​ធ្វើប្រចាំថ្ងៃ ដើម្បីទទួលបានចំណូលមកផ្គត់ផ្គង់ជីវភាពគ្រួសារ។

បើតាមស្រ្តី​រូប​នេះបាន​លើក​ពី​ចំណូលប្រចាំថ្ងៃថា «វាទទួលបានទៅតាមថ្ងៃ ព្រោះត្រូវរុញដើរលក់ ថ្ងៃខ្លះក៏លក់អស់ ថ្ងៃខ្លះក៏លកមិនអស់ ហើយចំណូលបានត្រឹមមួយថ្ងៃពី ១០ ម៉ឺន ទៅ ១៥ ម៉ឺនប៉ុណ្ណោះ»៕

ដោយ៖ ឌឿនចាន់​ ថារី