ឯកឧត្តមបណ្ឌិត ហ៊ុន ម៉ាណែត និងលោក ឃួង ស្រេង នឹងដឹកនាំក្បួនដង្ហែ បិទយុទ្ធនាការឃោសនា បោះឆ្នោតនៅថ្ងៃទី២១ ខែកក្កដា

ភ្នំពេញ៖ លោកបណ្ឌិត ហ៊ុន ម៉ាណែត បេក្ខជនឈរឈ្មោះពេញសិទ្ធិលេខរៀងទី១ នៅមណ្ឌលរាជធានី ភ្នំពេញ និងលោក ឃួង ស្រេង ប្រធានគណៈកម្មាធិការគណបក្សរាជធានីភ្នំពេញនឹងដឹកនាំក្បួនដង្ហែ បិទយុទ្ធនាការឃោសនា បោះឆ្នោតជ្រើសតាំងតំណាងរាស្ត្រនីតិកាលទី៧ នៅថ្ងៃទី២១ ខែកក្កដា ឆ្នាំ២០២៣ខាងមុខ  ដែលមានអ្នកចូលរួម ប្រមាណជិត៦ម៉ឺននាក់ ដោយចាប់ផ្តើមចេញពីបរិវេណទីធ្លាមុខសាលមហោស្រពកោះពេជ្រ និងបិទបញ្ចប់នៅតំបន់​បឹងកក់​ក្នុងមូលដ្ឋានខណ្ឌដូនពេញ។ នេះបើតាមការបញ្ជាក់ឱ្យដឹងក្នុងកិច្ចប្រជុំពិភាក្សា ការងាររៀបចំក្បួន​បិទយុទ្ធនា​ការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នាព្រឹកថ្ងៃទី១៦ កក្កដា នេះ ក្រោមអធិប​តីភាពលោក ឃួង ស្រេង សមាជិកគណៈកម្មាធិការកណ្តាលគណបក្ស ប្រជាជនកម្ពុជា និងជាប្រធានគណៈ​កម្មាធិការគណបក្សរាជធានីភ្នំពេញ ដោយមានការចូលរួមពី គណៈកម្មាធិការគណបក្សខណ្ឌទាំង១៤ អង្គភាពពាក់​ព័ន្ធចំណុះអោយគណៈកម្មាធិការគណបក្សរាជធានីភ្នំពេញ នៅមន្ទីរបក្សរាជធានីភ្នំពេញ។

បើតាមគណៈកម្មាធិការគណបក្សប្រជាជនកម្ពុជារាជធានីភ្នំពេញ អ្នកចូលរួមសរុបប្រមាណ៦ម៉ឺននាក់ ក្នុងចំនួននេះ មានសមាជិកាបក្ស ចាំទទួលស្វាគមន៍តាមដងផ្លូវ ប្រមាណជិត៤០០០០នាក់ លើចម្ងាយផ្លូវប្រមាណ១០​គីឡូម៉ែត្រ​ជាមួយនឹងការប្រគំតន្ត្រីចំនួន១០ទីតាំង ដោយចាប់ផ្តើមចេញដំណើរពីកោះពេជ្រ និងមកបិទបញ្ចប់នៅ ក្នុងតំបន់បឹងកក់។

ក្នុងកិច្ចប្រជុំនោះលោកឃួង ស្រេង បានណែនាំអោយប្រធានគណកម្មាធិការគណបក្សខណ្ឌ ដែលមានមូល​ដ្ឋាន​របស់ខ្លួន​ស្ថិតនៅក្នុងតម្រាយផ្លូវនៃការដង្ហែក្បួននេះ ត្រូវទទួលខុសឱ្យបានខ្ពស់បំផុតលើ ការរក្សាសន្តិសុខ សណ្តាប់ធ្នាប់ អនាម័យនិងបរិស្ថាន ដើម្បីឱ្យការដង្ហែក្បួនបិទយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ របស់គណបក្សប្រជាជនកម្ពុជា នៅរាជធានីភ្នំពេញនេះ ទទួលបាននូវភាពគគ្រឹកគគ្រេង ជាមួយនឹងការរក្សា​បានទាំង​សន្តិសុខ សណ្តាប់ធ្នាប់ល្អប្រសើរ៕

អត្ថបទ ៖ ស្រីរ័ត្ន