រដ្ឋលេខាធិការក្រសួងព័ត៌មាន ស្នើចិត្តមហាជន​ឱ្យឈប់​មើល​ព័ត៌មានគ្មានវិជ្ជាជីវៈ

លោក ប៉ែន បូណា រដ្ឋលេខាធិការក្រសួងព័ត៌មាន ស្នើចិត្តអ្នកប្រើប្រាស់បណ្តាញទំនាក់ទំនងសង្គមហ្វេសប៊ុកទាំងអស់ ចូលរួមឈប់ចូលមើលអ្នកសារព័ត៌មានគ្មានវិជ្ជាជីវៈ តាមរយៈការបង្ហោះសារខ្លីមួយ នៅក្នុងគណនីបណ្តាញសង្គមផ្ទាល់ខ្លួន​របស់​លោក កាលពីយប់ថ្ងៃទី២៤មករា ម្សិលមិញនេះ។

ការលើកឡើងរបស់អតីតប្រធានក្លបអ្នកកាសែតកម្ពុជារូបនេះ គឺបន្ទាប់ពីពេលថ្មីៗនេះ មហាជនបានរិះគន់ខ្លាំងទៅលើ លោក សុវណ្ណ រិទ្ធី ដោយសារតែលោកបានប្រើសម្តីមិនសមរម្យចំពោះបុរសម្នាក់​។ អប្បកិរិយានេះ បានធ្វើឱ្យអ្នកសារព័ត៌មាន រួមទាំងអ្នកលេងបណ្តាញសង្គមជាច្រើន សម្តែងការមិនពេញចិត្ត និងចាត់ទុកទង្វើនេះថា ធ្វើឱ្យប៉ះពាល់ដល់តម្លៃអ្នកសារព័ត៌មាន ដែលមានវិជ្ជាជីវៈដទៃទៀត។

ដោយមើលឃើញពីបញ្ហានេះ លោក ប៉ែន បូណា បានបង្ហោះសារថា “សុំចិត្តមួយបានទេបងប្អូនអ្នកលេងហ្វេសប៊ុក៖
បើគាំទ្រវិជ្ជាជីវៈសារព័ត៌មាន សូមកុំចូលមើលអ្នកគ្មានវិជ្ជាជីវៈ សុំចូលរួមបានទេប៉ុណ្ណឹង?” ក្នុងន័យសំណូមពរឱ្យបងប្អូនប្រជាពលរដ្ឋខ្មែរគ្រប់រូប ងាកមកចាប់អារម្មណ៍នឹងសារព័ត៌មាន ដែលមានវិជ្ជាជីវៈវិញ។

ជាក្រមសីលធម៌ និងវិជ្ជាជីវៈអ្នកសារព័ត៌មាន គឺត្រូវប្រកាន់ជំហរត្រឹមត្រូវរាល់ការសរសេរ និងនិយាយព័ត៌មាន ត្រូវ​បែង​ចែក​ឲ្យ​ដាច់រវាងព័ត៌មាន និងការបញ្ចេញមតិយោបល់ផ្ទាល់ខ្លួន ហើយរាល់ការបញ្ចេញមតិ ឬរិះគន់នេះទៀតសោត ក៏ត្រូវធ្វើឡើងដោយភាពថ្លៃថ្នូរ និងគោរពសិទ្ធិអ្នកដទៃ។
លើសពីនេះទៀត អ្នកសារព័ត៌មានត្រូវផ្សព្វផ្សាយព័ត៌មានពិត មិនលំអៀង រាយការណ៍តែហេតុការណ៍ណាដែលបានឃើញ និងដឹងប្រភពច្បាស់លាស់ បន្ថែមពីនេះ អ្នកសារព័ត៌មានគួរព្យាយាមស្វែងរក និងផ្តល់ឱកាសដល់អ្នកមានភាពពាក់ព័ន្ធក្នុងសាច់រឿង ដើម្បីឲ្យពួកគេបានបកស្រាយនូវបញ្ហាដែលពាក់ព័ន្ធនឹងរូបគេ ឬបទចោទប្រកាន់ណាមួយដែលធ្វើឡើងដោយភាគីម្ខាងទៀត ជាដើម៕