ព័ត៌មានជាតិ

អភិបាលខេត្តបន្ទាយមានជ័យថាខេត្តស្រះកែវគ្មានសិទ្ធិមកកំណត់ព្រំដែនបំពានសមត្ថកិច្ចរបស់ JBC នោះទេ

បានផុស

៧ ខែ មុន

នៅ

ថ្ងៃព្រហស្បតិ៍ ៩ តុលា ២០២៥

ដោយ

អភិបាលខេត្តបន្ទាយមានជ័យលោក អ៊ុំ រាត្រី បានប្រាប់ទៅអភិបាលខេត្តស្រះកែវ ប្រទេសថៃថាខេត្តបន្ទាយមានជ័យនឹងធ្វើទៅតាមអ្វីដែលជាការព្រមព្រៀងគ្នារវាងកម្ពុជានិងថៃ ក្នុងកិច្ចកិច្ចប្រជុំ JBC ប៉ុណ្ណោះ ហើយខេត្តស្រះកែវគ្មានសមត្ថកិច្ចមកកំណត់ព្រំដែនខណ្ឌសីមានោះឡើយ។

ក្នុងលិខិតផ្ញើទៅកាន់អភិបាលខេត្តស្រះកែវនៅថ្ងៃទី៨ ខែតុលា ឆ្នាំ២០២៥ លោក អ៊ុំ រាត្រី បានបញ្ជាក់ថាការប្រមូលផ្ដុំរបស់ពលរដ្ឋដែលរងគ្រោះពីការបណ្ដេញចេញដោយអាជ្ញាធរថៃគឺធ្វើឡើងដើម្បីការពារដីធ្លី ស្រែចម្ការ និងទ្រព្យសម្បត្តិស្របច្បាប់របស់ពួកគាត់តែប៉ុណ្ណោះ។ លោកបានបញ្ជាក់ក្នុងលិខិតនោះផងដែរថា ទីតាំងដែលរដ្ឋបាលខេត្តស្រះកែវតវ៉ានៅភូមិជោគជ័យ ឃុំអូរបីជាន់ ស្រុកអូរជ្រៅនោះ ប្រជាពលរដ្ឋខ្មែរបានរស់នៅកាន់កាប់ និងអាស្រ័យផលជាយូរមកហើយមុនការចូលជាធរមាននៃ MOU ឆ្នាំ២០០០។

ក្នុងលិខិតនោះសរសេរបញ្ជាក់ថា៖ «រដ្ឋបាលខេត្តយើងទាំងពីរមិនមានសមត្ថកិច្ចកំណត់ព្រំដែនក្នុងតំបន់មិនទាន់មានការខណ្ឌសីមាព្រំដែនរួចរាល់នោះទេ»។

រដ្ឋបាលខេត្តបន្ទាយមានជ័យបានប្រកាន់ជំហរថា ខេត្តនេះគោរពតែអ្វីដែលជាការព្រមព្រៀងគ្នារវាងប្រទេសទាំងពីរ ពោលគឺត្រូវរង់ចាំលទ្ធផលនៃកិច្ចប្រជុំ JBC។

កាលពីថ្ងៃទី២៤ ខែកញ្ញា អភិបាលខេត្តស្រះកែវរបស់ថៃលោក បរិយា ពោធិ៍សាត់ បានផ្ញើលិខិតមួយច្បាប់មកកាន់អភិបាលខេត្តបន្ទាយមានជ័យ តវ៉ាចំពោះការសាងសង់ជម្រកបណ្ដោះអាសន្ន និងការឈូសឆាយតំបន់ជុំវិញ ដល់ពលរដ្ឋដែលតវ៉ាចំពោះការបណ្ដេញចេញនៅក្នុងភូមិជោគជ័យដោយអាជ្ញាធរកម្ពុជា។ ខណៈរដ្ឋបាលខេត្តបន្ទាយមានជ័យបានបញ្ជាក់វិញថាការធ្វើជម្រកបណ្ដោះអាសន្ន និងឈូសឆាយដីនោះគឺក្នុងគោលបំណងថែរក្សាសន្តិសុខ សណ្ដាប់ធ្នាប់របៀបរៀបរយនៅក្នុងតំបន់នេះក្នុងពេលប៉ះទង្គិចនាពេលកន្លងមក និងដើម្បីជាមធ្យោបាយការពារខ្លួនទប់ស្កាត់ឧបទ្ទវហេតុនានាប៉ុណ្ណោះ។

ក្នុងកំណត់ហេតុនៃកិច្ចប្រជុំពិសេសគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី១០ ខែកញ្ញា ឆ្នាំ២០២៥ កម្ពុជានិងថៃបានឯកភាពគ្នារក្សាស្ថានភាពដដែល រហូតដល់មានការងារខណ្ឌសីមាព្រំដែនត្រូវបានបញ្ចប់។

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត កាលពីថ្ងៃទី៨ ខែតុលា ក៏បានបង្ហាញក្ដីសង្ឃឹមថាថៃនឹងអាចរៀបចំសមាសភាពរបស់ខ្លួនដើម្បីចូលរួមកិច្ចប្រជុំគណៈកម្មការចម្រុះព្រំដែនប្រទេសទាំងពីរបានឆាប់ៗនាពេលខាងមុខ បន្ទាប់ពីប្រទេសថៃខកខានប្រជុំកាលពីខែកញ្ញាកន្លងមកដោយមូលហេតុថៃរង់ចាំការរៀបចំសមាសភាពថ្មីរបស់ JBC ថៃ៕