ស្វែងយល់អំពីសិទ្ធិអំណាចរបស់អាជ្ញាធរអគ្គិសនីកម្ពុជា

ការរៀបចំ និងការគ្រប់គ្រងគោលនយោបាយ យុទ្ធសាស្ត្រ និងផែនការរបស់រាជរដ្ឋាភិបាលលើវិស័យអគ្គិសនី គឺជាសមត្ថកិច្ចទទួលខុសត្រូវរបស់ក្រសួងរ៉ែ និងថាមពល។

ចំពោះការធានាឲ្យការផ្ដល់សេវាកម្មអគ្គិសនី និងប្រើប្រាស់អគ្គិសនីប្រកបដោយប្រសិទ្ធភាព គុណភាព ចីរភាព និងតម្លាភាព គឺជាសមត្ថកិច្ចរបស់អាជ្ញាធរអគ្គិសនីកម្ពុជា។

អាជ្ញាធរអគ្គិសនីកម្ពុជា ជាគ្រឹះស្ថានសាធារណៈដែលទទួលសិទ្ធិពីរាជរដ្ឋាភិបាល និង​មាន​ស្វ័យភាព​ក្នុង​ការ​ត្រួត​ពិនិត្យ​លើ​ការ​ធ្វើ​សេវាកម្ម​អគ្គិសនី និង​ការ​គ្រប់​គ្រង​លើ​ទំនាក់​ទំនង​រវាង​ការ​ផ្តល់​ ការ​ទទួល និង​ការ​ប្រើ​ប្រាស់​សេវា​អគ្គិសនី។

អាជ្ញាធរ​អគ្គិសនី​កម្ពុជា​ ​មាន​សមត្ថកិច្ចចេញ​ ដកហូត ឬព្យួរ​អាជ្ញាបណ្ណ​សម្រាប់​ការ​ធ្វើ​​សេវាកម្ម​អគ្គិសនី ព្រមទាំង​ជា​អ្នក​កំណត់​ថ្លៃសេវា ចេញបញ្ញតិ្ត ធ្វើ​ការ​ត្រួត​ពិនិត្យ ដាក់​ពិន័យ និង​​ដោះ​ស្រាយ​​វិវាទ​​ពាក់​​ព័ន្ធ​នឹង​​ការ​​ផ្តល់​​សេវា និង​ការ​​ប្រើ​ប្រាស់​​អគ្គិសនី។

យោងតាមខ្លឹមសារមាត្រា៧ នៃច្បាប់ស្ដីពីអគ្គិសនី គឺអាជ្ញាធរអគ្គិសនីកម្ពុជាមានភារកិច្ចចេញ កែសម្រួល ព្យួរ ដកហូត ឬបដិសេធអាជ្ញាបណ្ណ ហើយអនុម័តថ្លៃ និងបន្ទុកចំណាយផ្សេងៗ ព្រមទាំងលក្ខខណ្ឌនៃសេវាកម្មអគ្គិសនីរបស់អ្នកកាន់អាជ្ញាបណ្ណ។ 

ទន្ទឹមនេះ អាជ្ញាធរអគ្គិសនី ត្រូវកំណត់ឲ្យអនុវត្តបទប្បញ្ញាតិ្ត បែបបទ ស្តង់ដាសម្រាប់កម្មវិធីវិនិយោគរបស់អ្នកកាន់អាជ្ញាបណ្ណ ពិនិត្យឡើងវិញសកម្មភាពហិរញ្ញវត្ថុ និងរចនាសម្ព័ន្ធសហគ្រាសរបស់អ្នកកាន់អាជា្ញបណ្ណក្នុងករណីដែលសកម្មភាព និងរចនាសម្ព័ន្ធនោះ អាចជាឧបសគ្គដោយផ្ទាល់ដល់កិច្ចប្រតិបត្ដិការនៃវិស័យអគ្គិសនី និងប្រសិទ្ធភាពនៃការផ្គត់ផ្គង់អគ្គិសនី។

មាត្រាដដែលនេះ ក៏បានអនុញ្ញាតឲ្យអាជ្ញាធរអគ្គិសនីកម្ពុជា អនុម័ត និងដាក់ឲ្យអនុវត្ដស្ដង់ដាប្រតិបត្ដិសម្រាប់អ្នកកាន់អាជ្ញាបណ្ណ វាយតម្លៃ និងសម្រុះសម្រួលបណ្ដឹងតវ៉ារបស់អ្នកប្រើប្រាស់ រួមទាំងវិវាទកិច្ចសន្យាដែលពាក់ព័ន្ធនឹងអ្នកកាន់អាជ្ញាបណ្ណក្នុងករណីដែលការវិវាទនោះទាក់ទិននឹងការរំលោភបំពានលើលក្ខខណ្ឌដែលមានកំណត់ក្នុងអាជ្ញាបណ្ណ។ ក្នុងនោះដែរ ក៏ត្រូវរៀបចំ និងផ្សព្វផ្សាយរបាយការណ៍លើវិស័យអគ្គិសនី និងព័ត៌មានពាក់ព័ន្ធនានាដែលទទួលពីអ្នកកាន់អាជ្ញាបណ្ណសម្រាប់ជាផលប្រយោជន៍ដល់រាជរដ្ឋាភិបាល និងផលប្រយោជន៍សាធារណៈ។

អាជ្ញាធរអគ្គិសនី ក៏ត្រូវកំណត់កម្រៃនានាដែលត្រូវអនុវត្ដលើអ្នកកាន់អាជ្ញាបណ្ណ កំណត់បែបបទសម្រាប់ការផ្ដល់ព័ត៌មានដល់សាធារណជនអំពីកិច្ចការក្នុងសមត្ថកិច្ចរបស់ខ្លួន ដើម្បីធានាឲ្យអាជ្ញាធរអគ្គិសនីកម្ពុជាអនុវត្ដទៅតាមគោលការណ៍តម្លាភាព។

បន្ថែមពីនេះ អាជ្ញាធរនេះ អាចចេញបញ្ញត្ដិ និងបទបញ្ជាសមស្រប ព្រមទាំងបញ្ជាផ្អាកជាបណ្ដោះអាសន្ន និងជាស្ថាពរចំពោះសេវាកម្មអគ្គិសនី ហើយពិន័យជាប្រាក់ ផ្អាកការប្រើប្រាស់អគ្គិសនី ព្យួរ ឬដកហូតអាជ្ញាបណ្ណចំពោះការរំលោភលើច្បាប់អគ្គិសនី និងលិខិតបទដ្ឋាននានា ជាពិសេស ចាត់វិធានការផ្សេងៗទៀតចំពោះបញ្ហាបន្ទាប់បន្សំ ឬដែលជាផលវិបាកស្ដែងចេញពីមុខងារ ដូចបានរៀបរាប់ខាងលើនេះ៕

ដោយ៖ ធឿន វ៉ាន់សុង