ចម្លាក់ ៥ អង្គ ប្រទះឃើញនៅខេត្តកំពង់ឆ្នាំង ជារូបចម្លងក្លែងក្លាយ

ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង បានអះអាងថា រូបចម្លាក់ ៥ ព្រះអង្គដែលអ្នកនេសាទប្រទះឃើញនៅរសៀលថ្ងៃទី ២៦ ខែធ្នូ ឆ្នាំ២០២៣ នៅស្រុកកំពង់ត្រឡាច ខេត្តកំពង់ឆ្នាំង ជារូបកសាងចម្លង មិនមែនជារូបពិតនោះឡើយ។

រូបចម្លាក់ទាំង ៥ អង្គ ត្រូវបានអ្នកនេសាទប្រទះឃើញ កាលពីរសៀលថ្ងៃទី ២៦ ខែធ្នូ ឆ្នាំ២០២៣ នៅក្នុងភូមិគៀនឃ្លាំង ឃុំអំពិលទឹក ស្រុកកំពុងត្រឡាច ខេត្តកំពង់ឆ្នាំង។

តារយៈហ្វេសប៊ុក (Facebook) ផ្លូវការរបស់លោក សុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងបានឱ្យដឹងថា សមត្ថកិច្ច និងអាជ្ញាធរមូលដ្ឋានបានពិនិត្យនៅព្រឹកថ្ងៃទី ២៨ ខែធ្នូនេះ បានបញ្ជាក់ថា គឺជារូបចម្លាក់ចម្លងក្លែងក្លាយ។ រូបចម្លាក់ទាំង ៥ ព្រះ អង្គនោះរួមមានទី ១ ព្រះវិស្ណុដៃប្រាំបី, ២ ព្រះទ្រង់គង់ពែនភ្នែន, ៣ ព្រះភគណនេស, ៤ តាឥសី, ៥ រូបព្រះនាងនាគគីនាគគា។

តាមការអះអាងរបស់អ្នកស្រុកភូមិគៀនឃ្លាំង បានបញ្ជាក់ថា កាលពីរសៀលថ្ងៃទី ២៦ខែធ្នូ បុរសអ្នកនេសាទម្នាក់បានទៅលើកលបហើយប្រទះឃើញព្រះទាំងប្រាំព្រះអង្គនេះនៅមាត់ទន្លេ។ ហើយក៏បានលើកយកព្រះទាំងប្រាំព្រះអង្គនេះមកទុកនៅផ្ទះ ខណៈអ្នកស្រុកក្នុងភូមិដែលមានជំនឿអរូបិយក៏បាននាំគ្នាយកទឹកមកស្រង់ព្រះទាំងប្រាំអង្គ ហើយបានយកទឹកនោះមកលាបមុខមាត់ដៃជើងនិងផឹកដើម្បីផ្សង ក្នុងការសុំឱ្យព្រះអង្គជួយព្យាបាលជំងឺផ្សេងៗបានជាសះ ស្បើយ។ ប៉ុន្តែមិនទាន់ឃើញល្បីថាមានអ្នកណាជាសះស្បើយពីជំងឺនៅឡើយ៕

អត្ថបទ៖ ឈៀង ថារិទ្ធ