ព័ត៌មានជាតិ

អាជ្ញាធរមីន អបអរសាទរខួប ៣០ឆ្នាំ នៃសកម្មភាពមីននៅកម្ពុជា ១៩៩២ – ២០២២

បានផុស

១ year មុន

នៅ

ថ្ងៃចន្ទ ២១ វិច្ឆិកា ២០២២

ដោយ

រសៀលថ្ងៃទី២១ ខែវិច្ឆិកា ឆ្នាំ២០២២ នៅសាលសន្និសីទនិងពិព័រណ៍កោះពេជ្រ ក្នុងនាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានអាជ្ញាធរមីន ឯកឧត្តម ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានអញ្ជើញចូលរួមក្នុងពិធីបើកសន្និបាតជាតិខួប៣០ឆ្នាំនៃសកម្មភាពមីននៅកម្ពុជា ក្រោមប្រធានបទ “ផ្តល់ដីសុវត្ថិភាព បង្កើតស្នាមស្នាមញញឹម” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សន្និបាតនេះ មានប្រព្រឹត្តិទៅរយៈពេលពីរថ្ងៃ ចាប់ពីថ្ងៃទី២១-២២ ខែវិច្ឆិកា ឆ្នាំ២០២២ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញជាអធិបតីក្នុងពិធីបិទសន្និបាតនាព្រឹកថ្ងៃទី២២ ខែវិច្ឆិកា ឆ្នាំ២០២២។

ក្នុងពិធីបើកសន្និបាតនេះ ក៏មានបទអន្តរាគមន៍តាមរយៈវីដេអូពីស្ថាប័នអន្តរជាតិ ព្រមទាំងមតិយោបល់របស់អ្នកបោសសម្អាតមីន ជនរងគ្រោះដោយសារមីន អ្នកទទួលផល តំណាងវិស័យឯកជន និងតំណាងដៃគូអភិវឌ្ឍន៍។ ជាមួយគ្នានេះ ក៏មានការផ្សព្វផ្សាយសារវីដេអូររបស់ លោក Daniel Craig (តួសម្តែង James Bong 007) សម្រាប់អបអរសាទរខួប៣០ឆ្នាំ នៃសកម្មភាពមីននៅកម្ពុជា ផងដែរ។

រយៈពេល៣០ឆ្នាំនេះ ចាប់តាំងពីឆ្នាំ១៩៩២ ដល់ឆ្នាំ២០២២ ក្នុងបេសកកម្មសកម្មភាពមីនរួមគ្នា រាជរដ្ឋាភិបាលកម្ពុជា ប្រទេសផ្តល់ជំនួយ ដៃគូអភិវឌ្ឍន៍ ប្រតិបត្តិករជាតិ-អន្តរជាតិ និងគ្រប់ភាគីពាក់ព័ន្ធ ពិតជាបានរួមចំណែកយ៉ាងធំធេង ក្នុងការដោះស្រាយផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម ដែលកម្ពុជា ជាប់ចំណាត់ថ្នាក់លេខ១ ក្នុងពិភពលោក ជាប្រទេសដែលមានផ្ទៃដីបោសសម្អាតមីនរួចធំជាងគេ។

ផ្ទៃដី ២.៥៣១ គីឡូម៉ែត្រក្រឡា ត្រូវបានបោសសម្អាតរួច និងប្រែក្លាយជាដីសុវត្ថិភាព និងប្រើប្រាស់ ដោយបានប្រែក្លាយ ដីមីន ទៅជា ដីមាស។ ប្រតិបត្តិករ បានរកឃើញ និងកម្ទេចចោលគ្រាប់មីន និងសំណល់ជាតិផ្ទុះពីសង្គ្រាមរាប់លានគ្រាប់ ក្នុងនោះគ្រាប់មីនប្រឆាំងមនុស្សចំនួន ១.១៥១.២៣២ គ្រាប់ គ្រាប់មីនប្រឆាំងរថក្រោះចំនួន ២៦.១១២ និងយុទ្ធភណ្ឌមិនទាន់ផ្ទុះដទៃទៀត ចំនួន ៣.០២៨.៦៥៩ គ្រាប់។

