ព័ត៌មានជាតិ

គ្រឹះស្ថានសិក្សាសាធារណៈ ២៩ នៅកម្ពុជា កំពុងអនវុត្តកម្មវិធីបច្ចេកវិទ្យា និងសហគ្រិនភាព

បានផុស

១ year មុន

នៅ

ថ្ងៃចន្ទ ២៧ កុម្ភៈ ២០២៣

ដោយ

ក្រសួងអប់រំ យុវជន និងកីឡា បាននឹងកំពុងបណ្ដុះបណ្ដាលកម្មវិធីការអប់រំសរសេរកូដ និងសហគ្រិនភាព ដែលមានឈ្មោះថា Technovation នៅតាមគ្រឹះស្ថានសិក្សាសាធារណៈប្រមាណ ២៩ នៅកម្ពុជា។ ទន្ទឹមនោះ ក៏មានក្រុមសិស្សស្រីប្រមាណ ៥០ ក្រុម ចំនួន ៣០០នាក់ បានចូលរួមក្នុងក្លឹបសិក្សាកម្មវិធីមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីបច្ចេកវិទ្យា និងសហគ្រិនភាពរៀបចំឡើងជារៀងរាល់ចុងសប្ដាហ៍ ក្រោមការដឹកនាំរបស់គ្រូនៅតាមគ្រឹះស្ថានសិក្សាសាធារណៈនីមួយៗ ជាមួយក្រុមការងារជំនាញរបស់នាយកដ្ឋានបច្ចេកវិទ្យាព័ត៌មាននៃក្រសួងអប់រំ យុវជន និងកីឡា។

ការរៀបចំឱ្យមានការអនុវត្តកម្មវិធី Technovation នេះឡើង គឺដើម្បីលើកកម្ពស់ការចូលរួមរបស់សិស្សស្រី ក្នុងការបំផុសគំនិតច្នៃប្រឌិតខ្ពស់ ការបង្កើត និងស្វែងរកដំណោះស្រាយថ្មីៗទៅបញ្ហាដែលកើតមានជាក់ស្ដែងក្នុងសហគមន៍ សង្គមជាតិ និងពិភពលោក តាមរយៈការប្រើប្រាស់បច្ចេកវិទ្យា និងសហគ្រិនភាព។

កម្មវិធី Technovation គឺជាកម្មវិធីសិក្សាមួយដែលផ្តោតលើការសិក្សាចំពោះចំណុចមួយចំនួនដូចជា៖

-ការកំណត់បញ្ហាដែលកើតមាននៅក្នុងសហគមន៍ ដែលផ្ដោតលើ SDG 12 និង SDG 13

-ការរៀបចំកម្មវិធីពុម្ពគំរូលើទូរស័ព្ទដៃ និងការសិក្សាទៅលលើកម្មវិធីសរសេរកូដ

-ការសិក្សាពីការរៀបចំគម្រោងអាជីវកម្ម សម្រាប់កម្មវិធីទូរស័ព្ទដៃដែលនឹងត្រូវបង្កើតឡើង

-ការបង្កើតវីដេអូណែនាំពីកម្មវិធីទូរស័ព្ទដៃ

គួរបញ្ជាក់ដែរថា កម្មវិធីបច្ចេកវិទ្យា និងសហគ្រិនភាព (Technovation) មិនត្រឹមតែអាចជួយលើកទឹកចិត្តនិងជំរុញឱ្យក្មេងស្រីចូលរួមក្នុងវិស័យបច្ចេកវិទ្យានិងសហគ្រិនភាពប៉ុណ្ណោះទេ ថែមទាំងអាចជួយជាទុនដល់កុមារីទាំងអស់ ដូចជាបំណិន ការធ្វើការងារជាក្រុម នវានុវត្តន៍ ការដោះស្រាយបញ្ហា និងធ្វើបទបង្ហាញជាដើម៕

ដោយ៖ ថារី