អាជីវករលក់វត្ថុអនុស្សាវរីយ៍នៅអង្គរវត្តមានទីផ្សារ ក្រោយទេសចរបរទេសងើបឡើងវិញ

អាជីវករលក់វត្ថុអនុស្សាវរីយ៍នៅមុខប្រាសាទអង្គរវត្ត បានសម្តែងក្តីសប្បាយរីករាយ នៅពេលដែលបាន​ឃើញភ្ញៀវ​ទេសចរ​បរទេសចាប់ផ្តើមត្រឡប់មកទស្សនាតំបន់ប្រវត្តិសាស្ត្រដ៏ល្បីល្បាញ (ប្រាសាទអង្គរវត្ត)ជាថ្មីឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជីវករម្នាក់សុំមិនបញ្ចេញឈ្មោះ បានលើកឡើងថា អ្នកស្រីបានប្រកបរបរលក់វត្ថុអនុស្សាវរីយ៍នៅឧទ្យាន​ប្រាសាទអង្គរវត្ត​នេះរាប់សិបឆ្នាំមកហើយ។ អ្នកស្រីបន្តថា ការលក់ដូរមុខរបរនេះទើបមានភាពប្រសើរឡើងវិញ បន្ទាប់ពីរងផលប៉ះពាល់យ៉ាងខ្លាំងដោយសារជំងឺកូវីដ-១៩ ក្នុងរយៈពេល ២ឆ្នាំកន្លងមកនេះ។

ក្រុមអាជីវករ បានលើកឡើងថា ក្នុងអំឡុងពេលកូវីដ គ្រប់បែបយ៉ាងគឺស្ងាត់ទាំងអស់។ ប៉ុន្តែ​បច្ចុប្បន្ននេះចាប់ផ្តើម​មាន​ភ្ញៀវ​ទេសចរ​ច្រើនឡើងវិញ ធ្វើឱ្យចរន្តការលក់ដូរដំណើរការប្រសើរជាងមុន ពោលគឺ​មិនដូចកាលពី​អំឡុង​ពេល​ជំងឺកូវីដ-១៩ កំពុងរាតត្បាត​ ដែល​ការ​លក់ដូរ​ប្រចាំ​ថ្ងៃ​គឺ​សូន្យតែម្តង។

បច្ចុប្បន្ន ថ្ងៃសៅរ៍ ​និង​ថ្ងៃអាទិត្យ មានភ្ញៀវមកលេងអង្គវត្តច្រើន ហើយការលក់ដូរក៏លក់ដាច់។ អាជីវករ បានសង្កត់ធ្ងន់ថា ក្នុងនាមជាអ្នកលក់វត្ថុអនុស្សាវរីយ៍ ពិតជាសប្បាយ​ចិត្តខ្លាំង​ណាស់​ដែល​បាន​ឃើញ​ភ្ញៀវ​ទេសចរ​ត្រឡប់​មកទស្សនា​ប្រាសាទ​អង្គរវត្តឡើងវិញ។

អ្នក​នាំ​ពាក្យ​ក្រសួង​ទេសចរណ៍​កម្ពុជា ​បាននិយាយថា ​ចំនួន​ភ្ញៀវ​ទេសចរ​បរទេសមក​ទស្សនា​ប្រាសាទ​អង្គរវត្ត ​បានងើប​ឡើង​វិញ​ជា​បន្តបន្ទាប់ ដែលក្នុងរយៈពេល ១១ខែដំបូងនៃឆ្នាំ២០២២ រមណីយដ្ឋានអង្គវត្តនេះមានភ្ញៀវទេសចរបរ​ទេសមកទស្សនាជាង ២២៥,០០០នាក់។

បច្ចុប្បន្នប្រាសាទអង្គរវត្តមានភ្ញៀវទេសចរបរទេសមកទស្សនាចន្លោះពី ១៨០០នាក់ ទៅ២០០០នាក់ក្នុងមួយថ្ងៃ ជាការកើនឡើងយ៉ាងខ្លាំង ដែលពីមុនបានត្រឹមតែប្រហែល ៧០នាក់ប៉ុណ្ណោះ ក្នុងមួយថ្ងៃ ពោលគឺកាលពីអំឡុង​ពេលផ្ទុះកូវីដ-១៩៕​ Mgronline