នាយករដ្ឋមន្ត្រីថៃ៖ កម្ពុជាមានស្ត្រីដឹកនាំស្ថាប័នកំពូលជាតិ ជាគម្រូមួយ ដែលថៃត្រូវរៀនសូត្រតាមកម្ពុជា  

នាយករដ្ឋមន្ត្រីថៃ លោក សេដ្ឋា ថាវីស៊ីន នៅចំពោះមុខសម្ដេច ឃួន សុដារី ប្រធានរដ្ឋសភា បានសម្ដែងការអបអរដល់សម្ដេចប្រធានរដ្ឋសភា ក្រោយ​ក្លាយជាស្ដ្រីទី១របស់កម្ពុជាដែលជាអ្នកដឹកនាំស្ថាប័នកំពូលជាតិ ហើយការណ៍ដែលកម្ពុជាមានស្ត្រីជាអ្នកដឹកនាំកំពូលជាតិនេះ គឺជារឿងដែលថៃត្រូវរៀនសូត្រតាមកម្ពុជា ។ នេះបើតាមសេចក្ដីប្រកាសព័ត៌មាន ស្ដីពីជំនួបរវាងសម្ដេចរដ្ឋសភាកម្ពុជា និងនាយករដ្ឋសភាកម្រាស់ពីរទំព័រចេញដោយ អគារលេខាធិការដ្ឋានរដ្ឋសភា  ចេញផ្សាយនាល្ងាចថ្ងៃទី២៨ ខែកញ្ញានេះ។

សេចក្ដីប្រកាសព័ត៌មានបានសរសេរថា  “លោក សេដ្ឋា ថាវីស៊ីន បានសម្ដែងក្តីមោទកភាពជាមួយ សម្ដេចរដ្ឋសភាធិបតី ក្នុងនាមជាស្ត្រីដំបូង របស់កម្ពុជាដែលទទួលតួនាទីជាអ្នកដឹកនាំស្ថាប័នកំពូលរបស់ជាតិ ដែលនេះជាគំរូមួយសម្រាប់ប្រទេសថៃត្រូវ រៀនសូត្រពីកម្ពុជា”។

លោក សេដ្ឋា ថាវីស៊ីន​ ក៏បានជម្រាបពីការណ៍ដែល​ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាទទួលបដិសណ្ឋារកិច្ចលោកយ៉ាងកក់ក្ដៅ ក៏ដូចជាជម្រាបពីលទ្ធផលសំខាន់ៗ មួយចំនួនដែល លោក បានពិភាក្សា និងឯកភាពជាមួយ សម្តេចធិបតី ហ៊ុន ម៉ាណែត នៅក្នុងការលើក កម្ពស់កិច្ចសហប្រតិបត្តិការរវាងប្រទេសទាំងពីរឱ្យមានការរីកចម្រើនថែមទៀត ទាំងផ្នែកសង្គម សេដ្ឋកិច្ច ពាណិជ្ជកម្ម និងជាពិសេស ការកសាងបន្ទាត់ព្រំដែនជាព្រំដែនសន្តិភាព មិត្តភាព និងអភិវឌ្ឍន៍។

ជាមួយគ្នានេះ សម្តេចរដ្ឋសភាធិបតី ឃួន សុដារី បានអបអរនូវលទ្ធផលនៃជំនួបរវាង នាយករដ្ឋមន្ត្រីថៃ និង សម្ដេចធិបតី ហ៊ុន ម៉ាណែត កាលពីព្រឹកមិញនេះ ថាជាជំនួបដែលបានឆ្លុះបញ្ចាំងពីការប្តេជ្ញាចិត្តរួមគ្ន ក្នុងការបន្តពង្រឹងនិងពង្រីកទំនាក់ទំនង ចំណងមិត្តភាព សាមគ្គីភាព និងកិច្ចសហប្រតិបត្តិការល្អរវាងប្រទេស ទាំងពីរ ឱ្យកាន់តែរឹងមាំ ស្អិតល្មួត និងមានប្រសិទ្ធភាពឡើងថែមទៀត ដើម្បីផលប្រយោជន៍នៃប្រទេស និង ប្រជាជនទាំងសងខាង។ រដ្ឋសភាកម្ពុជាសូមវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាល ប្រទេសទាំងពីរ ដែលបានជំរុញនិងលើកកម្ពស់កិច្ចសហប្រតិបត្តិការលើគ្រប់វិស័យ។

ជាមួយគ្នានេះ សម្ដេចរដ្ឋសភាធិបតី បានស្នើដល់ នាយករដ្ឋមន្ត្រីថៃ បន្តជំរុញកិច្ចសហប្រតិបត្តិការ រវាងប្រទេសទាំងពីរឱ្យកាន់តែរឹងមាំ និងគ្រប់ជ្រុងជ្រោយថែមទៀត ដូចជាខាងវិស័យពាណិជ្ជកម្ម ទេសចរណ៍ ការអប់រំ និងកសិកម្មជាដើម។

ចំពោះការងាររដ្ឋសភាវិញ សម្តេចរដ្ឋសភាធិបតី ឃួន សុដារី បានស្នើនាយករដ្ឋមន្ត្រីថៃ ជួយជម្រុញលើកកម្ពស់ទំនាក់ទំនង និងកិច្ចសហប្រតិបត្តិការរវាងរដ្ឋសភាទាំងពីរឱ្យកាន់តែសកម្មទ្វេឡើង នៅក្នុងនោះ រដ្ឋសភាកម្ពុជាស្នើដល់រដ្ឋសភាប្រទេសថៃ ដែលមានបទពិសោធន៍បច្ចេកវិទ្យាឌីជីថល ជួយគាំទ្រដល់ រដ្ឋសភាកម្ពុជាក្នុងកំណែទម្រង់ដើម្បីឱ្យក្លាយទៅជាសភាឌីជីថលនាពេលខាងមុខ។

ជាចុងក្រោយ ក្នុងនាមតំណាងរាស្ត្រ និងក្នុងនាមថ្នាក់ដឹកនាំរដ្ឋសភា សម្តេចរដ្ឋសភាធិបតី បានថ្លែងអំណរគុណ យ៉ាងជ្រាលជ្រៅជូនរាជរដ្ឋាភិបាលប្រទេសថៃ ដែលបានបង្កលក្ខណៈងាយស្រួល និងផ្ដល់លក្ខខណ្ឌការងារល្អ ក៏ដូចជាបានការពារសិទ្ធិពលករ និងពលរដ្ឋកម្ពុជា ដែលកំពុងធ្វើការនិងស្នាក់នៅក្នុងប្រទេសថៃ៕

ដោយ៖ ង៉ិល ណារ៉ាត់