ក្រសួងការបរទេស រៀបចំការប្រកួតកីឡាវាយកូនគោលមិត្តភាពការទូត-ធុរកិច្ច

ក្រសួងការបរទេស  និងកិច្ចសហប្រតិបត្តិការអន្តរជាតិ បានរៀបចំព្រឹត្តិការណ៍ប្រកួតកីឡាវាយកូនគោលមិត្តភាពការទូត-ធុរកិច្ច ដែលជាគំនិតផ្តួចផ្តើមរបស់ លោកឧបនាយករដ្ឋមន្ត្រី សុខ ចិន្តាសោភា  នៅក្លឹបវាយកូនគោលដ៏ធំមួយ ក្នុងរាជធានីភ្នំពេញ  នាថ្ងៃទី៣ ខែតុលានេះ។

បើតាមសេចក្ដីប្រកាសព័ត៌មានរបស់ក្រសួងការបរទេស ការរៀបចំការប្រកួតកីឡាវាយកូនគោលមិត្តភាពាការទូតសេដ្ឋកិច្ចនេះ ដើម្បីអនុវត្ត «យុទ្ធសាស្រ្តការទូតសេដ្ឋកិច្ច» ដែល ក្រសួងបានដាក់ចេញកាលពីឆ្នាំ២០២១ ហើយដែលយុទ្ធសាស្ត្រនេះ នឹងរួមចំណែកធ្វើឱ្យសម្រេចបាន ចក្ខុវិស័យរបស់ប្រទេសកម្ពុជា ជាប្រទេសមានចំណូលមធ្យមកំរិតខ្ពស់នៅឆ្នាំ២០៣០ និងប្រទេផ្ទះមេច្រកជា ចំណូលខ្ពស់នៅឆ្នាំ២០៥០។

ថ្លែងនៅក្នុងពិធីប្រគល់ជ័យលាភី លោក សុខ ចិន្ដាសោភា បានគូសបញ្ជាក់អំពីសារៈ សំខាន់នៃព្រឹត្តិការណ៍នេះថា «ការប្រកួតកីឡាវាយកូនគោលមិត្តភាពការទូត-ធុរកិច្ចនាថ្ងៃនេះ គឺជា ព្រឹត្តិការណ៍កីឡាលើកដំបូងរបស់ក្រសួង ដើម្បីគាំទ្រនូវយុទ្ធសាស្ត្រការទូតសេដ្ឋកិច្ច។ ការប្រកួតនេះ មិនមែនជាវេទិកាសម្រាប់ប្រកួតប្រជែងគ្នានោះទេ ក៏ប៉ុន្តែ នេះគឺជាវេទិកាដើម្បីបង្កើតនូវមិត្តភាព និង កិច្ចសហប្រតិបត្តិការរវាងស្ថាប័នរដ្ឋ អ្នកការទូត ជាមួយនឹងវិស័យឯកជននៅកម្ពុជា»។

ជាក់ស្ដែង ការប្រកួតកីឡាវាយកូនគោលមិត្តភាពការទូត-ធុរកិច្ចនេះ ត្រូវបានដឹកនាំការប្រកួតដោយ លោក អ៊ុច បូររិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស ដោយមានការអញ្ជើញចូលរួមពី ទេសរដ្ឋមន្ត្រី រដ្ឋមន្ត្រីមួយចំនួន ថ្នាក់ដឹកនាំ និងមន្ត្រីជាន់ខ្ពស់នៃក្រសួងការបរទេស និងសហប្រតិបត្តិការ អន្តរជាតិ ថ្នាក់ដឹកនាំមកពីក្រសួង-ស្ថាប័នពាក់ព័ន្ធ ប្រធានបេសកកម្មការទូតស្ថាប័ន អង្គការអន្តរជាតិ មួយចំនួនប្រចាំនៅកម្ពុជា ព្រមទាំងវិនិយោគិន/ធុរជនជាតិ និងអន្តរជាតិដែលកំពុង មានប្រតិបត្តិការ នៅកម្ពុជា៕