ករណីស្លាប់ដោយផ្តាសាបក្សី៖ អាជ្ញាធរខេត្តស្វាយរៀង ចាត់វិធានការបន្ទាន់ដោយកម្ទេចចោលបក្សីដែលពាក់ព័ន្ធ

ក្រុមការងារអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយមន្ទីរកសិកម្ម រក្ខាប្រមាញ់ និងនេសាទ និងការិយាល័យផលិតកម្ម និងបសុព្យាបាលខេត្តស្វាយរៀង​ ព្រមទាំងអាជ្ញាធរមូលដ្ឋាននៅព្រឹកថ្ងៃចន្ទនេះ បានចុះអនុវត្តវិធានការបសុព្យាបាលនៅភូមិម្រាក់ទាប ឃុំត្រស់ ស្រុករមាសហែក ខេត្តស្វាយរៀង។ ទីតាំងនេះ គឺមានករណីវិជ្ជមានជំងឺផ្តាសាយបក្សីលើមាន់០១​ក្បាលកាលពីយប់ថ្ងៃទី០៨ ខែតុលា ឆ្នាំ២០២៣ ក្នុងចំណោមមាន់ទាសរុប៣៤ក្បាល ងាប់២០ក្បាល របស់គ្រួសារឈ្មោះ ចិន សុខ។

បន្ទាប់ពីចុះដល់ទីតាំងជាក់ស្តែង អាជ្ញាធរពាក់ព័ន្ធក្នុងខេត្តស្វាយរៀង បានអនុវត្តវិធានការបន្ទាន់ដំបូង គឺទី១.ដុតកម្ទេចចោលបក្សីចំនួន១៤ក្បាល របស់គ្រួសារខាងលើដែលមានមាន់ ១ក្បាលបានរកឃើញវិជ្ជមានវីរុសផ្តាសាយបក្សី និងបានអនុវត្តការបាញ់ថ្នាំសម្លាប់មេរោគ និងណែនាំដល់ក្រុមគ្រួសារ។ ទី២ គឺចំពោះទីតាំងគេហដ្ឋានដែលមានមនុស្សស្លាប់ ក្រុមការងារកំពុងអនុវត្តវិធានការបសុព្យាបាល និងទី៣ គឺក្រុមការងារកំពុងចុះពិនិត្យស្ថានភាពចិញ្ចឹមបក្សីនៅតំបន់ជុំវិញ ជាពិសេសនៅតំបន់ជុំវិញមានករណីមនុស្សស្លាប់ ដើម្បីអនុវត្តការចចារកម្ទេចចោលបក្សី និងអនុវត្តការបាញ់ថ្នាំសម្លាប់មេរោគ។

ជាមួយនេះ ក្រុមការងារ ក៏បានបន្ត​ចុះបាញ់ថ្នាំ និងប្រមូលបក្សីយកមកដុតបំផ្លាញចោល និងយកសំណាក សរុប២៦ក្បាល ក្នុងនោះ បានដុតកំទេចចោលចំនួន២១ក្បាល (មាន់ចំនួន ១៧ក្បាល និងទា ៤ក្បាល) និងយកសំណាកទៅពិនិត្យចំនួន៤ក្បាល(មាន់៣ក្បាល ទា១ក្បាល។

ការចាត់វិធានការបន្ទាន់របស់អាជ្ញាធរខេត្តស្វាយរៀងនេះ គឺបន្ទាប់ពីក្រសួងសុខាភិបាលកម្ពុជា ​បានប្រកាសថា បុរស​ម្នាក់​អាយុ ៥០ឆ្នាំ​ បាន​ស្លាប់​ដោយសារជំងឺ​ផ្តាសាយបក្សី (H5N1) នៅថ្ងៃទី៧ ខែតុលា ឆ្នាំ២០២៣។ បុរស​រូបនេះ មានទីលំនៅក្នុងភូមិ ម្រាក់ទាប ឃុំត្រស់ ស្រុករមាសហែក ខេត្តស្វាយរៀង និង​ត្រូវបានបញ្ជាក់ថា វិជ្ជមានវីរុសផ្ដាសាយបក្សីប្រភេទហាស់ ៥ អ៊ុន ១ (H5N1) ពីវិទ្យាស្ថានជាតិសុខភាពសាធារណៈ។

ប្រឈមនឹងបញ្ហានេះ  រដ្ឋបាលខេត្តស្វាយរៀង បានអំពាវនាវដល់ប្រជាពលរដ្ឋ ឱ្យបង្កើននូវប្រុងប្រយ័ត្ន​ ហើយប្រសិនបើបានឃើញមានសត្វឈឺ​ ឬងាប់ ​សូមកុំប៉ះពាល់​ ត្រូវរាយការណ៍ជូនសមត្ថកិច្ចដែលនៅជិតបំផុត ដើម្បីចុះទៅពិនិត្យ​ និងចាត់វិធានការភ្លាមៗ បានទាន់ពេលវេលា៕

 

 

 

 

 

+5

A