ខ្យល់កន្ត្រាក់បក់រលំអគារសិក្សាទ្រុឌទ្រោមមួយខ្នងក្នុងក្រុងកំពង់ឆ្នាំង

អគារសិក្សាសង់អំពីឈើទ្រុឌទ្រោមដែលមានអាយុជាង៣០ឆ្នាំមួយខ្នងបានរលំដួលខ្ទេចខ្ទីដោយសារខ្យល់កន្ត្រាក់។ ហេតុការណ៍ខាងលើនេះបានកើតឡើងនៅវេលាម៉ោង១៦និង៣០នាទី ល្ងាចថ្ងៃទី២៤ ខែកក្កដា ឆ្នាំ២០២៣ នៅក្នុងវិទ្យាល័យព្រះបាទសុរាម្រិត ស្ថិតនៅក្នុងភូមិដំណាក់ពពួល សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង។

លោកគ្រូវិទ្យាល័យព្រះបាទសុរាម្រិតបានឲ្យដឹងថា អាគារសិក្សានេះបានសាងសង់ឡើងនៅអំឡុងឆ្នាំ១៩៨៧ ហើយក្នុងករណីខ្យល់កន្ត្រាក់បណ្ដាលឱ្យដួលរលំអគារខាងលើនេះ មិនបណ្តាលឲ្យមានមនុស្សណាម្នាក់រងរបួសឡើយ។

លោកគ្រូនៅក្នុងវិទ្យាល័យសុរាម្រិតបានបន្តឲ្យដឹងថា អគារសិក្សាឈើមួយខ្នង មានបួនបន្ទប់នេះ គណៈកម្មការគ្រប់គ្រងវិទ្យាល័យធ្លាប់បានប្រជុំវាយតម្លៃថា ចាស់ទ្រុឌទ្រោមមានអាយុកាលជាង៣០ឆ្នាំហើយដែលមិនអាចឲ្យសិស្សចូលរៀនបានឡើយ ហើយក៏បានព័ទ្ធខ្សែ និងដាក់បំរាមមិនឲ្យសិស្សចេញចូលក្នុងអគារនេះផងដែរ។ ហើយក៏បានសុំគោលការទៅការិយាល័យអប់រំក្រុង មន្ទីរអប់រំខេត្ត ដើម្បីរុះរើចេញផងដែរ ដែលខាងមន្ទីរក៏បានបញ្ជូនក្រុមការងារបច្ចេកទេស មកពិនិត្យ និងវាយតម្លៃផងដែរ នៅតែថ្ងៃកំណត់រុះរើចេញតែប៉ុណ្ណោះ៕

អត្ថបទ៖ ឈៀងធារិទ្ធ