ប្រជាសហគមន៍កែលម្អរមណីយដ្ឋានភ្នំជម្រកសត្វឲ្យកាន់តែមានភាពទាក់ទាញ

ប្រជាសហគមន៍បានរៀបចំកែលម្អរមណីយដ្ឋានភ្នំជម្រកសត្វឱ្យមានសោភ័ណភាពដូចជាការរៀបចំតូបអង្គុយកម្សាន្តជួសជុលជណ្ដើរឡើងទៅលើភ្នំឲ្យមានសុវត្ថិភាពបង្កើតសួនបុប្ផាបន្ថែមឱ្យមានភាពទាក់ទាញឱ្យភ្ញៀវទេសចរមកកំសាន្តតំបន់ធម្មជាតិមួយនេះ បានកាន់តែច្រើន ដែលមានទីតាំងនៅភូមិឆ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។

លោក កែវ សុភាព ក្រុមប្រឹក្សាឃុំសំអាងបានបញ្ជាក់ថា៖ ប្រជាសហគមន៍បានរៀបចំរមណីយដ្ឋាននេះឱ្យកាន់តែមានសោភ័ណភាព រួមជាមួយធម្មជាតិជាកន្លែងប្រវត្តិសាស្ត្រដែលមានស្រាប់ ដើម្បីត្រៀមលក្ខណៈទទួលភ្ញៀវទេសចរមក​លេងកម្សាន្តនៅថ្ងៃឈប់សម្រាកចុងសប្តាហ៍ ឬពេលមានពិធីបុណ្យទាន ដើម្បីបង្កើនភាពសប្បាយរីករាយជូនបងប្អូនយើង។

លោកបន្តថា៖ ផ្លូវចូលទៅកាន់រមណីយដ្ឋាននេះមានភាពងាយស្រួលហើយ នៅឡើយតែស្ពានឆ្លងកាត់អូរឆ្កូតតភ្ជាប់ផ្លូវនេះមួយតែប៉ុណ្ណោះ ដែលអាជ្ញាធរមូលដ្ឋានកំពុងស្វែងរកដំណោះស្រាយជួយសហគមន៍ ការដោះស្រាយនេះយើងនិងធ្វើការពិភាគ្សា ក្នុងក្រុមប្រឹក្សាឃុំ ដើម្បីលើកសំណូមពរជូនទៅថ្នាក់ដឹកនាំ ឬស្ថាប័នណាមួយ ដែលលោកមានលទ្ធភាព  ដែលនិងជួយបានកន្លែងនេះ ជាពិសេសស្ថាប័នជំនាញៗគាត់មានលទ្ធភាពជួយធ្វើស្ពានឱ្យបានរឹងមាំ ហើយឡានធំអាចចូលមកដល់តំបន់ទេសចរណ៍យើងនេះ។

លោក មឹង រដ្ឋា ប្រធានសហគមន៍រមណីយដ្ឋានអេកូទេសចរណ៍ភ្នំជម្រកសត្វ បានសំដែងការគាំទ្រចំពោះអាជ្ញាធរឃុំ  ដែលបានគិតគូ មកដល់ចំណុចនេះ ព្រោះប្រជាពលរដ្ឋយើងក៍ចង់ឃើញមូលដ្ឋាភូមិឃុំមានការអភិវឌ្ឍផ្នែកហេដ្ឋារចនាសម្ព័ន្ធនេះផងដែរ។

លោកបន្តថា៖ ដើម្បីធ្វើឱ្យឆ្លើយតបទៅនិងការយកចិត្តទុកដាក់របស់អាជ្ញាធរ និងស្ថាប័នជំនាញ ប្រជាសហគមន៍និងខិតខំប្រឹងប្រែង រៀបចំរមណីយដ្ឋានអេកូទេសចរណ៍នេះឱ្យមានរីកចម្រើនប្រកបដោយបរិយាប័ន្ន អញ្ចឹងគណៈកម្មការសហគមន៍របស់យើងប្រឹងប្រែងនិងបែងចែកតាមផ្នែកតាមផែន ធ្វើកិច្ចការសំអាតបរិស្ថានផង ហើយពាក់ព័ន្ធនិងវិស័យឡើងភ្នំ គឺគណៈកម្មការបានរៀបចំត្រួសត្រាយផ្លូវ ដើម្បីឱ្យភ្ញៀវទេសចរបានឡើងទៅដល់លើកំពូលភ្នំ។

លោក វី ផលលុយ ប្រធានប្រតិបត្តិអង្គការសេប៉ាប្រចាំខេត្តស្ទឹងត្រែង បានសាទរចំពោះការប្រឹងប្រែងនេះ ព្រោះកន្លងមកអង្គការសេប៉ាបានសហការជាមួយមន្ទីរទេសចរណ៍ជួយរៀបចំពង្រឹងសមត្ថិភាពដល់មន្ត្រីសហគមន៍ ទាំងផ្នែក មគ្គុទេស ទេសចរណ៍ ផ្នែកសេវាកម្ម ផ្នែកបរិស្ថាន និងហេដ្ឋារចនាសម្ព័ន្ធផងដែរ។

សូមបញ្ជាក់ថា រមណយដ្ឋានភ្នំជម្រកសត្វនេះស្ថិតនៅក្នុងភូមិឆ្វាំង ឃុំសំអាង ស្រុកថាឡាបរិវ៉ាត់ខេត្តស្ទឹងត្រែង មានចម្ងាយពីទីរួមខេត្តប្រមាណជាង៤០គីឡូម៉ែត្រ ដោយធ្វើដំណើរតាមផ្លូវជាតិលេខ០៩ស្ទឹងត្រែង-ព្រះវិហារ៕

អត្ថបទ៖ ងិនលីម