ចាប់តាំងពីឆ្នាំ ១៩៧៩ ប្រជាជនចំនួន ៦៥.០០៤ នាក់ បានរងគ្រោះដោយសារមីន និងសំណល់ជាតិផ្ទុះពីសង្គ្រាម ក្នុងនោះស្លាប់បាត់បង់ជីវិតចំនួន ១៩.៨១៨ នាក់។ ជាមួយគ្នានឹងកិច្ចខិតខំប្រឹងប្រែងរួមគ្នា ចំនួនជនរងគ្រោះប្រចាំឆ្នាំបានថយចុះពី ៤.៣២០នាក់ ក្នុងឆ្នាំ១៩៩៦ ជាឆ្នាំដែលមានចំនួនជងរងគ្រោះច្រើនបំផុត មកនៅ៤៤នាក់ ក្នុងឆ្នាំ២០២១ កន្លងមកនេះ។

សមិទ្ធផលសំខាន់ៗដែលសម្រេចបានទាំងអស់កន្លងមកនេះលើសកម្មភាពមីន មិនអាចកាត់ផ្ដាច់ចេញពីជំនួយដ៏សប្បុរសធម៌ដ៏ថ្លៃថ្លារបស់ដៃគូអភិវឌ្ឍន៍ទាំងអស់របស់យើងបានទេ។ ក្នុងនាមរាជរដ្ឋាភិបាល លោកទេសរដ្ឋមន្ត្រី បានសំដែងនូវអំណរគុណយ៉ាងជ្រាលជ្រៅបំផុតជូនចំពោះប្រទេសផ្ដល់ជំនួយ ដៃគូអភិវឌ្ឍន៍ និងភាគីពាក់ព័ន្ធទាំងអស់ ដែលបានចូលរួមយ៉ាងសកម្មក្នុងការផ្ដល់ជំនួយទាំងបច្ចេកទេស សម្ភារៈ និងហិរញ្ញវត្ថុ ក្នុងបុព្វហេតុនៃការចូលរួមចំណែកក្នុងការកាត់បន្ថយភាពក្រីក្រ ជំរុញការអភិវឌ្ឍ និងកំណើនសេដ្ឋកិច្ចនៃព្រះរាជាណាចក្រកម្ពុជា។

លោកទេសរដ្ឋមន្ត្រី បានថ្លែងអំណរគុណ ចំពោះកិច្ចខិតខំប្រឹងប្រែង និងការលះបង់គ្រប់បែបយ៉ាង របស់ប្រតិបត្តិករជាតិ-អន្តរជាតិ ក្នុងការរួមចំណែក ផ្តល់ដីសុវត្ថិភាព។ ជាមួយគ្នានេះ លោកក៏សូមចូលរួមគោរពវិញ្ញាណក្ខន្ធ និងសម្តែងនូវការសោកស្តាយ ចំពោះការបាត់បង់អាយុជីវិត មានពិការភាព និងរបួសរបស់អ្នកដោះមីនយើង ចំនួន ១៥៥ នាក់ ក្នុងនោះ បាត់បង់អាយុជីវិតចំនួន ៣១ នាក់។

