​ពលរដ្ឋមួយចំនួនត្អូញត្អែរដាច់ទឹក​ ខណៈរដ្ឋាករទឹកថា ​បញ្ហានេះដោះស្រាយបាននៅពាក់កណ្ដាលឆ្នាំនេះ​

នៅរយៈពេលប៉ុន្មានសប្ដាហ៍នេះ​ប្រជាពលរដ្ឋមួយចំនួនដែលរស់នៅរាជធានីភ្នំពេញ ​​​ជួបការលំបាក​ជា​ពិសេស​អ្នករស់នៅតំបន់ជាយក្រុងដូចជា ខណ្ឌពោធិ៍សែនជ័យ ខណ្ឌ​ដង្កោ ខណ្ឌកំបូល និង​ក្រុង​តាខ្មៅ ដោយពួកគាត់បន្តត្អូញត្អែរបញ្ហាដាច់ទឹកជាថ្មី ខណៈរដ្ឋាករទឹកស្វយ័តក្រុងភ្នំពេញអះអាងថា បញ្ហាដាច់ទឹក និង​សម្ពាធ​ទឹកចុះខ្សោយនឹងអាចដោះស្រាយបាន​នៅខែឧសភា ឆ្នាំ ២០២៣នេះ បន្ទាប់ពីដាក់ឱ្យប្រើប្រាស់រោងចក្រផលិតទឹកស្អាតនៅបាក់ខែង។

អ្នកស្រី មួង ចាន់នី រស់នៅក្នុងបុរីពិភពថ្មី ខណ្ឌដង្កោ បានឱ្យដឹងថា ផ្ទះអ្នកស្រីដាច់ទឹកចាប់ពីម៉ោង ៦ ព្រឹក រហូតដល់ម៉ោង ១២ យប់ ដែលធ្វើឱ្យអ្នកស្រីជួបការលំបាកប្រចាំថ្ងៃ។

តាមការអះអាររបស់ប្រជាពលរដ្ឋមួយចំនួនប្រាប់ថា បញ្ហាទឹកដាច់កើតឡើងសឹងរាល់ថ្ងៃនារដូវប្រាំងឆ្នាំនេះ ខណៈពួកគាត់ទទូចសុំដំណោះស្រាយពីរដ្ឋាករទឹកក្រុងភ្នំពេញ។

​លោក ផេង ទី អគ្គនាយករងផ្គត់ផ្គង់ទឹក នៃរដ្ឋាករទឹកកម្ពុជា ប្រាប់កម្ពុជាថ្មីនៅថ្ងៃទី ២២ ខែមីនានេះថា មូលហេតុនៃការដាច់ទឹកនៅពេលនេះ ដោយសារតែតម្រូវការ​ប្រើប្រាស់ច្រើន​ជាងសមត្ថភាព​ដែលផលិត ជាក់ស្ដែងតម្រូវការប្រើប្រាស់​មានប្រមាណ ៧៥ ម៉ឺនម៉ែត្រគូប ក្នុងមួយថ្ងៃ ខណៈសមត្ថភាពនៃរោងចក្រទាំង ៤ នៅរាជធានីភ្នំពេញ ផលិតបានតែ ៦៥ ម៉ឺនម៉ែត្រគូប ក្នុងមួយថ្ងៃ ដោយនៅខ្វះប្រមាណ ១០ ម៉ឺនម៉ែត្រគូប ទើបគ្រប់តម្រូវការប្រើប្រាស់​ជាក់ស្ដែងប្រចាំថ្ងៃ។

​លោក ផេង ទី អះអាងថា ករណីនេះ នឹងត្រូវបិទបញ្ចប់​នៅខែឧសភា ឆ្នាំនេះ នៅពេលដែលរោង​ចក្របាក់ខែង សាងសង់ហើយ។

លោកណែនាំឱ្យប្រជាពលរដ្ឋ​ព្យាយាមបើកទឹកនៅពេលយប់ ​នៅពេលដែលសល់ពីការប្រើប្រាស់ ​ខណៈម៉ោង ៦ ដល់ម៉ោង ៨ ព្រឹក និងម៉ោង ៦ ដល់ម៉ោង ៨ ល្ងាច៕

អត្ថបទ៖ ឡេង ដេត