ខេត្តកំពង់ឆ្នាំង គ្រោងប្រកាសបញ្ឈប់ការបន្ទោរបង់​ពាសវាលពាសកាល ក្នុងឆ្នាំនេះ

 រដ្ឋបាលខេត្តកំពង់ឆ្នាំ បានដាក់ចេញនូវការបញ្ឈប់បន្ទោរបង់ពាសវាលពាសកាលត្រឹមខែ មីនា ឆ្នាំ ២០២៣ ខណៈបច្ចុប្បន្ននេះ នៅទូទាំងប្រទេសសម្រេចបានលទ្ធផលប្រមាណ ៩៥ភាគរយហើយ។

លោក ស៊ុន សុវណ្ណារិទ្ធ អភិបាលនៃគណៈអភិបាល ខេត្តកំពង់ឆ្នាំង បានឱ្យដឹងថា រដ្ឋបាលខេត្ត​បានដាក់ចេញ​យុទ្ធសាស្រ្តមួយចំនួន ដើម្បីសម្រេចបានឱ្យបានបញ្ឈប់ការបន្ទោរបង់​ពាសវាលពាសកាល​នៅទូទាំងនៅខេត្ត។

ដើម្បីសម្រេចបានឱ្យបានតាមគោលដៅ លោកអភិបាលខេត្ត បានជំរុញឲ្យប្រជាពលរដ្ឋ ក្នុង ភូមិ ឃុំ ទាំងអស់ រួមគ្នាបញ្ឈប់ការបន្ទោរបង់ ពាសវាល ពាសកាល ដើម្បីឲ្យខេត្ត ស្រុក ទទួលបាន ការប្រកាសទទួលស្គាល់ ជាផ្លូវការថា ខេត្តបញ្ឈប់ការបន្ទោរបង់ ពាសវាល  ពាសកាល (ODF)។

លោកបន្តថា ខេត្តកំពង់ឆ្នាំងទាំងមូលមាន ៨ ស្រុក ក្រុង ក្នុងនោះ ក្រុង១ និងស្រុកចំនួន ៧ ហើយបច្ចុប្បន្ននៅមិនទាន់​សម្រេចបាន​ការងារអនាម័យ គឺស្រុកជុំគិរី និងស្រុកកំពង់លែង។ស្រុកទាំង២ នេះទើបសម្រេច លទ្ធផលបានជាង 70% ប៉ុណ្ណោះ។ បើធៀបនឹងស្រុកដទៃដែលសម្រេចបាន 100%។

លោក អភិបាលខេត្តសង្កត់ធ្ងន់ថា គោលបំណងដែលរដ្ឋបាលខេត្តខិតខំជំរុញ និងបញ្ចប់ការបន្ទោរបង់ពាសវាល ពាសកាល គឺដើម្បីលើកកម្ពស់សេដ្ឋកិច្ច និងសុខភាពប្រជាពលរដ្ឋឲ្យមានភាពល្អប្រសើរ។

អត្ថបទ៖ រុងរឿង