បុណ្យសមុទ្រ ៣ថ្ងៃ ខេត្តព្រះសីហនុ ទទួលបានភ្ញៀវទេសចរជាង ៧សែននាក់

ក្នុងរយៈពេល ៣ថ្ងៃ នៃពិធីបុណ្យសមុទ្រឆ្នាំ ២០២២ ខេត្តព្រះសីហនុ ទទួលបានភ្ញៀវទេសចរជាតិ-អន្តរជាតិ ដែលជាភ្ញៀវទេសចរផ្ទៃក្នុងជាង ៧សែននាក់ ដោយមានកំណើន ២៩ភាគរយ បើប្រៀបធៀបនឹងពិធីបុណ្យសមុទ្រឆ្នាំ ២០១៧។

លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានឲ្យអ្នកសារព័ត៌មានកម្ពុជាថ្មី ដឹងនៅថ្ងៃទី ១២ ខែធ្នូនេះថា ក្នុងឱកាសពិធីបុណ្យសមុទ្រឆ្នាំ ២០២២ រយៈពេល ៣ថ្ងៃ ចាប់ពីថ្ងៃទី ៩ ដល់ថ្ងៃទី ១១ ខែធ្នូ ឆ្នាំ ២០២២ មានភ្ញៀវទេសចរផ្ទៃក្នុងសរុប ៧១២,៦១៤នាក់ មានការកើនឡើង ២៩ភាគរយ ហើយបើធៀបរយៈពេល ៣ថ្ងៃ នៃពិធីបុណ្យសមុទ្រឆ្នាំ ២០១៧។

ក្នុងនោះភ្ញៀវទេសចរជាតិមានចំនួន ៧០៨,៥៣៣នាក់ កើនឡើង ៣៣,៨ភាគរយ (ប្រមាណ៥០% ជាភ្ញៀវផ្ទៃក្នុងខេត្ត)។ ចំណែកភ្ញៀវទេសចរបរទេសមានចំនួន ៤,០៥៤នាក់ មានការថយចុះ ៨០ភាគរយ។ រីឯមានភ្ញៀវចូលតាមព្រលានយន្ត ហោះអន្តរជាតិចំនួន ៧ជើង ហើយមានភ្ញៀវទេសចរសរុប ២៩១នាក់។ ក្នុងនោះ ភ្ញៀវទេសចរជាតិមានចំនួន ១៨នាក់ និងភ្ញៀវទេសចរអន្តរជាតិមានចំនួន ២៧៣នាក់។

សម្រាប់ភ្ញៀវទេសចរទៅកម្សាន្តបណ្តាកោះនានាមានចំនួន ១,១៧៣នាក់ ដោយក្នុងនោះភ្ញៀវទេសចរជាតិចំនួន ៦៦៦ នាក់ និងភ្ញៀវទេសចរបរទេស ៥០៧នាក់។ ចំពោះភ្ញៀវទេសចរ ដើរកម្សាន្ដតាមរមណី​យដ្ឋាន បណ្តាឆ្នេរ និងតន្រ្តីនានាមានចំនួន ៧១១,១២៣នាក់ ក្នុងនោះភ្ញៀវទេសចរជាតិ ៧០៧,៨៤៩នាក់ និងភ្ញៀវទេសចរបរទេស ៣,២៧៤នាក់៕