គ្រប់គ្រឹះស្ថាន​សាលា​អន្តរជាតិ​ នឹងដាក់បញ្ចូល​កម្មវិធីភាសាខ្មែរពេញលេញនៅឆ្នាំសិក្សាថ្មី

លោកបណ្ឌិត សភាចារ្យ ហង់ជូន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជននិងកីឡាបានមានប្រសាសន៍ថា គ្រប់គ្រឹះស្ថានសិក្សាឯកជនទាំងអស់នឹងដាក់បញ្ចូលកម្មវិធីសិក្សាភាសាខ្មែរមានលក្ខណៈពេញលេញនៅក្នុងឱកាសបវេសនកាលឆ្នាំថ្មីខាងមុខនេះ។

ថ្លែងក្នុងសន្និសីទសារព័ត៍មានកាលពីរសៀលថ្ងៃទី ២៧ ខែ​តុលា នៅទីស្តីការក្រសួង លោកឧបនាយករដ្ឋមន្ត្រីបានបន្តថា «ការបង្រៀងភាសាខ្មែរនៅតាមសាលាអន្តរជាតិ ក្រសួងបានចេញសេចក្តីណែនាំហើយក៏បានរៀបចំកម្មវិធីសិក្សាជាភសាខ្មែរហើយមានសាលាអន្តរជាតិមួយចំនួន ក៏បានចាប់ផ្តើមការពង្រីកបង្រៀនភាសាខ្មែរពិសេសក្នុងឱកាសបវេសនកាលថ្មីនេះការបង្រៀនភាសាខ្មែរនឹងមានលក្ខណពេញលេញសម្រាប់គ្រប់គ្រឹះស្ថានសិក្សាឯកជនតែម្តង»។

យោងតាមសេចក្តីណែនាំរបស់ក្រសួងអប់រំ យុវជន និងកីឡានៅថ្ងៃទី ១៣ ខែកុម្ភៈ ឆ្នាំ២០២៣ តម្រូវឱ្យសាលាអន្តរជាតិ ត្រូវដាក់បញ្ចូលកម្មវិធីសិក្សាមុខវិជ្ជាភាសាខ្មែរ មុខវិជ្ជាវប្បធម៌ និងមុខវិជ្ជាអរិយធម៌ខ្មែរ ក្នុងម៉ោងសិក្សាជាកាតព្វកិច្ចដើម្បីលើកកម្ពស់ការបង្រៀនភាសាខ្មែរ និងការយល់ដឹងពីវប្បធម៌ និងអរិយធម៌ដល់សិស្សានុសិស្ស ចាប់ពីឆ្នាំសិក្សា​២០២២-២០២៣ តទៅ។

សេចក្តីណែនាំនេះតបតាមសំណើរបស់សម្តេចមហាបវរធិបតី ហ៊ុន ម៉ាណែត ដែលស្នើដល់រដ្ឋមន្ត្រីក្រសួងអប់រំក្នុងឱកាស​ដែលសម្តេចធិបតីអញ្ជើញចូលរួមក្នុងពិធីប្រកាសក្រុមប្រឹក្សាភិបាលអាណត្តិថ្មី និងប្រគល់បណ្ណសរសើរគ្រូបង្វឹកឆ្នើមប្រចាំឆ្នាំ២០២២ ដល់លោកគ្រូ អ្នកគ្រូបុគ្គលិកអប់រំ នៃសហព័ន្ធសេវាអប់រំនៅកម្ពុជា កាលពីថ្ងៃទី១២ ខែកុម្ភៈ ឆ្នាំ​២០២៣។

ការស្នើសុំក្រសួងអប់រំនេះដោយសារសម្តេចធិបតី ហ៊ុនម៉ាណែត សង្កតឃើញថា ក្មេងខ្មែរដែលសិក្សាសាលាអន្តរជាតិ ខ្សោយការយល់ដឹងខេមរភាសា និងមិនសូវយល់ពីសីលធម៌និងទំនៀមទម្លាប់ខ្មែរ ហើយកូនខ្មែរដែលសិក្សានៅសាលាអន្តរជាតិមិនចេះអក្សរខ្មែរ។

សម្តេចធិបតី ហ៊ុនម៉ាណែត បានស្នើឱ្យសាលាឯកជន ដែលអនុវត្តកម្មវិធីសិក្សាអន្តរជាតិ ត្រូវដាក់បញ្ចូលកម្មវិធីសិក្សាមុខវិជ្ជាភាសាខ្មែរ មុខវិជ្ជាវប្បធម៌ និងមុខវិជ្ជាអរិយធម៌ខ្មែរ ក្នុងម៉ោងសិក្សាដើម្បីពង្រឹងភាសាខ្មែរនិងបណ្តុះសីលធម៌ វប្បធម៌ខ្មែរ ប៉ុន្តែមិនឲ្យប៉ះពាល់ដល់ទំនើបកម្មនៃការអប់រំនោះឡើយ។

សម្តេចធិបតី ហ៊ុនម៉ាណែត​ បានសង្កត់ធ្ងន់ថា «ប្រសិនបើមនុស្សបាត់អត្តសញ្ញាណ គឺយ៉ាប់ហើយ ហើយបើក្មេងជំនាន់នេះបាត់អត្តសញ្ញាណ បាត់វប្បធម៌ សីលធម៌ ពេលដល់ដល់ជំនាន់កូនរបស់គាត់គាត់នឹងប្រដៅទូន្មានកូនរបស់គាត់ដោយរបៀបណា?»៕

អត្ថបទ៖ សំអឿន