ពិធីសម្ពោធស្ពាន​កោះពេជ្រ-កោះនរា ត្រូវប្ដូរពេលប្រារព្ធពីពេលព្រឹកមកធ្វើនៅពេលរសៀលវិញ

ពិធីសម្ពោធដាក់ឱ្យប្រើប្រាស់ជាផ្លូវការ ស្ពានបេតុងខ្សែកាបកោះពេជ្រ-កោះនរា ត្រូវបានប្រកាសថាប្ដូរពេលប្រារព្ធកម្មវិធីដែលត្រូវធ្វើនៅវេលាព្រឹកព្រលឹមថ្ងៃទី១៥ខែវិច្ឆិកា ទៅធ្វើនៅពេលរសៀលថ្ងៃដដែលវិញ។ នេះបើតាមសេចក្តីជូនដំណឹងរបស់រដ្ឋបាលរាជធានីភ្នំពេញ នៅព្រលប់ថ្ងៃទី១៤ ខែវិច្ឆិកានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីវេលាម៉ោង៣៖០១ រសៀល ថ្ងៃទី១៤ ខែវិច្ឆិកា ក្រុមការងារព័ត៌មានរបស់សម្ដេចនាយករដ្ឋមន្ត្រីបានប្រកាសនៅលើបណ្ដាញសង្គមតេឡេក្រាមថា នៅវេលាពេលព្រឹកថ្ងៃទី១៥ ខែវិច្ឆិកា ឆ្នាំ២០២៣ សម្ដេចនាយករដ្ឋមន្ត្រី នឹងអញ្ជើញសម្ពោធដាក់ឱ្យប្រើប្រាស់ជាផ្លូវការស្ពានបេតុងខ្សែកាបកោះពេជ្រ កោះនរា ។

យ៉ាងណាបើតាមសេចក្ដីជូនដំណឹងរបស់រដ្ឋបាលរាជធានីភ្នំពេញលេខ ១០៤/២៣សជណ នៅព្រលប់ថ្ងៃទី១៤ ខែវិច្ឆិកា គឺមានខ្លឹមសារស្ដីពីការលើកពេលសម្ពោធឱ្យប្រើប្រាស់ស្ពានបេតុងខ្សែកាបកោះពេជ្រ-កោះនរា ដែលគ្រោងប្រារព្ធកម្មវិធីសម្ពោធនៅពេលព្រឹកថ្ងៃទី១៥ នៅប្រារព្ធកម្មវិធីសម្ពោធនៅពេលរសៀលវិញ។

យ៉ាងចំពោះការប្ដូរពេលប្រារព្ធកម្មវិធីនេះ សេចក្ដីជូនដំណឹងរបស់សាលារាជធានីភ្នំពេញ មិនបានទម្លាយអំពីមូលហេតុដែលនាំឱ្យមានការផ្លាស់ប្ដូរពេលវេលាប្រារព្ធកម្មវិធីនេះនោះទេ។

បើតាមសេចក្ដីជូនដំណឹងដដែល ក៏បានជូនដំណឹងស្ដីពីការផ្អាកការធ្វើដំណើរលើស្ពានបេតុងខ្សែកាបកោះពេជ្រ-កោះនរា និងជុំវិញទីតាំងប្រារព្ធជាបណ្ដោះអាសន្ន ចាប់ពីម៉ោង១០ ÷០០នាទីព្រឹក រហូតដល់ចប់កម្មវិធី។

ជាការកត់សម្គាល់ បើរាប់ចាប់តាំងពីការចូលកាន់តំណែងជានាយករដ្ឋមន្ត្រីកម្ពុជាកាលពីថ្ងៃទី២២ ខែសីហា ឆ្នាំ២០២៣ នេះជាលើកទីមួយហើយដែលមានការផ្លាស់ប្ដូរពេលវេលាប្រារព្ធកម្មវិធីដែលសម្ដេចធិបតី ហ៊ុន ម៉ាណែត អញ្ជើញជាអធិបតី ភ្លាមៗបែបនេះ ៕

ដោយ៖ង៉ិល ណារ៉ាត់