កីឡាករ Al Hilal ម្នាក់ៗ​ទទួល​បាន​ទឹកប្រាក់​ជាង ២០ ម៉ឺន​ដុល្លារ ឡើង​វគ្គផ្តាច់ព្រ័ត្រ FIFA Club World Cup

មហាសេដ្ឋីអារ៉ាប៊ីសាអូឌីត ព្រះអង្គម្ចាស់ Alwaleed bin Talal នឹងផ្តល់ប្រាក់រង្វាន់មួយលានរីយ៉ាល់ (ប្រមាណ ២៦៦,៥០០ដុល្លារ) ដល់កីឡាករម្នាក់ៗនៃក្លិប Al Hilal សម្រាប់ជ័យជម្នះ ៣-២ លើក្រុមជើងឯកអាមេរិកខាងត្បូង Flamengo កាលពីថ្ងៃអង្គារ ដែលបានបញ្ជូនពួកគេទៅកាន់វគ្គផ្តាច់ព្រ័ត្រ Club World Cup ។

ព្រះអង្គម្ចាស់ Alwaleed ប្រធានក្រុមហ៊ុន Kingdom Holding Co គឺជាអ្នកគាំទ្រដ៏ធំរបស់ក្លិបអារ៉ាប៊ីសាអូឌីត ហើយបានប្រកាសនៅលើប្រព័ន្ធផ្សព្វផ្សាយសង្គមថា ទ្រង់នឹងផ្តល់អំណោយដល់កីឡាករក្នុងចំនួនទឹកប្រាក់ប្រហាក់ប្រហែលគ្នា ប្រសិនបើពួកគេក៏អាចឈ្នះការប្រកួតវគ្គផ្តាច់ព្រ័ត្រនៅថ្ងៃសៅរ៍ផងដែរ។

លើសពីនេះ ប៉ុស្តិ៍កីឡារបស់អារ៉ាប៊ីសាអូឌីត SSC បានរាយការណ៍ថា អ្នកលេងម្នាក់ៗនឹងទទួលបាន ៥០០,០០០ rials ពីរដ្ឋមន្ត្រីកីឡារបស់ប្រទេសសម្រាប់ជ័យជម្នះ Flamengo។ ការប្រកួតវគ្គផ្តាច់ព្រ័ត្រនឹងត្រូវប្រកួតជាមួយនឹង Real Madrid របស់អេស្ប៉ាញ។

វាជាលើកទី១ ហើយដែលក្រុមអារ៉ាប៊ីសាអូឌីតបានឈានដល់វគ្គផ្តាច់ព្រ័ត្រ Club World Cup ហើយត្រូវបានរដ្ឋាភិបាលរបស់ប្រទេសអបអរសាទរជាសមិទ្ធិផលប្រកួតប្រជែងមួយផ្សេងទៀតបន្ទាប់ពីក្រុមជម្រើសជាតិរបស់ពួកគេឈ្នះ World Cup ជាមួយអាហ្សង់ទីនក្នុងខែវិច្ឆិកា។

រដ្ឋមន្ត្រីក្រសួងកីឡាព្រះអង្គម្ចាស់ Abdulaziz al-Faisal បាននិយាយនៅក្នុងសេចក្តីថ្លែងការណ៍ដែលធ្វើឡើងដោយទីភ្នាក់ងារសារព័ត៌មានអារ៉ាប៊ីសាអូឌីត (SPA) ថា “ការឈ្នះនេះគឺជាការបញ្ជាក់ជាក់ស្តែងនៃភាពខុសគ្នាដ៏អស្ចារ្យដែលកីឡាអារ៉ាប៊ីសាអូឌីតបានជួបប្រទះនាពេលថ្មីៗនេះ”៕

ប្រភព៖ CNN.com

អត្ថបទ៖ មន្នីរ័ត្ន