CDC ៖ រំហូរទុនវិនិយោគឯកជនកើនឡើង ២២% ក្នុងឆ្នាំ ២០២៣ ស្មើជិត ៤,៩ពាន់លានដុល្លារ

រំហូរទុនវិនិយោគឯកជននៅឆ្នាំ២០២៣ មានការកើនឡើងគួរឱ្យកត់សម្គាល់ ក្នុងរង្វង់ប្រមាណ ២២% ធៀបនឹង​ឆ្នាំ២០២២ លើគម្រោងវិនិយោគចំនួន ២៦៨ ដែលមានទុនសរុបប្រមាណជិត ៤,៩ ពាន់លានដុល្លារអាមេរិក បង្កើតការងារបានប្រមាណ ៣០៧,០០០កន្លែង។ នេះបើតាមសេចក្តីប្រកាសរបស់ក្រុមប្រឹក្សាអភិវឌ្ឍន៍កម្ពុជា (CDC)។

បើតាមក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា ក្នុងឆ្នាំ ២០២៣ CDC បានអនុម័តគម្រោងថ្មីចំនួន ២៤៧ និងគម្រោងពង្រីក ផលិតកម្មចំនួន ២១ ហើយក្នុងនោះ គម្រោងវិនិយោគចំនួន ៧១ ត្រូវបានបណ្តាក់​ទុនវិនិយោគ​នៅក្នុងតំបន់សេដ្ឋកិច្ចពិសេស។ ដោយក្នុងនោះ ចំនួនគម្រោងវិនិយោគក្នុងវិស័យ​ឧស្សាហកម្មបានចូលរួម​ចំណែក​ដល់ទៅប្រមាណ ៩២% នៃចំនួនគម្រោងវិនិយោគសរុប ខណៈទុនវិនិយោគប្រមាណ ៤៦% បានមកពី​វិស័យនេះ។ ដោយឡែក វិស័យហេដ្ឋារចនាសម្ព័ន្ធ និងផ្សេងៗដែលមានតែប្រមាណ ២,៦% នៃចំនួនគម្រោងវិនិយោគ បានចូលរួម​ចំណែកដល់ទៅប្រមាណ ៤៤% នៃទុនវិនិយោគសរុប ដោយសារចរិតនៃការវិនិយោគក្នុង​វិស័យនេះត្រូវការទុនវិនិយោគ​ច្រើន។

ប្រភពដដែលបានបញ្ជាក់ថា រំហូរទុនវិនិយោគក្នុងឆ្នាំ ២០២៣ ភាគច្រើនមានប្រភពមកពីប្រទេសចិន និងក្នុងស្រុក ដោយបានរួមចំណែកជិត ៩០% នៃទុនវិនិយោគសរុប។ ប្រសិនបើពិនិត្យមើលរបាយការណ៍គម្រោងវិនិយោគ ក្នុងឆ្នាំ​២០២៣ គម្រោងវិនិយោគភាគច្រើន មានទីតាំងស្ថិតក្នុងខេត្តកំពង់ស្ពឺ ហើយគម្រោងវិនិយោគមួយចំនួន ទៀតបាន​ប្រមូលផ្តុំនៅរាជធានីភ្នំពេញ និងខេត្តជុំវិញរាជធានីភ្នំពេញ មានដូចជា ខេត្តកណ្តាល ខេត្តតាកែវ និងនៅតាម បណ្ដាខេត្ត​ដែល​មានការអភិវឌ្ឍតំបន់សេដ្ឋកិច្ចពិសេស គឺខេត្តស្វាយរៀង និងខេត្តព្រះសីហនុ ជាដើម។

សម្រាប់គម្រោងធំៗ ដែលបានបោះទុនវិនិយោគ រួមមាន គម្រោងបង្កើតរោងចក្រផលិតដែកគ្រប់ប្រភេទ ស្ថិតនៅក្នុង​តំបន់សេដ្ឋកិច្ចពិសេសកំពង់ផែក្រុងព្រះសីហនុ មានទុនវិនិយោគចំនួន ៤០លានដុល្លារអាមេរិក។ គម្រោងបង្កើត​រោងចក្រផលិត និងបង្គុំគ្រឿងអលង្ការ និងគ្រឿងលម្អផ្សេងៗ ធ្វើពីលោហៈ និងប្លាស្ទិក ស្ថិតនៅក្នុងតំបន់សេដ្ឋកិច្ច​ពិសេស រ៉ូយ៉ាល់ គ្រុប ភ្នំពេញ រាជធានីភ្នំពេញ មានទុនវិនិយោគប្រមាណ ៩ លានដុល្លារអាម៉េរិក។

ទាក់ទងនឹងវិស័យកសិកម្ម និងកសិ-ឧស្សាហកម្ម គម្រោងបង្កើតកសិដ្ឋានចិញ្ចឹមគោពូជ និងគោសាច់ខ្នាតធំ ស្ថិតនៅស្រុកស្នួល ខេត្តក្រចេះ មានទុនវិនិយោគប្រមាណ ៧៣លានដុល្លារអាមមេរិក, គម្រោងបង្កើតរោងចក្រកែ​ច្នៃផ្លែស្វាយ ស្ថិតនៅស្រុកភ្នំស្រួច ខេត្តកំពង់ស្ពឺ ក្នុងទុនវិនិយោគប្រមាណ ២៦លានដុល្លារអាមេរិក, គម្រោងបង្កើត​រោងចក្រកែច្នៃវេចខ្ចប់កសិផល (ផ្លែចេក) និងកសិដ្ឋានដាំដំណាំចេក ស្ថិតនៅស្រុកអូរ- រាំងឪ ខេត្តត្បូងឃ្មុំ ក្នុងទុនវិនិ​យោគ​ប្រមាណ ១០លានដុល្លារអាមេរិក និងមានគម្រោងធំមួយចំនួនទៀត៕