អ្នកចាត់ការក្លិប វិសាខា ថា រដូវកាលនេះដាក់ផែនការធំ ឈ្នះពាន​ទាំង លីគ និង Hun Sen Cup

អគ្គលេខាធិការក្លិប វិសាខា លោក ហុក សុចិត្រា បានបង្ហើបអំពីផែនការរបស់ក្លិបរដូវកាលនេះ ដោយដាក់គោលដៅធំចង់ឈ្នះទាំងពានលីគកំពូលកម្ពុជា Cambodian Premier League និងពានរង្វាន់សម្តេចតេជោ ហ៊ុន សែន។

ថ្លែងប្រាប់សារព័ត៌មាន «កម្ពុជាថ្មី» លោកហុក សុចិត្រា ថា ៖«ពីរដូវកាលមុនមកដល់រដូវកាលនេះ យើងមានបញ្ហាតិចតួច​ពី​ការរៀបចំក្រុម។ ចំណុចនេះ វាធ្វើឱ្យយើងមិនទទួលបានលទ្ធផលល្អ ដូចអ្វីដែលយើងចង់បាន។ សម្រាប់ឆ្នាំនេះយើងបាន​រៀបចំ ហើយយើងមានការផ្លាស់ប្តូរ និងដោះស្រាយនូវរាល់បញ្ហា ដែលកើតឡើង។ យើងនឹងរៀបចំក្រុមមួយដ៏ល្អនៅឆ្នាំនេះ គឺយើងមានការនាំចូលកីឡាករថ្មី ២ ទៅ ៣ នាក់។ ចំណែកក្រុមការងារគ្រូបង្វឹក ក៏មានការរៀបចំថ្មី»។

អតីតខ្សែប្រយុទ្ធក្រុមជម្រើសជាតិ កម្ពុជា វ័យ ៥១ ឆ្នាំបានមានប្រសាសន៍បន្តថា ៖«សង្ឃឹមថា រយៈពេលនៃការប្រមូលផ្តុំ ហ្វឹកហាត់ ការ​រៀបចំក្រុមរបស់យើងសម្រាប់ត្រៀមរដូវកាលនេះ ក្នុងរយៈពេល​ជិត ២ នេះ នឹង​បានល្អ…។ ព្រោះរដូវកាលនេះ យើងត្រូវការដាក់គោលដៅខ្ពស់សម្រាប់ការប្រកួតរដូវកាល ២០២៥-២០២៦ គឺពួកយើងមានគោលដៅខ្ពស់ ដើម្បីឈ្នះពានលីគ និងពានសម្តេចតេជោ ហ៊ុន សែន ។ វា​ជាគោលដៅ ដែល​យើងចង់បានកៅអី ឡើងទៅលេងការប្រកួត​អន្តរជាតិតំណាងឱ្យប្រទេស»។

តាមប្រសាសន៍របស់លោក ហុក សុចិត្រា បានលើកឡើង គឺ ក្លិបវិសាខាបានមមារញឹកខ្លាំងក្នុងការរៀបចំក្រុមសម្រាប់រដូវកាលថ្មី ២០២៥-២០២៦ ពោលទាំងការនាំចូលកីឡាករថ្មី និងការរៀបចំក្រុមការងារគ្រូបង្វឹក។ រដូវកាលនេះ ក្លិបមានគោលដៅធំ ដោយចង់ឈ្នះទាំងពានលីគ និងពានសម្តេចតេជោ ហ៊ុន សែន។ ក្លិបបានដាក់គោលដៅធំបែបនេះ គឺដើម្បីអាចដណ្តើម​កៅអីឡើងទៅលេងពានអន្តរជាតិ ដែលជាពានកម្រិតទី ២ ប្រចាំទ្វីបអាស៊ី AFC Champions League Two នៅរដូវកាលក្រោយ។

គួរឱ្យដឹងថា រដូវកាលនេះក្លិបវិសាខា បានធ្វើការរុះរើក្រុមគួរឱ្យកត់សម្គាល់ តាមរយៈការបញ្ចេញកីឡាករមួយចំនួន ហើយបាននាំចូលកីឡាករថ្មីវិញ។ ជាពិសេសកីឡាករបរទេស ៣ នាក់សុទ្ធតែមានគុណភាព ដូចជាកីឡាករ Breno Caetano, Benson Omala និងខ្សែប្រយុទ្ធ Nana Kwame។ ចំណែកគ្រូបង្វឹកវិញ ក៏បានផ្លាស់ប្តូរផងដែរ ដោយសម្រេចតែងតាំងគ្រូបង្វឹកថ្មីសញ្ជាតិ អង់គ្លេស លោក Gerard Jones ដើម្បីមកដឹកនាំ៕

អត្ថបទ៖ សេម កុសល