តើសភាយុវជន បានរួមចំណែកអ្វីខ្លះជួយដល់ សង្គមជាតិ?

សភាយុវជន បានបង្កើតឡើងកាលពីឆ្នាំ២០២២ ហើយបើគិតមកដល់ពេលបច្ចុប្បន្ននេះ មានសមាជិកចំនួន ១២រូប ដែលបានរួមចំណែក និងធ្វើសកម្មភាពជាច្រើននៅក្នុងសង្គម។ គិតមកដល់ពេលនេះ តើសភាយុវជន បានរួមចំណែកអ្វីខ្លះជួយដល់សង្គមជាតិ?

នៅក្នុងកិច្ចសម្ភាសពិសេសជាមួយ«កម្ពុជាថ្មី» លោក ឈឹម ទិត្យអមតៈ អ្នកដឹកនាំ និងសម្របសម្រួលនៃសភាយុវជន បានឱ្យដឹងថា ចាប់តាំងពីឆ្នាំ២០២២ រហូតមកដល់ពេលនេះ សភាយុវជន​ បានរួមគ្នាបង្កើតគម្រោងចំនួន៤ រួចមកហើយ ដែលគម្រោងទី១ គឺ«រៀនពីលុយ» ទី២«ភូមិអាស៊ាន» ទី៣«រៀនពីលុយ វគ្គ២» និងទី៤ «បុណ្យវប្បធម៌» ដែលទើបតែបញ្ចប់កាលពីពេលថ្មីៗនេះ។ លោកថា កម្មវិធីទាំងអស់នេះ គឺបានរួមចំណែកក្នុងការចែករំលែកនូវចំណេះដឹង និងផ្សព្វផ្សាយអំពីវប្បធម៌របស់កម្ពុជា ដើម្បីឱ្យយុវជន និងប្រជាពលរដ្ឋខ្មែរទាំងមូល ក៏ដូចជាបរទេសបានស្គាល់បន្ថែមទៀតពីវប្បធម៌របស់ខ្មែរ។

ជាមួយគ្នានេះ លោក ឈឹម ទិត្យអមតៈ បានបង្ហើបឱ្យដឹងថា សម្រាប់ឆ្នាំបន្ទាប់ សភាយុវជន​​ នឹងមានកម្មវិធីពិសេសៗជាច្រើន ហើយក៏មានការជ្រើសរើសនូវសមាជិកបន្ថែមទៀតផងដែរ ដើម្បីផ្តល់ឱកាសឱ្យយុវជនបានចូលរួមចំណែក ក៏ដូចជា អាចចែករំលែកនូវអ្វីដែលពូកគាត់ចង់ធ្វើ។ ចំពោះលក្ខខណ្ឌដែលអាចចូលជាសមាជិកសភាយុវជនបាន គឺត្រូវមានអាយុ​ចាប់ពី ១៨ ទៅ ២៦ឆ្នាំ ជាពិសេស ត្រូវមានឆន្ទៈ គំនិតថ្មីៗ និងគោលបំណងក្នុងការដោះស្រាយបញ្ហាអ្វីមួយ ដែលធ្វើឱ្យប្រទេសកម្ពុជាកាន់តែមានភាពប្រសើរឡើងជាងនេះបន្ថែមទៀត។ ដូច្នេះ សម្រាប់យុវជន ដែលមានចំណាប់អារម្មណ៍អាចតាមដានតាមរយៈទំព័រហ្វេសបុក ដែលមានឈ្មោះថា «Youth Assembly» ដើម្បីទទួលបានព័ត៌មានបន្ថែមសម្រាប់ចុះឈ្មោះចូលរួម ជាមួយសមាជិកសភាយុវជន។

អ្នកដឹកនាំសភាយុវជនដដែលរូបនេះ បានបញ្ជាក់បន្ថែមថា ការចូលរួមជាមួយសភាយុវជន ក៏មាននូវវេទិកាមួយដែលអាចផ្តល់ឱកាសឱ្យយុវជនស្វែងរកខ្លួនឯង និងដឹងបន្ថែមពីអ្វីដែលខ្លួនចង់ធ្វើ។ ជាពិសេសទៅទៀតនោះ យុវជន ក៏អាចទទួលបាននូវអត្ថប្រយោជន៍ដូចជា ការបង្ហាត់បង្រៀន ការជួបប្រជុំ ដើម្បីទទួលបានបទពិសោធផ្សេងៗ ចូលរួមការងារសង្គម និងមានទំនាក់ទំនងល្អជាមួយអ្នកដទៃ ដើម្បីមានជំនាញច្បាស់លាស់ក្នុងការធ្វើគម្រោងនីមួយៗ ដែលជាបទពិសោធមួយក្នុងការជួយស្វែងរកអាជីពការងាររបស់ពួកគាត់នៅពេលអនាគត៕