ពិធីប្រណាំងទូកង ខេត្តព្រៃវែងបញ្ចប់ដោយជោគជ័យ​ក្រោមអធិបតីភាព​សម្តេចក្រឡាហោម ស ខេង

លោក ជា សុមេធី អភិបាលខេត្តព្រៃវែង បានលើកឡើងថា ពិធីប្រណាំងទូក ង នេះ ប្រព្រឹត្តទៅរយៈពេល ០២ថ្ងៃ គឺនៅថ្ងៃទី១៥-១៦ ខែតុលា ឆ្នាំ២០២២ មានទូកចូលរួមសរុបចំនួន ៤១ទូក (ទូកខ្នាតអន្តរជាតិចំនួន ៣០ទូក និងទូកខ្នាតវែង ចំនួន ១១ទូក) ក្នុងនោះ ទូកក្នុងខេត្តចំនួន ៣៩ទូក, ទូកមកពីខេត្តកណ្តាលចំនួន ០១ទូក និងមកពីរាជធានីភ្នំពេញចំនួន ០១ទូក ដោយមានចំណុះទូកសរុបចំនួន ១,៧៩៣នាក់ (ចំណុះពិត ១.៤៤៨នាក់ និងចំណុះត្រៀម ៣៤៥នាក់)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលខេត្ត បានបញ្ជាក់ថា នៅថ្ងៃទី១ មានប្រជាពលរដ្ឋបានមកចូលរួមទស្សនា និងលេងកំសាន្តនៃពិធី​ប្រណាំងទូកងខេត្តព្រៃវែង និងស្តង់ពិព័រណ៍ផលិតផលក្នុងស្រុក ប្រមាណ ២៥.០០០នាក់ និងនៅព្រឹកថ្ងៃទី២ មានប្រជាពលរដ្ឋចូលរួមប្រហាក់ប្រហែលថ្ងៃនៅទី១ដែរ។ លោក ជា សុមេធី សង្កត់ធ្ងន់ថា កំណើនអ្នកមក​លេងកំសាន្តដ៏ច្រើនមិនធ្លាប់មានក្នុងពិធីប្រណាំងទូក ង ថ្នាក់ខេត្តកន្លងៗមក ដែលនេះបង្ហាញអំពីការគាំទ្រ និងការជឿជាក់របស់ប្រជាពលរដ្ឋ មកលើការដឹកនាំដ៏ត្រឹមត្រូវរបស់រាជរដ្ឋាភិបាល ក៏ដូចជាអាជ្ញាធរគ្រប់ថ្នាក់។

នៅថ្ងៃបញ្ចប់នៃពិធីប្រណាំងទូកងនេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ បានអញ្ជើញជាអធិបតី ផ្ដល់រង្វាន់ដល់ទូកទទួលបានជ័យលាភី ដែលបានប្រណាំងរយៈពេលពីថ្ងៃមកនេះ។

មានប្រសាសន៍នៅក្នុងឱកាសនោះ សម្ដេចក្រឡាហោម ស ខេង បានកោតសរសើរនិងវាយតម្លៃខ្ពស់ចំពោះ​ការខិតខំប្រឹង​ប្រែងរបស់រដ្ឋបាលខេត្តព្រៃវែងក្នុងការរៀបចំពិធីប្រណាំងទូកងដែលប្រព្រឹត្តទៅដោយរលូនរយៈពេល២ ថ្ងៃ។

សម្ដេចក្រឡាហោម ស ខេង ក៏បានបន្ថែមទៀតថា នេះគឺការកើតចេញពីប្រទេសមានសុខសន្តិភាព ក្រោមការដឹកនាំរបស់​រាជរដ្ឋាភិបាលបានធ្វើឲ្យបងប្អូនប្រជាពលរដ្ឋមានឱកាសក្នុងការប្រារព្ធពិធីផ្សេងៗ និងធ្វើដំណើរទៅទីរមណីយដ្ឋាននានា។

បន្ថែមលើនេះ សម្តេមក្រឡាហោម បានសង្កត់ធ្ងន់ថា រាជរដ្ឋាភិបាលបាននិងកំពុងតែដាក់ចេញនូវវិធានការបង្ក្រាប​ល្បែងស៊ីសង ក្នុងក្របខ័ណ្ឌទូទាំងប្រទេស សំដៅធ្វើយ៉ាងណាទប់ស្កាត់ឲ្យខាងតែបាននូវទីតាំង ល្បែងភ្នាល់គ្រប់ប្រភេទ ដែលជាដើមចមនាំឲ្យវិនាសហិនហោចទ្រព្យសម្បត្តិ អំពើចោរកម្ម អសន្តិសុខ រួមទាំងអំពើហិង្សាក្នុងគ្រួសារ ។  ជាមួយគ្នានេះអាជ្ញាធរ ក៏ដូចជាមន្ត្រីពាក់ព័ន្ធគ្រប់លំដាប់ថ្នាក់ ជាពិសេសមន្ត្រីអនុវត្តច្បាប់ ត្រូវតែអនុវត្តឲ្យបានតាមបទ​បញ្ជារបស់ សម្ដេចតេជោ ធ្វើយ៉ាងណា បង្ក្រាបឲ្យមានប្រសិទ្ធភាពនូវទីតាំងល្បែងភ្នាល់គ្រប់ប្រភេទ នៅតាមមូលដ្ឋាន ដែលស្ថិតនៅក្រោមដែនសមត្ថកិច្ចរបស់ខ្លួន។ អត្ថបទ៖ សៅគ្រី