ថ្ងៃទី០១ ខែកក្កដា ឆ្នាំ២០២២ ក្នុងទិវាមច្ឆជាតិ នៅតំបន់អាងទឹកត្រពាំងថ្ម ឃុំប៉ោចារ ស្រុកភ្នំស្រុក ខេត្តបន្ទាយមានជ័យ គឺជាថ្ងៃដ៏អស្ចារ្យមួយសម្រាប់ប្រជាពលរដ្ឋកម្ពុជា ដែលការបោសសម្អាតមីន មានការចូលរួមគាំទ្រយ៉ាងផុសផុលពីកាកបាទក្រហមកម្ពុជា វិស័យឯកជន សប្បុរសជន មន្ត្រីរាជការ និងប្រជាពលរដ្ឋកម្ពុជា គ្រប់ស្រទាប់វណ្ណៈ តាមរយៈគម្រោងសម្តេចតេជោសម្រាប់សកម្មភាពមីន ក្រោមមូលបទ “ផ្តល់ដីសុវត្ថិភាព បង្កើតស្នាមញញឹម” ក្រោមការដឹកនាំ គ្រប់គ្រង និងសម្របសម្រួលដោយអាជ្ញាធរមីន ដែលមាន សម្តេចតេជោ ជាប្រធាន។

ជាមួយគ្នានេះ ក្រោមការដឹកនាំ គ្រប់គ្រង និងសម្របសម្រួលរបស់អាជ្ញាធរមីន មានប្រទេសជាមិត្ត ដៃគូអភិវឌ្ឍន៍ និងភាគីពាក់ព័ន្ធ ក៏បានធ្វើការកត់សម្គាល់ផងដែរ ៖

• បានទទួលស្គាល់ និងវាយតម្លៃខ្ពស់ ចំពោះសមិទ្ធផលជាប្រវត្តិសាស្ត្រ នៃសកម្មភាពមីននៅកម្ពុជា រយៈពេល៣០ឆ្នាំ កន្លងទៅនេះ។

• បានទទួលស្គាល់ និងវាយតម្លៃខ្ពស់ ចំពោះ “គម្រោងសម្តេចតេជោសម្រាប់សកម្មភាពមីន” ក្រោមមូលបទ “ផ្តល់ដីសុវត្ថិភាព បង្កើតស្នាមញញឹម” ក្រោមគំនិតផ្តួចផ្តើមដ៏ឧត្តុង្គឧត្តមបំផុតរបស់ សម្តេចតេជោនាយករដ្ឋមន្ត្រី ក្នុងការកៀរគរធនធានពីវិស័យឯកជន និងសប្បុរសជន។

• បានកោតសរសើរ និងវាយតម្លៃខ្ពស់ នូវជំនាញ និងបទពិសោធន៍ លើការងារបោសសម្អាតមីនរបស់កម្ពុជា និងជំរុញឲ្យបន្ត ចែករំលែកជាមួយបណ្តាប្រទេសផ្សេងទៀតក្រោមក្របខណ្ឌកិច្ចសហប្រតិបត្តិការអន្តរជាតិ។

• បានគាំទ្រ និងទទួលស្គាល់នូវកិច្ចខិតខំប្រឹងប្រែងរបស់ប្រតិបត្តិករជាតិ-អន្តរជាតិ ដូចជា កងយោធពលខេមរភូមិន្ទ មជ្ឈមណ្ឌលជាតិថែរក្សាសន្តិភាព មជ្ឈមណ្ឌលសកម្មភាពកំចាត់មីនកម្ពុជា អង្គការ HALO Trust អង្គការMAG អង្គការ NPA អង្គការ APOPO អង្គការដោះមីនកម្ពុជា និងប្រតិបត្តិករវិស័យឯកជន។

• បានទទួលស្គាល់ និងវាយតម្លៃខ្ពស់ ចំពោះសហគមន៍ផ្តល់ជំនួយ និងដៃគូអភិវឌ្ឍន៍ ដែលបាននិងកំពុងគាំទ្រសកម្មភាពមីនតាមរយៈការផ្តល់ហិរញ្ញប្បទាន សម្ភារៈ និងជំនួយបច្ចេកទេសទាំងក្នុងក្របខណ្ឌទ្វេភាគី និងពហុភាគី។

• បានទទួលស្គាល់នូវវិសាលភាពនៃផ្ទៃដីដែលសង្ស័យថាមានមីន និងសំណល់ជាតិផ្ទុះពីសង្គ្រាម និងតម្រូវការធនធាន និងបន្តកិច្ចសហប្រតិបត្តិការសម្រេចឲ្យបាននូវផែនការយុទ្ធសាស្ត្រជាតិសកម្មភាពមីន ២០១៨-២០២៥ តាមការគ្រោងទុក។

