​ទឹកទន្លេស្រែពកជន់ឡើងលិចតំបន់ទំនាប​ក្នុងស្រុកលំផាត់​

ស្ថានភាពទឹកទន្លេស្រែពកបានហូរចូលជន់លិចតំបន់ទំនាបក្នុងឃុំមួយចំនួន​នៃស្រុកលំផាត់ ដែល​ទឹក​មានកម្ពស់ជិត១២ ម៉ែត្រ (១១,៦២) នៅល្ងាចថ្ងៃទី ​០១ ខែសីហា ខណៈ កម្ពស់ទឹកត្រូវប្រកាសឱ្យប្រុងប្រយ័ត្ន ១២.៥០​ ម៉ែត្រ ហើយទឹកនៅតែបន្តកើនឡើងក្នុងកម្រិតយឺតៗនៅឡើយ។

ក្រសួងធនធានទឹក និងឧតុនិយមបានប្រកាសថា ស្ថានភាពអាកាសធាតុកំពុងមានការប្រែប្រួលកើតឡើងដោយសារឥទ្ធិពលនៃប្រព័ន្ធសម្ពាធទាប (ITCZ) បណ្តាលឲ្យនៅតំបន់ផ្ទៃរងទឹកភ្លៀងនៃទន្លេមេគង្គ ក្នុងប្រទេសថៃ ឡាវ និងប្រទេសកម្ពុជា មានភ្លៀងធ្លាក់ច្រើននៅក្នុងអាងទន្ល មេគង្គ។

នៅភាគខាងលើនៃប្រទេសកម្ពុជាមាន ខេត្តស្ទឹងត្រែង ទឹកនឹងអាចឡើងដល់កម្ពស់ ៧,៦៥ ម៉ែត្រ, ខេត្តក្រចេះ ទឹកនឹងអាចឡើងដល់កម្ពស់ ១៦,៧០ ម៉ែត និងខេត្តកំពង់ចាម ទឹកនឹងអាចឡើងដល់កម្ពស់ ៩,៩០ ម៉ែត្រ។

ក្រសួងធនធានទឹក និងឧតុនិយមបានបញ្ជាក់ថា ទឹកទន្លេដែលហក់ឡើងនៅពេលនេះ នៅមិនទាន់ដល់កម្រិតប្រកាសឲ្យមានការប្រុងប្រយ័ត្ននៅឡើយទេ តែទឹកអាចលិចតំបន់ ទំនាបមួយចំនួនអមដងទន្លេ និងហូរចូលទៅតាមបណ្តាព្រែកមួយចំនួន។

តាមការព្យាករណ៍របស់ក្រសួងធនធានទឹក និងឧតុនិយមចេញផ្សាយនៅថ្ងៃទី ០២ ខែសីហានេះ បង្ហាញថា ទន្លេមេគង្គ-ស្ទឹងត្រែងមានកម្ពស់ ៧,៦៥ ម៉ែត្រ។ ទន្លេមមេគង្គ-ក្រចេះ ទឹកមានកម្ពស់ ១១៦,៨៦ ម៉ែត្រ។ ទន្លេមេគង្គ-កំពង់ចាម ៩,៨៨ ម៉ែត្ររ។ ទន្លេបាសាក់-ចតុមុខ ទឹកមានកម្ពស់ ៥,៥០ ម៉ែត្រ។ ទន្លេមេគង្គ-អ្នកលឿង មានកម្ពស់ ៣,៧៤ ម៉ែត្រ។

ទន្លេបាសាក់-កោះខែលទឹកមានកម្ពស់ ៥,១០ ម៉ែត្រ។ ទន្លេសាបព្រែកក្ដាមទឹកមានកម្ពស់ ៤,៣៦ ម៉ែត្រ៕