មកដឹងលក្ខខណ្ឌងាយៗក្នុងការចូលរៀននៅវិទ្យាស្ថានវិទ្យាសាស្ត្រអគ្គិសនី

វិទ្យាស្ថានវិទ្យាសាស្ត្រអគ្គិសនី ជាគ្រឹះស្ថានឧត្តមសិក្សាសាធារណៈដែលបណ្ដុះបណ្ដាលលើជំនាញវិទ្យាសាស្ត្រអគ្គិសនី សម្រាប់ការសិក្សាកម្រិតថ្នាក់បរិញ្ញាបត្រ បរិញ្ញាបត្ររង និងជំនាញពិសេសសម្រាប់បុគ្គលិកអគ្គិសនី។ ចំពោះលក្ខខណ្ឌដែលអាចសិក្សានៅវិទ្យាស្ថានវិទ្យាសាស្ត្រអគ្គិសនីនេះបាន គឺតាមរយៈការប្រឡងជ្រើសរើស ហើយជាការសិក្សាឥតបង់ថ្លៃ។

ការប្រឡងជ្រើសរើសនេះផ្អោតលើវិញ្ញាសាសរសេរសម្រាប់មុខវិជ្ជាចំនួន ៣ គឺគណិតវិទ្យា រូបវិទ្យា និងភាសាអង់គ្លេសកម្រិតថ្នាក់ទី១២។ មុនឈានទៅដល់ការប្រឡង បេក្ខជនទាំងអស់ត្រូវបំពេញពាក្យសុំចូលរៀន ១ច្បាប់ ដោយមានភ្ជាប់ជាមួយសញ្ញាបត្រមធ្យមសិក្សាទុតិយភូមិ (បាក់ឌុប)។

សម្រាប់ថ្នាក់បរិញ្ញាបត្ររងអគ្គិសនីវិញ បេក្ខជនត្រូវមានសញ្ញាបត្រ ឬបានប្រឡងបញ្ចប់សញ្ញាបត្រមធ្យមសិក្សាទុតិយភូមិ (បាក់ឌុប) និងសម្រាប់ថ្នាក់បរិញ្ញាបត្រវិស្វករអគ្គិសនី ត្រូវមានសញ្ញាបត្រមធ្យមសិក្សាទុតិយភូមិ ឬសញ្ញាបត្រមានកម្រិតស្មើ។ បន្ទាប់ពីបានប្រឡងជាប់ បេក្ខជនថ្នាក់បរិញ្ញាបត្ររង ត្រូវសិក្សារយៈពេល ២ឆ្នាំ និងថ្នាក់បរិញ្ញាបត្រ សិក្សារយៈពេល ៥ឆ្នាំ។

បន្ថែមពីនេះ វិទ្យាស្ថានវិទ្យាសាស្ត្រអគ្គិសនី ក៏មានកាតព្វកិច្ចរៀបចំវគ្គបណ្ដុះបណ្ដាលជំនាញពិសេសសម្រាប់បុគ្គលិកអគ្គិសនីកម្ពុជា ដើម្បីចូលរួមចំណែកការពង្រឹងពង្រីកសមត្ថភាព ចំណេះជំនាញបុគ្គលិកប្រកបគុណភាព និងធានាបាននូវប្រសិទ្ធភាពការងារលើវិស័យអគ្គិសនីនៅកម្ពុជាផងដែរ៕

ដោយ៖ ធឿន វ៉ាន់សុង