និស្សិតកម្ពុជា ២៨ នាក់ ទទួល​អាហារូបករណ៍​បន្តសិក្សានៅកូរ៉េ

សម្រាប់ឆ្នាំ២០២៣ សាធារណរដ្ឋកូរ៉េប្រចាំនៅព្រះរាជាណាចក្រកម្ពុជា បានផ្តល់អាហារូបករណ៍​ដល់និស្សិត​កម្ពុជាចំនួន​២៨ នាក់ ទៅបន្តការសិក្សាថ្នាក់ក្រោយឧត្តមសិក្សានៅប្រទេសកួរ៉េ។

បើតាមសេចក្ដីប្រកាសព័ត៌មានរបស់ស្ថានទូតកូរ៉េបានឱ្យដឹងថា ឆ្នាំនេះនិស្សិតកម្ពុជាចំនួន ២៨ នាក់ក្នុងនោះអនុបណ្ឌិត ២៧ នាក់ និងបណ្ឌិត ១ នាក់ត្រូវបានជ្រើសរើសជានិស្សិត សម្រាប់កម្មវិធីអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ ថ្នាក់ក្រោយឧត្តមសិក្សា ហើយគ្រោង នឹងចូលទៅសាធារណរដ្ឋកូរ៉េ នៅចុងខែសីហានេះ។

មុនចាកចេញទៅបន្តការសិក្សានៅសាធារណរដ្ឋកូរ៉េ ស្ថានទូតនៃសាធារណរដ្ឋកូរ៉េបានប្រារព្ធកម្មវិធីតម្រង់ទិសសម្រាប់​និស្សិតអាហារូបករណ៍ ដោយមានការចូលរួមពីនិស្សិតកម្ពុជាដែលជាប់អាហារូបករណ៍ថ្នាក់អនុបណ្ឌិត និងបណ្ឌិត និងតំណាងអតីតនិស្សិតសិក្សានៅសាធារណរដ្ឋកូរ៉េ ដែលបានធ្វើមាតុភូមិនិវត្តន៍​ហើយកំពុងបំពេញការងារក្នុងវិស័យផ្សេងៗ បន្ទាប់ពីបានបញ្ចប់ការសិក្សានៅសាកលវិទ្យាល័យក្នុងសាធារណរដ្ឋកូរ៉េ។

ថ្លែងនៅក្នុងកម្មវិធីតម្រង់ទិសសម្រាប់ និស្សិតអាហារូបករណ៍កាលពីថកងៃទី ១៧ សីហា លោក  PARK Jung-Wook ឯកអគ្គរដ្ឋទូតនៃសាធារណរដ្ឋកូរ៉េប្រចាំនៅកម្ពុជាបានអបអរសាទរចំពោះនិស្សិតដែលបាន​ជាប់​អាហារូបករណ៍ឧបត្ថម្ភដោយ​រដ្ឋាភិបាលសាធារណរដ្ឋកូរ៉េ (GKS) ថ្នាក់ក្រោយឧត្តមសិក្សា។

តាមរយៈកម្មវិធីអាហារូបករណ៍ ថ្នាក់ក្រោយ ឧត្តមសិក្សានេះលោកឯកអគ្គរដ្ឋទួតរំពឹងថា និស្សិតកម្ពុជានឹងកសាងចំណេះជំនាញ និងបទពិសោធន៍នៅសាធារណរដ្ឋកូរ៉េដោយផ្អែកលើចំណុចទាំងនេះ ពួកគេនឹងបំពេញការងារយ៉ាងសកម្មទៅថ្ងៃ អនាគត។

លោក នឿម សុខវិឆ័យ ជាអតីតនិស្សិតអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េថ្នាក់អនុ-បណ្ឌិត ឆ្នាំ​២០១០-១៤ បានមានប្រសាសន៍ថា «សូមចងចាំថា អ្នកតំណាងឱ្យព្រះរាជាណាចក្រកម្ពុជានៅសាធារណរដ្ឋកូរ៉េ និងតំណាងឱ្យព្រះរាជាណាចក្រកម្ពុជា និងសាធារណរដ្ឋកូរ៉េនៅពេលអ្នកត្រឡប់មកវិញ»។

លោក ម៉ក់ ចាន់កុសល និស្សិតអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋ កូរ៉េ (ថ្នាក់អនុបណ្ឌិត​)​លើកឡើថា៖ «ខ្ញុំមានគម្រោងចូលរៀនផ្នែកគ្រប់គ្រងពាណិជ្ជកម្មនៅសាកលវិទ្យាល័យ Soongsil ក្នុងសាធារណរដ្ឋកូរ៉េ។ បន្ទាប់ពីទទួលបានសញ្ញាបត្រអនុបណ្ឌិត ខ្ញុំសង្ឃឹមថានឹងចូលរួមចំណែកក្នុងការអភិវឌ្ឍទំនាក់ទំនងទ្វេភាគីរវាងសាធារណរដ្ឋកូរ៉េ និងព្រះរាជាណាចក្រកម្ពុជា តាមរយៈការជំរុញ ការវិនិយោគរបស់សាធារណរដ្ឋកូរ៉េនៅព្រះរាជាណាចក្​រកម្ពុជា និងរួមចំណែកបង្កើតការងារថ្មីៗនៅ ព្រះរាជាណាចក្រកម្ពុជា»។

កម្មវិធីអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ មានគោលបំណងជំរុញការផ្លាស់ប្តូរការអប់រំជាអន្តរជាតិ និង​លើកកម្ពស់មិត្តភាពរវាងប្រទេសនានា ដោយការផ្តល់ឱកាសឱ្យនិស្សិតបរទេសបានសិក្សានៅ គ្រឹះស្ថានឧត្តមសិក្សានៅក្នុងសាធារណរដ្ឋកូរ៉េ។

កម្មវិធីអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ មានថ្នាក់បរិញ្ញាបត្ រ(GKS-U) និងថ្នាក់ក្រោយឧត្តមសិក្សា (GKS-G)។ អត្ថប្រយោជន៍ផ្សេងៗជាច្រើន ត្រូវបានផ្តល់ជូនដល់និស្សិតអាហារូបករណ៍ ដែលជាប់រួមមាន សំបុត្រ​យន្តហោះទៅមក ថ្លៃបណ្តុះបណ្តាលភាសាកូរ៉េ ថ្លៃសិក្សា ថ្លៃធានារ៉ាប់រងផ្នែកវេជ្ជសាស្ត្រ និងប្រាក់ឧបត្ថម្ភសម្រាប់ការរស់នៅជាដើម។

រដ្ឋាភិបាលនៃសាធារណរដ្ឋកូរ៉េ ក្នុងរយៈពេលកន្លងមកនេះ បានជ្រើសរើសនិស្សិតអាហារូបករណ៍ប្រហែល ៣០០ នាក់ពីព្រះរាជាណាចក្រកម្ពុជា៕

អត្ថបទ៖ សំអឿន