• បានទទួលស្គាល់នូវភាពចាំបាច់ និងគាំទ្រលើការអនុវត្តវិធីសាស្ត្ររំដោះផ្ទៃដីឲ្យបានពេញលេញ ជាពិសេស “ការកាត់បន្ថយផ្ទៃដីមិនបច្ចេកទេស” តាមស្តង់ដារសកម្មភាពកម្ចាត់មីនកម្ពុជា។

• បានទទួលស្គាល់ និងគាំទ្រលើការអនុវត្តយន្តការភូមិអស់មីន ឈានឆ្ពោះទៅសម្រេចបានភូមិ ឃុំ/សង្កាត់ ស្រុក/ក្រុង ខេត្តអស់មីន និងកម្ពុជាអស់មីនឆ្នាំ២០២៥។

• បានវាយតម្លៃខ្ពស់ ដល់ការចូលរួមរបស់កងទ័ពជើងគោកក្នុងការបោសសម្អាតមីនមនុស្សធម៌នៅកម្ពុជា និងគាំទ្រដល់ការហ្វឹកហ្វឺន បំពាក់សម្ភារៈ និងផ្តល់ថវិកា សម្រាប់កងទ័ពជើងគោកពង្រីកប្រតិបត្តិការបោសសម្អាតមីនមនុស្សធម៌បន្ថែមទៀត។

• បានគាំទ្រការអនុវត្ត និងការធ្វើទំនើបកម្មបច្ចេកវិទ្យា ក្នុងវិស័យសកម្មភាពមីនទូទាំងប្រទេស រួមមាន ការធ្វើបច្ចុប្បន្នភាព ការអភិវឌ្ឍទៅលើវិធីសាស្ត្រ និងការប្រើប្រាស់ឧបករណ៍បច្ចេកទេសទំនើប ដែលមានស្រាប់ និងកើតឡើងថ្មីៗ។

• បានវាយតម្លៃខ្ពស់ និងទទួលស្គាល់ នូវតួនាទីភារកិច្ចរបស់អាជ្ញាធរមីន ដែលជាសេនាធិការរបស់រាជរដ្ឋាភិបាល ក្នុងការដឹកនាំ តម្រង់ទិស សម្របសម្រួល និងកៀរគរធនធានបោសសម្អាតមីន រៀបចំផែនការ និងគោលដៅបោសសម្អាតជាអាទិភាព និងតួនាទីភារកិច្ចរបស់អាជ្ញាធរមីន ក្នុងការបូកសរុប និងរាយការណ៍អំពីវឌ្ឍនភាពការងារ ហិរញ្ញវត្ថុ សម្ភារៈ កម្លាំងប្រតិបត្តិការ និងជំនួយបច្ចេកទេស ពាក់ព័ន្ធនឹងវិស័យសកម្មភាពមីននៅកម្ពុជា ជូនរាជរដ្ឋាភិបាល ដៃគូអភិវឌ្ឍន៍ និងភាគីពាក់ព័ន្ធ។

• បានឯកភាព គាំទ្រ និងជម្រុញឲ្យអាជ្ញាធរមីន បន្តដឹកនាំរៀបចំ កែសម្រួល និងធ្វើបច្ចុប្បន្នភាពគោលនយោបាយ ផែនការយុទ្ធសាស្ត្រ ឯកសារគតិយុត្តិ ប្រព័ន្ធគ្រប់គ្រងព័ត៌មាន និងស្តង់ដានៃកិច្ចប្រតិបត្តិការបោសសម្អាតមីន ឲ្យស្របតាមការវិវត្តន៍ និងភាពចាំបាច់នៃស្ថានភាពទូទៅនៃ សកម្មភាពមីន ក្នុងដំណើរឆ្ពោះទៅសម្រេចបាននូវចក្ខុវិស័យ “កម្ពុជាគ្មានមីនឆ្នាំ២០២៥” និងផែនការសកម្មភាពចាំបាច់ពាក់ព័ន្ធនានាក្រោយឆ្នាំ២០២៥។

