២ថ្ងៃកិច្ចប្រជុំអាស៊ាន៖ ប្រព័ន្ធអ៊ីនធើណេតនៅមណ្ឌលព័ត៌មាន ដើរលឿនរហ័ស

ថ្ងៃពុធ ទី០៩ ខែវិច្ឆិកា ឆ្នាំ២០២២នេះ គឺជាថ្ងៃទី២ នៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធផ្សេងទៀតដែលកំពុងធ្វើឡើងនៅសណ្ឋាគារ សុខា រាជធានីភ្នំពេញ។ រយៈពេល២ថ្ងៃមកនេះ ប្រព័ន្ធអ៊ីនធើណេតនៅមណ្ឌលព័ត៌មាននៃកិច្ចប្រជុំអាស៊ាន មានដំណើរការលឿនរហ័យងាយស្រួលសម្រាប់អ្នកសារព័ត៌មានជាតិ និងអន្តរជាតិ ផ្សព្វផ្សាយព័ត៌មានចេញទៅកាន់ពិភពលោក។

លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន បានអះអាងប្រាប់«កម្ពុជាថ្មី»នៅមណ្ឌលព័ត៌មានក្នុងសណ្ឋាគារ សុខា ថា សម្រាប់កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធផ្សេងទៀតនៅពេលនេះ គឺក្រសួងព័ត៌មានប្រើប្រាស់ប្រព័ន្ធអ៊ីនធើណេត២ក្នុងពេលតែមួយតែម្តង ដែលនាំឲ្យល្បឿនអ៊ីនធើណេតលឿនរហ័សទាន់ចិត្ត។ លោកបញ្ជាក់ថា កាលពីកិច្ចប្រជុំរដ្ឋមន្រ្តីការបរទេសអាស៊ាន និងកិច្ចប្រជុំពាក់ព័ន្ធនៅដើមខែសីហា កន្លងទៅ គឺក្រសួងព័ត៌មាន ប្រើប្រាស់អ៊ីនធើណេតតែមួយប្រព័ន្ធប៉ុណ្ណោះ ដែលធ្វើឲ្យល្បឿនអ៊ីនធើណេត ដើរយឺតមិនទាន់សភាពការណ៍នៃការផ្សព្វផ្សាយព័ត៌មានរបស់អ្នកសារព័ត៌មាន។

តែទោះជាយ៉ាងណាក៏ដោយ លោក ផុស សុវណ្ណ បានលើកឡើងថា ប្រព័ន្ធអ៊ីនធើណេតនេះ អាចដើរយឺតវិញ ឬលឿនដដែល គឺអាស្រ័យនៅពេលក្រុមអ្នកសារព័ត៌មានមកពេញមណ្ឌលព័ត៌មានសម្រាប់យកព័ត៌មាននៃកិច្ចប្រជុំសំខាន់ៗ នឹងចាប់ផ្តើមឡើងពីថ្ងៃស្អែកនេះតទៅ។ ក៏ប៉ុន្តែ អ្វីដែលជាការកត់សម្គាល់ គឺនៅក្នុងរយៈពេល២ថ្ងៃមកនេះ មិនទាន់ឃើញមានការរអ៊ូរទាំពីសំណាក់អ្នកសារព័ត៌មានទាំងជាតិ និងអន្តរជាតិនៅឡើយទេពាក់ព័ន្ធនឹងបញ្ហាល្បឿនអ៊ីនធើណេតនេះ៕

ដោយ៖ វណ្ណ សុគន្ធា