គណៈកម្មការផ្សារដើមគ បន្តចុះរៀបចំសណ្ដាប់ធ្នាប់តាមដងផ្លូវមុន្នីរ៉េត កាត់បន្ថយការកកស្ទះចរាចរណ៍

បញ្ហាសណ្ដាប់ធ្នាប់សាធារណៈនៅតែជារឿងសំខាន់ ដោយសារតែក្រុមអាជីករមួយចំនួននៅតែបន្តដាក់តាំងលក់ដូរគ្មានសណ្ដាប់ធ្នាប់នៅលើផ្លូវសាធារណៈ ធ្វើឲ្យមានការកកស្ទះចរាចរណ៍ និងប៉ះពាល់សោភ័ណភាព។

ជាក់ស្ដែងលោក ទិត្យ វិទ្ធី ប្រធានគណៈកម្មការផ្សារ បានដឹកនាំកម្លាំងចុះរៀបចំសណ្តាប់ធ្នាប់តាមបណ្តោយផ្លូវមុន្នីរ៉េត ចាប់ពីស្តុបចេនឡា រហូតដល់ស្តុបពេទ្យវិសាលសុខ និងបានណែនាំឱ្យអាជីវករបញ្ឈប់ការលក់ដូរលើផ្លូវសាធារណៈ បង្កការកកស្ទះចរាចរណ៍។ លោកបានបន្ថែមទៀតថា អាជីករទាំងអស់តម្រូវឱ្យមានការលក់ដូរទំនិញមានរបៀបរៀបរយល្អ ជៀសវាងឱ្យបាននូវការដាក់តាំងទំនិញគ្រប់ប្រភេទលក់គ្មានសណ្តាប់ធ្នាប់។ ពិសេសការចតយានយន្តគ្មានសណ្តាប់ធ្នាប់ និង ការរំលោភទ្រូងផ្លូវ និង ចិញ្ចើមផ្លូវពីសំណាក់អាជីវករមួយចំនួន ធើ្វឱ្យផ្លូវរួមតូច មធ្យោបាយធើ្វដំណើរច្រើន បង្កជាការកកស្ទះចរាចរណ៍។

គួររំលឹកផងដែរថា កាលពីថ្ងៃទី២០ ខែវិឆ្ឆិកា ឆ្នាំ២០២៥ លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានណែនាំឱ្យ អភិបាលខណ្ឌទាំង១៤ បន្តយកចិត្តទុកដាក់ពីបញ្ហាសណ្ដាប់ធ្នាប់ ការកកស្ទះចរាចរណ៍ ការដាក់តាំងទំនិញគ្រប់ប្រភេទលក់គ្មានសណ្តាប់ធ្នាប់ និងជៀសវាងឱ្យបាននូវការថ្នាំងថ្នាក់ពីសំណាក់ពលរដ្ឋ ពិសេសមើលនៅតាមសាលារៀនឯកជនមួយចំនួន ដោយសាលាទាំងនេះ ក្នុង១ថ្ងៃ ស្ទះចរាចរណ៍រហូត៤ដង។

ជាមួយគ្នាផងដែរ គណៈកម្មការផ្សារ ក៏បានអំពាវនាវឱ្យអាជីវករ អ្នកប្រកបសេវាដឹកជញ្ជូន និងអ្នកប្រកបរបរសេដ្ឋកិច្ចក្រៅប្រព័ន្ធ សូមមេត្តាចូលរួមសហការជាមួយអាជ្ញាធរចុះណែនាំជាប្រចាំ៕

ដោយ ៖ ម៉េង