គិតត្រឹមខែតុលា ឆ្នាំ២០២២ កម្ពុជានៅសល់ផ្ទៃដីសង្ស័យមានមីន និងសំណល់ជាតិផ្ទុះពីសង្គ្រាមចំនួន ២០០១ គីឡូម៉ែត្រក្រឡា ក្នុងនោះផ្ទៃដីមានមីនចំនួន ៧០៣ គីឡូម៉ែត្រក្រឡា ដែលកម្ពុជា មានមហិច្ឆតាត្រូវបញ្ចប់ការងារបោសសម្អាតមីនឲ្យអស់ត្រឹមឆ្នាំ២០២៥។ ជាមួយគ្នានេះ យើងក៏នៅប្រឈមនឹងបញ្ហាមួយចំនួនផ្សេងទៀតផងដែរ ដែលក្នុងនោះរួមមាន៖

• ការសម្រេចបាននូវគោលដៅទាំង ៨ នៃផែនការយុទ្ធសាស្ត្រជាតិសកម្មភាពមីន (២០១៨-២០២៥) ដែលទាមទារឱ្យមានធនធានគ្រប់គ្រាន់ វិធីសាស្ត្រនិបច្ចេកវិទ្យាសមស្រប ព្រមទាំងការចូលរួម កិច្ចសហប្រតិបត្តិការ និងការសម្របសម្រួលពីគ្រប់ភាគីពាក់ព័ន្ធ

• ការរិះរក និងការអនុវត្តវិធីថ្មីប្រកបដោយភាពច្នៃប្រឌិត ក្នុងការកៀរគរធនធាន ក្នុងអំឡុងពេលនៃវិបត្តិសេដ្ឋកិច្ចសាកល

• ការប្រមូលទិន្នន័យ និងព័ត៌មានដែលត្រឹមត្រូវពីភាគីពាក់ព័ន្ធ ដើម្បីរៀបចំផែនការ ការកំណត់អាទីភាព និងការសម្របសម្រួលការធ្វើរបាយការណ៍

• ធានាថាប្រតិបត្តិករ និងអ្នកជំនាញត្រូវបានទទួលស្គាល់ត្រឹមត្រូវ ហើយស្តង់ដាររបស់ពួកគេស្របទៅនឹងស្តង់ដារជាតិ

• ការអនុវត្តវិធីសាស្ត្ររំដោះផ្ទៃដី ជាពិសេសការអនុវត្តការស្រាវជ្រាវមិនបច្ចេកទេស និងការស្រាវជ្រាវបច្ចេកទេស

• ធានាថាគម្រោងសកម្មភាពមីនទាំងអស់ដែលផ្តួចផ្តើមដោយក្រសួង អង្គការជាតិនិងអន្តរជាតិ ត្រូវឆ្លងកាត់ការប្រឹក្សាយោបល់ជាមួយអាជ្ញាធរមីន ហើយមានតែប្រតិបត្តិករនិងអ្នកជំនាញដែលមានការទទួលស្គាល់ប៉ុណ្ណោះដែលនឹងត្រូវជ្រើសរើស ដែលក្នុងនោះរួមបញ្ចូលទាំងប្រតិបត្តិករដែលបញ្ជូនទៅបរទេស ដោយលើកលែងតែកងកម្លាំងរក្សាសន្តិភាព

• បង្កើតការរៀបចំការងារជាលក្ខណៈស្ថាប័នដែលមានភាពចុះសម្រុងគ្នារវាងគ្រប់ភាគី ដើម្បីបំពេញតម្រូវការនាពេលអនាគតបន្ទាប់ពីឆ្នាំ ២០២៥៕