ចូលពេទ្យ ៥ថ្ងៃ តែអាការ:នាយ តាក់ស៊ី នៅមិនទាន់ធូរស្បើយដូចដើមវិញទេ

កាលពីថ្មីៗនេះទស្សនិកជននិងអ្នកគាំទ្រ បានបង្ហាញការភ្ញាក់ផ្អើលបន្ទាប់ពីឃើញតារាកំប្លែង នាយ តាក់ស៊ី ត្រូវបានភរិយាដឹកចូលសង្គ្រោះបន្ទាន់នៅមន្ទីពេទ្យ ខណ:តារាកំប្លែងជើងចាស់រូបនេះបានកើតអាការ:ក្តៅញ៉ាក់ញ័រខ្លាំង បណ្តាលមកពីកើតបូសលើដងខ្លួន។

ទោះបីយ៉ាងណាគិតមកដល់ពេលនេះនាយ តាក់ស៊ី បានចូលព្យាបាលនៅមន្ទីពេទ្យលោកសង្ឃមានរយ:ពេលប្រមាណ៥ថ្ងៃទៅហើយ ប៉ុន្តែស្ថានភាពអាការ:ជំងឺហាក់មិនទាន់មានភាពធូរស្រាលដូចដើមវិញឡើយ។ នេះបើតាមការបញ្ជាក់ឲ្យដឹងពីសំណាក់ភរិយារបស់នាយ តាក់ស៊ី កាលពីល្ងាចថ្ងៃទី២៣ ខែកក្កដា ម្សិលមិញ។

ភរិយាតារាកំប្លែងនាយ តាក់ស៊ី បានប្រាប់ឲ្យដឹងថា “ប្តីរបស់ខ្លួនបានវះកាត់ជំងឺបូសរួចរាល់ហើយ តែមកដល់ពេលនេះមិនទាន់ធូរស្បើយទេ ព្រោះនៅតែមានអាការ:ក្តៅខ្លួននិងហូបបាយមិនទាន់បានឡើយ។ អ្នកនាងនិយាយបន្តទៀតថា សូមបួងសួងឱ្យបងឆាប់បានល្អប្រសើរវិញ ៤ទៅ៥ថ្ងៃនេះ ពេទ្យតាមមិនដាក់ដៃទេហេតុក្ដៅរហូតអស់ជាតិថ្នាំ គឺក្ដៅវិញហូបបាយ ក៏មិនបានទៀត ហូបបបក៏បានតិច”។

ភរិយានាយ តាក់ស៊ី និយាយឱ្យដឹងទៀតថាពាក់ព័ន្ធជាមួយនឹងបញ្ហាក្រលៀនរបស់គាត់អត់មានបញ្ហាអី្វទេ ប៉ុន្តែដោយសារតែគាត់រលាក់ស៊ីជាមួយថ្នាំហ្នឹង។ មកពីបញ្ហាថ្នាំក្រលៀនអ៊ីចឹងវាធ្វើឲ្យចេញចំហាយ ក្តៅឡើងដូចបូកអញ្ចឹងហើយវាធំ ទើបវាចេញហើយគាត់ខ្វះគ្រាប់ឈាមក្រហមទៀតផង។

តាមរយ:នេះដែរក៏មានមហាជនអ្នកគាំទ្រ និងអ្នកសិល្ប:មួយចំនួន បានផ្ញើសារជូនពរនិងលើកទឹកចិត្តដល់តារាកំប្លែងនាយ តាក់ស៊ី ឱ្យឆាប់ជាសះស្បើយពីជំងឺ ដើម្បីឆាប់បានវិលមករកអាជីពកំប្លែងបង្កការសប្បាយរីករាយដល់ទស្សនិកជនដូចពេលមុនៗផងដែរ៕ ចាន់រ៉ា