មន្ត្រី​ជំនាញខេត្តកំពង់ចាម​ ហ៊ុមព័ទ្ធដីបឹងចារ​ ក្នុងឃុំព្រែករំដែង​​ ដេីម្បីរក្សាទុកជាសម្បត្តិរដ្ឋ​

មន្ត្រី​ជំនាញខេត្តកំពង់ចាម​ បានហ៊ុំព័ទ្ធដីដែលមានបញ្ហា​ក្នុងឃុំព្រែករំដែង​ នៃស្រុកស្រីសន្ធរ​ ដេីម្បីរក្សាទុកជាសម្បត្តិរដ្ឋ​ ខណៈ​មានពលរដ្ឋមួយចំនួនទៀតអាស្រ័យផលលេីដែនសមត្ថកិច្ចជលផល។

លោក​ អ៊ុក​ ណារិន​ នាយខណ្ឌរដ្ឋបាលជលផលកំពង់ចាម​ បានឱ្យដឹងថា​ ការសម្រេចរក្សាទុកផ្ទៃដី “បឹងចារ” ជាសម្បត្តិសាធារណៈ ធ្វើឡើងតាមរយៈលិខិតប្រកាសព័ត៌មានមួយច្បាប់របស់រដ្ឋបាលខេត្តកំពង់ចាម ស្តីពីករណីចោទប្រកាន់អាជ្ញាធរស្រុកស្រីសន្ធរ ពាក់ព័ន្ធការគប់គិតឱ្យមានការឈូសឆាយដីបឹងចារខាងលើ ចែកចាយតាមខ្សែវីដេអូ ក្នុងបណ្តាញសង្គមនានារយៈពេលជិត ១០ នាទី កាលពីថ្ងៃទី៥ ខែឧសភា ឆ្នាំ២០២៣ កន្លងទៅ។

​លោកនាយខណ្ឌបានបញ្ជាក់ទៀតថា​ មិនត្រឹមតែទិញលក់ទេ​ គឺខុសច្បាប់ បេីទោះបីជាអាស្រ័យផលយូរឆ្នាំក៏ដោយ​ ព្រោះផ្ទៃបឹងនេះពុំមានការចេញប្លង់រឹងឡេីយ។

ជាមួយគ្នានេះ​ លោក​ អ៊ុក​ ណារិន​ បានស្នេីបងប្អូនប្រជាពលរដ្ឋចូលរួមសហការផ្សព្វផ្សាយកុំឱ្យមានការឈូសទន្ទ្រានយកដីសម្បត្តិរដ្ឋដូចជាបឹងចារ​ជាដេីម​ ពោលគឺដេីម្បីរក្សាដីព្រៃលិចទឹកជាជម្រកត្រីពងកូននារដូវទឹកជំនន់។

ទន្ទឹមនឹងនេះដែរ​ លោក​ ស៉ឹម​ គង់​ អភិបាលស្រុកស្រីសន្ធរ​ បានបកស្រាយថា​ អាជ្ញាធរគ្រប់ថ្នាក់ពុំមានសិទ្ធិលក់ដីបឹងដែលជាសម្បត្តិរដ្ឋ ដូចការចោទប្រកាន់ពីប្រជាពលរដ្ឋរស់នៅក្នុងឃុំព្រែករំដែង​ ឡេីយ។ ការងារបន្ទាប់នោះ​ លោកអភិបាលស្រុក​ នឹងឱ្យមន្ត្រីសូរិយាដី​ ចុះកំណត់ដីបឹងចារនេះ​ ដេីម្បីកំណត់ព្រំដែនសមត្ថកិច្ចជលផល​រក្សាទុក​ និងពុំអនុញ្ញាតឱ្យបុគ្គលណារំលោភយកដីបឹងទៅធ្វេីកម្មសិទ្ធិផ្ទាល់ខ្លួន​ ទិញលក់ទៀតឡេីយ។

ដោយឡែក​ លោក​ ស្រី​ សុភក្ត្រ័​ អភិបាលរងខេត្ត​ និងជាអ្នកនាំពាក្យសាលាខេត្តកំពង់ចាម​ បានបញ្ជាក់ថា​ ករណីចោទប្រកាន់អាជ្ញាធរស្រុកស្រីសន្ធរ ពាក់ព័ន្ធការគុបគិតគ្នាលក់ដូរ​ និងមិនអនុញ្ញាតឱ្យបុគ្គលណាម្នាក់ធ្វេីការឈួសឆាយដីបឹងចារ គឺក្រុមការងារបានសហការជាគ្នាជាមួយនឹងអាជ្ញាធរមូលដ្ឋាន​ កងកម្លាំងសមត្ថកិច្ច​ជលផល​ ចុះសិក្សាឃេីញថា​ ការទិញលក់ដីបឹងនេះគឺរវាងអ្នកភូមិ និងអ្នកភូមិ ដោយគ្មានបានដឹងលឺពីអាជ្ញាធរមូលដ្ឋានឡេីយ​ ហេីយម្យ៉ាងដីបឹងដែលលេីកឡេីងនេះ គឺអ្នកភូមិបានអាស្រ័យផលយូរឆ្នាំមកហេីយ។

លោក​ ស្រី​ សុភក្ត្រ័​ សង្កត់ធ្ងន់ថា​ ការទិញលក់ដីបឹងនេះគឺរវាងអ្នកភូមិ និងអ្នកភូមិ គឺជាបទល្មេីសខុសច្បាប់​ ហេីយសូមអំពាវនាវដល់បងប្អូនប្រជាពលរដ្ឋផ្តល់ដំណឹងដោយការទទួលខុសត្រូវ​ និងមានប្រភពច្បាស់លាស់តាមច្បាប់​ដេីម្បីរក្សាសម្បត្តិសាធារណៈរដ្ឋ៕​

អត្ថបទ រូបភាព៖​ ឡេក​ ចាន់​ ពេជ្រ