ព័ត៌មានជាតិ

កម្លាំងមួកខៀវ៣១នាក់ហ្វឹកហ្វឺនបច្ចេកទេសប្រើប្រាស់ម៉ាស៊ីនរ៉ូបូតចាប់គ្រឿងផ្ទុះមុនចេញទៅបំពេញបេសកកម្មនៅយូអិន

បានផុស

៥ years មុន

នៅ

ថ្ងៃចន្ទ ២៥ មករា ២០២១

ដោយ

ភ្នំពេញ ៖ កងកម្លាំងមួកខៀវកម្ពុជាចំនួន ៣១រូប ហ្វឹកហ្វឺនបច្ចេកទេសប្រើប្រាស់ម៉ាស៊ូនរ៉ូបូត ក្នុងការបោសសំអាតគ្រាប់មីន និងយុទ្ធភណ្ឌមិនទាន់ផ្ទុះ មុនចេញទៅបំពេញបេសកកម្មសន្តិភាពរបស់អង្គការសហប្រជាជាតិ នៅពេលខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប្រាក់ សុទ្ធ អគ្គនាយករងមជ្ឈមណ្ឌលជាតិរក្សាសន្តិភាព តំណាងនាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាពបានមានប្រសាសន៍នៅក្នុងពិធីបើកវគ្គនៅថ្ងៃទី២៥មករានេះថា កម្លាំងមួកខៀវកម្ពុជា ហ្វឹកហ្វឺនបច្ចេកទេសប្រើប្រាស់ម៉ាស៊ីនរ៉ូបូតនេះ គឺបង្រៀនដោយយោធាចារ្យជាតិផ្ទាល់តែម្តង ដើម្បីឲ្យកម្លាំងមួកខៀវទទួលបានចំណេះដឹងក្នុងការប្រើប្រាស់ឧបករណ៍ជំនួយក្នុងការប្រឆាំង និងបន្សាបឧបករណ៍កែច្នៃ និងដោះមីន ដើម្បីបញ្ចៀសហានិភ័យផ្សេងៗព្រោះថា ពួកគេនឹងត្រូវត្រៀមបញ្ជូនទៅបំពេញបេសកកម្មនៅសាធារណរដ្ឋលីបង់, អាហ្វ្រិកកណ្តាល, និងម៉ាលី នាពេលខាងមុខ។

លោកបានបន្តទៀតថា កងកម្លាំងមួកខៀវដែលត្រៀមខ្លួនដើម្បីចូលរួម បំពេញបេសកកម្មក្រោមឆ័ត្រអង្គការសហប្រជាជាតិនេះ ពួកគេត្រូវតែមានសមត្ថភាពគ្រប់គ្រាន់ និងមានជំនាញច្បាស់លាស់ហើយសុទ្ធតែបានឆ្លងកាត់វគ្គហ្វឹកហ្វឺនត្រឹមត្រូវ ដែលមានយោធាចារ្យជាតិ និងអន្តរជាតិ ដែលពីសហរដ្ឋអាមេរិក ចិន ឥណ្ឌា បារាំង ជប៉ុន មន្ត្រីUNMASS របស់អង្គការសហប្រជាជាតិ និងបណ្តាប្រទេសជាមិត្តកម្ពុជាជាច្រើននាក់ទៀត។

គួរបញ្ជាក់ថា ចាប់តាំងពីឆ្នាំ២០០៦មក កម្ពុជាបានបញ្ជូនកម្លាំង ចំនួនសរុបប្រមាណ ៧១២៣នាក់ ហើយ ក្នុងនោះមានស្ត្រី៤១៩នាក់ ទៅចូលរួមបេសកកម្មរបស់អង្គការសហប្រជាជាតិ ខណៈបច្ចុប្បន្នកម្ពុជាមានកម្លាំងចំនួនប្រមាណជិត ១០០០នាក់ ដែលកំពុងបំពេញបេសកកម្មនៅប្រទេសចំនួន៤ រួមមានសាធារណរដ្ឋស៊ូដង់ខាងត្បូង អាហ្វ្រិកកណ្តាល លីបង់ និងម៉ាលីដែលធ្វើអោយប្រទេសកម្ពុជាក្លាយជាប្រទេសបរិច្ចាគកម្លាំងរក្សាសន្តិភាពច្រើនជាងគេក្នុងតំបន់អាស៊ាន៕

ដោយ ៖ សំអឿន