ម៉ោង៦ព្រឹកស្អែក ស្ពានកោះនរា នឹងបើកឱ្យធ្វើចរាចរណ៍បណ្ដោះអាសន្ន

នៅវេលាម៉ោង៦៖ ០០ នាទីព្រឹក ថ្ងៃទី២០ ខែតុលា ស្ពានបេតុងខ្សែកាប កោះពេជ្រ កោះនរា នឹងដាក់ឱ្យពលរដ្ឋធ្វើចរាចរណ៍បណ្ដោះអាសន្ន ដើម្បីជួយសម្រួលការធ្វើដំណើររបស់ពលរដ្ឋ ក៏ដូចជាកាត់បន្ថយការកកស្ទះចរាចរនៅត្រង់ចំណុចការដ្ឋានសាងសង់ស្ពានអាកាសព្រះមុន្នីវង្ស។

បើតាមគណនីហ្វេសប៊ុកផ្លូវការរបស់មន្ទីរសាធារណរាជធានីភ្នំពេញបានសរសេរថា “ដើម្បីកាត់បន្ថយការកកស្ទះចរាចរនៅការដ្ឋានសាងសង់ស្ពានអាកាសព្រះមុនីវង្ស ស្ពានកោះនរា នឹងដាក់អោយធ្វើដំណើរជាបណ្តោះអាសន្ន ចាប់ពីថ្ងៃស្អែកទី២០ខែតុលាឆ្នាំ២០២៣ វេលាម៉ោង ៦:០០ព្រឹកតទៅ”។

នេះជាលើកទី២ហើយ ដែលរដ្ឋបាលរាជធានីភ្នំពេញអនុញ្ញាតឱ្យប្រជាពលរដ្ឋធ្វើចរាចរជាបណ្ដោះអាសន្ននៅលើស្ពានបេតុងខ្សែកាបកោះពេជ្រ កោះនរានេះ។ លើកទី១កន្លងទៅ រដ្ឋបាលរាជធានីភ្នំពេញបានបើកឱ្យពលរដ្ឋធ្វើដំណើរលើស្ពាននេះ ចាប់ពីថ្ងៃទី១៣ ដល់ថ្ងៃទី១៦ អំឡុងពិធីបុណ្យភ្ជុំបិណ្ឌ ដែលការបើកឱ្យធ្វើចរាចរនេះ គឺអនុវត្តតាមបទបញ្ជារបស់សម្ដេចនាយករដ្ឋមន្ត្រីកម្ពុជា៕