ផ្លូវកៅស៊ូប្រវែង​ជាង ៦ គីឡូម៉ែត្រ​ទៅតំបន់ទេសចរណ៍​កូនសត្វ​​សម្រេច​ស្ថាបនា​បានជាង ៦៥ ភាគរយ

លោក ទាវ គា មេការដ្ឋានតំណាងក្រុមហ៊ុនសាងសង់​បានប្រាប់ឲ្យដឹងថា ផ្លូវក្រាលកៅស៊ូមួយ​ខ្សែ​ដែលមានប្រវែង​ជាង​ ៦ គីឡូម៉ែត្រ​ត​ភ្ជាប់ចាប់ពី​ផ្លូវ​បំបែកលេខ៣៣ នៅចំណុចគល់ស្ពានក្បាលរមាសដែលស្ថិតនៅ ឃុំត្រពាំងសង្កែ ក្បែរសាលាស្រុកទឹកឈូ ឆ្ពោះទៅតំបន់កសិទេសចរណ៍កូនសត្វ ឬទំនប់ប្រទាក់ក្រឡា​ស្ថាបនាសម្រេចបានប្រមាណជាង ៦៥ ភាគរយ ដែលគ្រោងនឹងបញ្ចប់នៅឆ្នាំ២០២៤ខាងមុខ។

លោក ទាវ គា បានប្រាប់ឲ្យដឹងថា ផ្លូវ​នេះ​ពីមុនជាផ្លូវក្រាលគ្រួសក្រហម ហើយពេលនេះត្រូវបានស្ថាបនាជាផ្លូវក្រាលកៅស៊ូវិញ។

មួយរយៈពេលកន្លងមកនេះ ដោយមានភ្លៀងធ្លាក់ច្រើនពិបាកក្នុងការស្ថាបនា។ បើយោងតាមការលើកឡើងរបស់លោក ទាវ គា បច្ចុប្បន្នក្រុមការងារកំពុងមមាញឹកក្នុងស្ថាបនា ហើយ​បើតាមការប៉ាន់​ស្មានអាចរួចរាល់មុនផែនការរបស់គម្រោងនៅខែមីនា ឆ្នាំ២០២៤។

ប្រជាពលរដ្ឋដែលរស់នៅអមតាមបណ្តោយផ្លូវដែលកំពុងស្ថាបនាបានឱ្យដឹងថា ផ្លូវនេះពីមុនជាផ្លូវក្រាលគ្រួសក្រហមដែលមានការលំបាក តែនៅពេលនេះបានស្ថាបនាជាផ្លូវក្រាលកៅស៊ូយ៉ាងស្អាតល្អ អាចធ្វើឱ្យការធ្វើដំណើររបស់ប្រជាពលរដ្ឋ ប្រជាកសិករ និងភ្ញៀវទេសចរជាតិនិងអន្តរជាតិទៅលេងតំបន់កសិ-ទេសចរណ៍កូនសត្វ​និងទំនប់ប្រទាក់ក្រឡាបានស្រួល។

អ្នកស្រី សុខ ស្រី ជាប្រជាពលរដ្ឋរស់នៅភូមិកូនសត្វ ឃុំកូនសត្វ ស្រុកទឹកឈូ បានសម្តែងត្រេកអរយ៉ាងខ្លាំងពេលឃើញក្រុមហ៊ុនធ្វើផ្លូវកៅស៊ូមួយខ្សែនេះស្ថាបនាបានជិតរួចរាល់។

ផ្លូវនេះសំខាន់ណាស់សម្រាប់ពលរដ្ឋទូទៅ ពិសេសភ្ញៀវទេសចរ​ដើម្បីងាយស្រួលក្នុងការធ្វើដំណើរទៅតំបន់រមណីយដ្ឋានផ្សេងៗ។ នៅពេលផ្លូវនេះស្ថាបនាបានល្អ និងអាចទាក់ទាញភ្ញៀវទេសចរកាន់តែច្រើន ធ្វើឱ្យជីវភាពប្រជាពលរដ្ឋកាន់តែល្អប្រសើរថែមទៀត តាមរយៈការលក់ដូរកសិផលផ្សេងៗ។

បើតាមការបញ្ជាក់របស់ប្រជាពលរដ្ឋឃុំកូនសត្វ បច្ចុប្បន្នមូលដ្ឋានឃុំទាំងមូលមានការរីកចម្រើន ដែលមានដូចជាផ្លូវថ្នល់ សាលារៀន មណ្ឌលសុខភាព ប្រព័ន្ធធារាសាស្ត្រខ្វាត់ខ្វែង។

ចំណែកឯការងារដាំដុះបន្លែដំណាំរបស់ប្រជាពលរដ្ឋ ក៏សមប្រកបដែរសម្រាប់ឆ្នាំនេះ និយាយជារួមជីវភាពពលរដ្ឋក្នុងឃុំកាន់តែមានភាពល្អប្រសើរឡើងជាលំដាប់៕

អត្ថបទ៖ សឹង រ៉ាត់