សម្ដេចតេជោ ៖ ការរៀបចំក្រុមការងាររាជរដ្ឋាភិបាលចុះមូលដ្ឋាន ជាការលើកកម្ពស់គណនេយ្យភាព តម្លាភាព និងការទទួលខុសត្រូវ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា នៅតែបន្តចាត់ទុកការរៀបចំក្រុមការងាររាជរដ្ឋាភិបាលចុះមូលដ្ឋាន គឺជាការលើកកម្ពស់គណនេយ្យភាព តម្លាភាព និងការទទួលខុសត្រូវ។

ការថ្លែងរបស់សម្ដេចតេជោ ហ៊ុន សែន ធ្វើឡើងក្នុងកិច្ចប្រជុំបូកសរុបសកម្មភាព និងលទ្ធផលការងាររបស់ ក្រុមការងាររាជរដ្ឋាភិបាលចុះមូលដ្ឋានរាជធានី-ខេត្ត ក្នុងអាណត្តិរាជរដ្ឋាភិបាល សម្រាប់នីតិកាលទី ៦ នៃរដ្ឋសភា និងទិសដៅបន្ត នាល្ងាចថ្ងៃទី ១៩ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន​ បានថ្លែងថា រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា គឺជារដ្ឋាភិបាលដែលបម្រើផលប្រយោជន៍ប្រទេសជាតិ និងប្រជាជន នៅតែបន្តចាត់ទុកការរៀបចំក្រុមការងាររាជរដ្ឋាភិបាលចុះមូលដ្ឋាន គឺជាការលើកកម្ពស់គណនេយ្យភាព តម្លាភាព និងការទទួលខុសត្រូវ រួមសុខរួមទុក្ខជាមួយប្រជាពលរដ្ឋគ្រប់គ្រាលំបាក និងគ្រប់កាលៈទេសៈ។

សម្ដេចតេជោ ហ៊ុន សែន ថ្លែងបន្តថា ដូច្នេះសម្រាប់ដំណាក់កាលពីពេលនេះរហូតដល់ពេលរដ្ឋាភិបាលថ្មី ដែលកើតចេញពីការបោះឆ្នោតចូលកាន់តំណែង ក្រុមការងាររាជរដ្ឋាភិបាលចុះមូលដ្ឋានត្រូវបន្តចុះបំពេញបេសកកម្មតាមូលដ្ឋានឲ្យបានសស្រាក់​សស្រាំ តាមរយៈការពង្រឹងកិច្ចការសំខាន់ៗរួមមាន៖

-ត្រូវបន្តថែរក្សាពង្រឹងសុខសន្ដិភាព ស្ថិរភាព និងរក្សាការពារសណ្ដាប់ធ្នាប់ នៅតាមមូលដ្ឋានឲ្យបានល្អប្រសើរ ដើម្បីបន្តជំរុញការអភិវឌ្ឍសង្គម សេដ្ឋកិច្ច ការលើកកម្ពស់ជីវភាពប្រជាជន។

-ត្រូវបង្កបរិយាកាសល្អ​ប្រសើរ សម្រាប់ការបោះឆ្នោតថ្នាក់ជាតិ ថ្ងៃទី ២៣ ខែកក្កដា  ឆ្នាំ ២០២៣ខាងមុខ។

-ត្រូវសហការអប់រំ បំផុស លើកទឹកចិត្តប្រជាពលរដ្ឋដែលមានឈ្មោះក្នុងបញ្ជីបោះឆ្នោត អញ្ជើញទៅបោះឆ្នោតឲ្យបានគ្រប់ៗគ្នា ហើយត្រូវចូលរួមគោរពអនុវត្តឲ្យបានត្រឹមត្រូវនូវច្បាប់ បទបញ្ជា នីតិវិធីនៃការបោះឆ្នោត សំដៅរួមគ្នាធានាឲ្យមានបោះឆ្នោតខាងមុខនេះ ប្រព្រឹត្តទៅប្រកបដោយលក្ខណៈសេរី ត្រឹមត្រូវ យុត្តិធម៌ ដើម្បីបន្តជំរុញ និងលើកកម្ពស់លទ្ធិប្រជាធិបតេយ្យ និងការអភិវឌ្ឍប្រទេសជាតិ ឲ្យកាន់តែមានការរីកចម្រើនបន្ថែមទៀត។

-ត្រូវពង្រឹង និងចាត់វិធានការស្របតាមច្បាប់ដើម្បីការពារ រារាំងគ្រប់សកម្មភាពដែលប៉ុនប៉ងបំផ្លាញដល់ដំណើរការបោះឆ្នោត ដែលនឹងប្រព្រឹត្តទៅនាពេលឆាប់ៗខាងមុខនេះ។

-ត្រូវខិតខំរួមគ្នាធានាប្រក្រតីភាព និរន្តភាព និងប្រសិទ្ធភាព ការងារនៅតាមក្រសួងស្ថាប័ន និងរដ្ឋបាលគ្រប់ថ្នាក់នៅថ្នាក់ក្រោមជាតិ ដើម្បីជំរុញការអភិវឌ្ឍសង្គម សេដ្ឋកិច្ច ប្រកបដោយចីរភាព ដោយបង្កើនការយកចិត្តទុកដាក់ក្នុងការផ្ដល់សេវាសាធារណៈ ជាមួយនឹងការដោះស្រាយសំណូមពរនានារបស់ប្រជាពលរដ្ឋ ក៏ដូចជាបញ្ហាប្រឈម​នៅតាមមូលដ្ឋាន ប្រកបដោយតម្លាភាព ប្រសិទ្ធភាព រហូតដល់រាជរដ្ឋាភិបាលថ្មី ដែលកើតចេញពីការបោះឆ្នោតចូលកាន់តំណែង៕