សម្ដេចតេជោ សង្ឃឹមថា មិនមានការវាយប្រហាររាជរដ្ឋាភិបាលថា កេងចំណេញនយោបាយ ពាក់ព័ន្ធនឹងកម្មវិធីឧបត្ថម្ភប្រាក់ជូនពលរដ្ឋឡើយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងបង្ការទុកមុនដោយសង្ឃឹមថា បណ្ដាគណបក្សនយោបាយ និងអង្គការសង្គមស៊ីវិល មិនវាយប្រហាររាជរដ្ឋាភិបាលថា កេងចំណេញនយោបាយ ក្រោយពីបន្តដាក់ចេញកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងកូវីដ និងការរៀបចំ និងដាក់ឲ្យដំណើរការកម្មវិធីឧបត្ថម្ភសាច់ប្រាក់ ជូនគ្រួសារងាយរងហានិភ័យ ក្នុងអំឡុងពេល​មានសម្ពាធអតិផរណ នោះឡើយ។

នៅក្នុងពិធីបើកសន្និសីទ «ចក្ខុវិស័យកម្ពុជាឆ្នាំ ២០២២» ក្រោមមូលបទ «ការស្តារកម្ពុជាឡើងវិញ៖ ការអភិវឌ្ឍប្រកបដោយនិរន្តរភាព បន្ទាប់ពីវិបត្តិជំងឺកូវីដ-១៩» នាព្រឹកថ្ងៃទី ៦ ខែតុលានេះ សម្ដេចតេជោ ហ៊ុន សែន បានថ្លែងដោយសង្ឃឹមថា បណ្ដាគណបក្សនយោបាយ និងអង្គការសង្គមស៊ីវិល មិនយកបញ្ហាដែលរាជរដ្ឋាភិបាល បន្តអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងកូវីដ និងការរៀបចំ និងដាក់ឲ្យដំណើរការកម្មវិធីឧបត្ថម្ភសាច់ប្រាក់ ជូនគ្រួសារងាយរងហានិភ័យ ក្នុងអំឡុងពេលមានសម្ពាធអតិផរណ ថាជាការកេងចំណេញនយោបាយនោះឡើយ។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ហើយសង្ឃឹមថា បណ្ដាបក្សនយោបាយនានា និងសង្គមស៊ីវិល មិនយកបញ្ហានេះធ្វើជាអាវុធវាយរដ្ឋាភិបាលថា រៀបចំគម្រោងបន្តផ្ដល់សាច់ប្រាក់សម្រាប់អ្នករងគ្រោះដោយសារកូវីដ បន្ថែមទៅដោយត្រៀមបម្រុងដើម្បីអន្តរាគមន៍ សម្រាប់ផលប៉ះពាល់ទៅលើអតិផរណាថា ជាការកេងខាងនយោបាយ»។

សម្ដេចតេជោនាយករដ្ឋមន្ត្រី បានបញ្ជាក់ថា ការលើកឡើងខាងលើនេះ គឺគ្រាន់តែជាការបង្ការទុកមុនតែប៉ុណ្ណោះ ហើយសម្ដេចសង្ឃឹមថា មន្ត្រីពាក់ព័ន្ធនឹងត្រូវធ្វើជំរឿនជាបន្ទាន់ ជាពិសេសក្រសួងផែនការ ទៅលើប្រជាជនមានលក្ខណៈ សម្បត្តិ ដែលអាចទទួលបានការឧបត្តម្ភសាច់ប្រាក់ ក្នុងកម្មវិធីរបស់រាជរដ្ឋាភិបាលទាំងពីរ ខាងលើនេះ៕

អត្ថបទ៖ ឃួន សុភ័ក្រ