សម្ដេចតេជោ អញ្ជើញទៅដល់ទីក្រុងព្រុចសែលវិញហើយ បន្ទាប់ពីបានបំពេញបេសកកម្មមួយថ្ងៃ នៅទីក្រុងប៉ារីស

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅវេលាម៉ោង ១ និង ០០នាទីរំលងអាធ្រាត ថ្ងៃទី១៤ ខែធ្នូ ឆ្នាំ ២០២២ ម៉ោងនៅទីព្រុចសែល ប្រទេសប៊ែលហ្ស៉ិក ត្រូវនឹងម៉ោង ៧ និង ០០នាទីព្រឹក ថ្ងៃទី១៤ ខែធ្នូ ឆ្នាំ ២០២២នេះ ម៉ោងនៅទីក្រុងភ្នំពេញ បានអញ្ជើញដឹកនាំគណៈប្រតិភូទៅដល់ទីក្រុងព្រុចសែល ប្រទេសបែលហ្ស៊ិក ប្រកបដោយសុវត្ថិភាពហើយ បន្ទាប់ពីបានបំពេញបេសកកម្ម នៅទីក្រុងប៉ារីស ប្រទេសបារាំង រយៈពេលមួយថ្ងៃរួចមក។

សូមជម្រាបថា ដំណើរអញ្ជើញរបស់សម្ដេចតេជោ ហ៊ុន សែន ទៅកាន់ទីក្រុងព្រុចសែលនាពេលនេះ គឺដើម្បីចូលរួម និងធ្វើជាសហប្រធាន នៃកិច្ចប្រជុំកំពូលរំលឹកខួបអនុស្សាវរីយ៍អាស៊ាន-សហភាពអឺរ៉ុប និងដើម្បីអបអរសាទរខួប ៥៤ ឆ្នាំ នៃទំនាក់ទំនងដៃគូសន្ទនាអាស៊ាន-សហភាពអឺរ៉ុប ដែលកិច្ចប្រជុំនេះត្រូវធ្វើឡើងនៅថ្ងៃទី ១៤ ខែធ្នូ ឆ្នាំ ២០២២ នៅទីក្រុងព្រុចសែល។

ក្រៅពីកិច្ចប្រជុំកំពូលអាស៊ាន-សហភាពអឺរ៉ុប សម្ដេចតេជោ នាយករដ្ឋមន្ត្រី ក៏នឹងមានជំនួបជាមួយបណ្ដាមេដឹកនាំមួយចំនួនទៀតផងដែរ នៅក្នុងពេលនៃការស្នាក់នៅក្នុងទីក្រុងព្រុចសែល៕