អភិបាលខេត្តកោះកុង ដាស់តឿនដល់រដ្ឋបាលស្រុក និងឃុំក្នុងស្រុកមណ្ឌលសីមា ពន្លឿនការធ្វើរបាយការណ៍ ៥ឆ្នាំរំកិល

លោកស្រីអភិបាលខេត្តកោះកុង បានដាស់តឿនដល់អភិបាលស្រុកថ្មី និងរដ្ឋបាលឃុំក្នុងស្រុកមណ្ឌលសីមា ចាំបាច់ពន្លឿនការងាររៀបចំធ្វើរបាយការណ៍ ៥ឆ្នាំរំកិល ដើម្បីបញ្ចូនមករដ្ឋបាលខេត្តពិនិត្យសម្រេច មុនបន្តបញ្ចូនទៅក្រសួងមហាផ្ទៃ។

របាយការណ៍អភិវឌ្ឍន៍វិនិយោគ ៥ឆ្នាំរំកិល រដ្ឋបាលក្រុងស្រុកឃុំ-សង្កាត់ ចាំបាច់ត្រូវតែអនុវត្តឲ្យបានទាន់ពេលវេលាកំណត់ របស់ក្រសួងមហាផ្ទៃបានដាក់ចេញ ដែលជាទូទៅធ្វើបានមុនខែមីនា មកដល់ជារៀងរាល់ឆ្នាំ។

ដើម្បីចៀសវាងនៃភាពយឺតយ៉ាវ លើដំណើរការពិនិត្យសម្រេចរបស់រដ្ឋបាលខេត្ត លោកស្រី មិថុនា ភូថង អភិបាលខេត្តកោះកុង ក៏បានក្រើនរម្លឹកជាថ្មីម្តងដល់រដ្ឋបាលស្រុកមណ្ឌលសីមា និងរដ្ឋបាលឃុំ ត្រូវពន្លឿនកិច្ចការធ្វើរបាយការណ៍ ៣ឆ្នាំ ឬ ៥ឆ្នាំរំកិលឲ្យបានឆាប់រហ័សទាន់ពេលវេលា មុននឹងបញ្ជូនមករដ្ឋបាលខេត្តពិនិត្យសម្រេច បន្ទាប់មកបន្តបញ្ចូនទៅក្រសួងមហាផ្ទៃ។

លោកស្រីអភិបាលខេត្ត អះអាងថា ករណីបញ្ចូនរបាយការណ៍ ៣ឆ្នាំ ឬ ៥ឆ្នាំរំកិលទៅក្រសួងមហាផ្ទៃយឺតយ៉ាវ បណ្តាឃុំសង្កាត់ ឬរដ្ឋបាលក្រុងស្រុកមួយចំនួន ពុំបានទទួលថវិកាមកប្រើប្រាស់បម្រើដល់ការអភិវឌ្ឍន៍មូលដ្ឋាននោះទេ អាចថារំលងទៅ ១ឆ្នាំបន្តបន្ទាប់ទៀត។ ទន្ទឹមនោះដែរ លោកស្រី មិថុនា ភូថង ក៏បង្ហាញក្តីជឿជាក់ថា លោក សុខ ភិរម្យ ជាអភិបាលថ្មីស្រុកមណ្ឌលសីមា នឹងអនុវត្តតួនាទីភារកិច្ចរបស់ខ្លួនប្រកបដោយចំណេះដឹងសមត្ថភាព បទពិសោធន៍ការងារ ក្រមសីលធម៌វិជ្ជាជីវៈ ស្របតាមបទដ្ឋាននានាអនុលោម ដែលរាជរដ្ឋាភិបាលផ្តល់ទំនុកចិត្តមកឲ្យ។

បញ្ហានេះដែរ ត្រូវបានលោក សុខ ភិរម្យ អភិបាលស្រុកមណ្ឌលសីមាថ្មី ទទួលយកទៅអនុវត្តឲ្យមានប្រសិទ្ធភាព តបនឹងការពន្យល់ណែនាំរបស់រដ្ឋបាលខេត្តកោះកុង ដោយសន្យាថា ពុះពារគ្រប់បញ្ហាដើម្បីដោះស្រាយបានទាន់ពេលវេលា ឈរលើស្មារតីទំនួលខុសត្រូវលើការងារភារកិច្ច។

សម្រាប់កិច្ចការងារ និងវិស័យអាទិភាពរបស់លោក សុខ ភិរម្យ បានអះអាងថា លោកនឹងផ្តោតលើការពង្រឹងអភិវឌ្ឍន៍ និងផ្តល់សេវារដ្ឋបាលសាធារណៈបានទាន់ពេលវេលា និងតម្លាភាព ដោយលុបបំបាត់អំពើពុករលួយ នៅតាមច្រកចេញចូលតែមួយស្រុក។ ចំពោះបរិស្ថានអនាម័យសោភ័ណ្ឌភាពដោយទាមទារឲ្យភាពស្អាតល្អនៅក្នុងសហគមន៍ ទោះបីជាមានក្រុមហ៊ុនវិនិយោគចូលរួមសហការប្រមូល និងដឹកជញ្ចូនសំរាម ក៏ដោយ។

រីឯយុទ្ធនាការចាក់វ៉ាក់សាំងវិញ បង្កើនការកៀរគរប្រជាពលរដ្ឋបន្តមកចាក់វ៉ាក់សាំង នៅតំបន់ឆ្ងាយដាច់ស្រយោល និងកសាងហេដ្ឋារចនាសម្ព័ន្ធនានា ក្នុងមូលដ្ឋាន៕

អត្តបទ៖ សិរីវឌ្ឍនៈ