គណបក្ស ២បន្ថែមទៀត បានចុះបញ្ជីគណបក្ស និងបញ្ជីបេក្ខជនឈរឈ្មោះបោះឆ្នោត

គិតត្រឹមព្រឹកថ្ងៃទី ២៥ ខែមេសា ឆ្នាំ ២០២៣នេះ មានគណបក្សនយោបាយចំនួន ២បន្ថែមទៀត បានចុះឈ្មោះគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣។

បើយោងតាមសេចក្ដីជូនព័ត៌មានរបស់ គ.ជ.ប បានឲ្យដឹងថា គណបក្សនយោបាយទាំង ២នោះ រួមមាន៖ គណបក្សកម្លាំងប្រជាធិបតេយ្យ និងគណបក្សសញ្ជាតិកម្ពុជា។

កាលពីថ្ងៃទី ២៤ ខែមេសា ឆ្នាំ ២០២៣ ដែលជាថ្ងៃទីមួយសម្រាប់ការដាក់ពាក្យ និងទទួលពាក្យស្នើសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត មានគណបក្សនយោបាយចំនួន ៤ បានចុះបញ្ជី។

គណបក្សនយោបាយទាំង ៤នោះ រួមមាន៖ គណបក្សប្រជាជនកម្ពុជា គណបក្សយុវជនកម្ពុជា គណបក្សខ្មែររួបរួមជាតិ និងគណបក្សធម្មាធិបតេយ្យ។

សូមជម្រាបថា តាមប្រតិទិននៃការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣ គឺការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ មានរយៈពេល ១៥ថ្ងៃ ដោយចាប់ផ្តើមពីថ្ងៃទី ២៤ ខែមេសា រហូតដល់ថ្ងៃទី ៨ ខែឧសភា ឆ្នាំ ២០២៣៕